Karikirakean Rabakaura n te Mwakuri ni Minita—Tibwaakin te Boki ae Ana Reirei te Baibara

Bukini Kakawakina: Te bwai ni mwakuri ae kakawaki n ara bwaoki ni mwakuri ibukin te angareirei bon te boki ae Ana Reirei te Baibara. E ngae n anne, imwain ae ti na reirei iai ma temanna, ti riai moa n anganna. Ngaia are ti riai ni bane ni kakorakoraira ni kamwaataira n tibwaa te boki aei n te mwakuri ni minita. (TaeRab. 22:29) A bati aanga iai ao a riai taan uarongorongo ni kabongana are e angaraoi irouia.

Aroni Karaoana:

Tabeka te titiraki ae kauekea te kan ongora ae ko kona ni kaira iai kaain te auti nakon te mwakoro teuana n te boki. Ko kona naba n rinea te titiraki teuana mai buakon ake ni moan taiani mwakoro. Imwin ongoraean ana kaeka kaain te auti, wareka te kibu ae kaineti ma ngaia ao imwina kaota te barakirabe i aon te reirei anne ao tao maroroakinna ma ngaia n te aro ae kimototo.
Te anga riki teuana boni kabonganaan iteraniba ake mai moa ni kauekea iai kan ongoraani kaain te auti ao imwina kaota nakoina ana kaeka te Baibara i nanon te boki. N te katoto, ko kona n taekina te kabuanibwai ae e a tibwa riki ae nako n te rongorongo ao kabwarabwaraa ae a bati aika a iaiangoi kaekaan titiraki ake n iteraniba 3. Ke ko kona n taekinna bwa ko kawariia kaain rarikim n taekina te kantaninga ae raoiroi ibukin taai aika na roko. Imwina, kaotii taamnei ake n iteraniba 4-5 ao titiraki ni kangai: “E nga mai buakoni berita aikai ae ko kan nora kakoroani bukina?” Te anga riki teuana bon taekinan ae ko kakawariia aomata ni buokiia bwa a na atai kaekaan titiraki aika kakawaki ibukin te maiu aei. Imwina kaotii titiraki ake i nano n iteraniba 6 ao titirakinna bwa e nga ae e nano riki iai.
Kaotia bwa ko kan reirei ma ngaia n te Baibara. Ko kona ni kangai: “Ti kakabongana te bwai n angareirei man te Baibara aei nakoia kaain rarikira. Ko a tia n noria mai mwaina? [Kariaia te kaeka.] I tangiria ni kaota aroni kabonganaana nakoim tabeua te miniti man am Baibara.”

Kataa Aei n te Namwakaina:

Karaoa te kataneiai iai n am taromauri n utu.
Tibwaa te baere ko na taekinna nakoia taan uarongorongo tabeman n te mwakuri ni minita. (TaeRab. 27:17) Bita am maroro ngkana e aki uaana.