Ko a Tia ni Kaota Arora n Reirei n te Baibara ma Aomata ni Moan Rokom?
Ngkana a kaoaki ke ni kaungaaki kaain te auti bwa a na reirei n te Baibara, a taku tabeman bwa a aki kan ongora ke a bon rereirei n te Baibara n aia Aro. Kioina ngkai tao a aki ataia ae e kaokoro arora n reirei n te Baibara ma Aaro ake tabeua, a aki ataia ae e kona n riki te reirei n te Baibara bwa te bwai ae kakukurei ao e kona ni karekea otaia. Mangaia are n oneani mwin are ko na kaoa ke ni kaungaa bwa e na reirei n te Baibara, e aera bwa ko aki kabongana tabeua te miniti ni moan rokom ni kaota iai arora n reirei n te Baibara? E kangai kaikonakana: Tai tii tuangia bwa te tia kuuka ngkoe ae ko rabakau ao ko kukurei ni manga oki ma te amwarake, ma an angania naba ngkekei bwa a na katoongnga! Aio arom ae ko kona ni karaoa iai anne i nanon tii tabeua te miniti:
“N am iango e na roko te bong ae a na kakoroaki iai bukin taeka aikai? [Wareka Itaia 33:24, ao kariaia te kaeka.] N na kaota nakoim te bwai ae kakannongora i aon te reirei aei.” Angan te aomata te boki ae Ana Reirei te Baibara ao kairia nakoni barakirabe 22 n iteraniba 36. Wareka te titiraki are i nano ao butiia te aomata anne bwa e na kakaaea te reke ngkana ko wareka te barakirabe. Manga tabeka te titiraki ao ongora n ana kaeka. Uaia ni wareka riki te kibu teuana. Tabeka te titiraki ae na kaekaaki n okim are imwina, ao karaoa te babaire ma ngaia bwa ko na manga bon oki. Ko a bon tia ni moana te reirei n te Baibara ma te aomata anne!