E Nang Aki Manga Maroroakinaki te Kibu Ibukin te Bong n te Botaki Ibukin te Mwakuri ni Minita

E mamaroroakinaki n te aro ae kimototo n taai aika nako te kibu ibukin te bong n te botaki ibukin te mwakuri ni minita, ngkana e irekereke ma te mwakuri ni minita. E a bitaki aei ngkai. E nang aki manga kabotoaki te maroro n Neneran te Baibara ni Katoa Bong n te botaki ibukin te mwakuri ni minita. N aron are mai mwaina, a kona taani kaira te botaki ibukin te mwakuri ni minita ni kabongana te Baibara, Ara Mwakuri ni Minita, te boki ae te Ministry School, te boki ae te Reasoning, ao booki riki tabeua aika irekereke ma te mwakuri ni minita. A riai ni katauraoi baika a manena te koraki ake a mwiokoaki bwa a na kaira te botaki ibukin te mwakuri ni minita, ibukini buokaia te koraki ake a na karaoa te mwakuri ni minita n te bong anne. E riai n aki raka maanin te botaki i aon 10 nakon 15 te miniti n aron taai aika nako, ao e na kee riki ngkana e karaoaki imwin te botaki n te ekaretia.