Te Koaua Ibukin Ana Tautaeka n Uea te Atua
E reireinia taan rimwina Iesu bwa a na tataro ni kangai: “Tamara are i karawa, e bia katabuaki aram. E bia roko am Tautaeka n Uea. E na kakororaoaki nanom i karawa ao n te aonnaba naba.” (Mataio 6:9, 10) Tera Ana Tautaeka n Uea te Atua? Tera ae kakaraoia? Ao e aera ngkai ti riai n tataro ibukina?
Bon te Uea Iesu n Ana Tautaeka n Uea te Atua.
Ruka 1:31-33: “Ko na aranna bwa Iesu. E na kakannato ao e na aranaki bwa Natin Teuare Moan te Rietata, ao Iehova ae te Atua e na anganna ana kaintokanuea tamana are Tawita, ao e na tautaeka bwa te Uea i aon te utu are Iakoba n aki toki, ao e na akea tokin ana Tautaeka n Uea.”
Te Tautaeka n Uea bon ana boto n reirei Iesu n ana uarongorongo.
Mataio 9:35: “E mwananga Iesu ngkanne ni kawari kaawa ni kabane aika bubura ma aika uarereke, n angareirei n aia tinakoka ao n tataekina te rongorongo ae raoiroi ae taekan te Tautaeka n Uea, ma ni katoki aeka n aoraki ma mamaara ni kabane.”
E kaota te kanikina Iesu nakoia taan rimwina bwa a na ataa iai te tai are e nang roko iai te Tautaeka n Uea.
Mataio 24:7: “E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana, ao a na roko roongo ma mwaeiein te aba n te tabo teuana ma teuana.”
A a uarongorongoa ngkai taekan te Tautaeka n Uea taan rimwin Iesu ni katobibia te aonnaba.
Mataio 24:14: “Ao e na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”