Ko a Tia n Regular Bwaiania Ngkoa?
1. Tera te mwioko ae a kimwareirei iai aomata aika bati, ma tera ae riai ibukia ake tabeman?
1 I nanon ririki aika bati, nga ma nga te koraki ake a kimwareirei ni mwiokoaia bwa taan “angareirei ao n tataekina te rongorongo ae raoiroi” ike a kabwanina iai aia tai n te mwakuri ni minita. (Mwa. 5:42) Ma tabeman a a manga kerikaaki man te mwakuri ni bwaiania ni kaineti ma bukina aika kakaokoro. Ngkana ko a tia n regular bwaiania ngkoa, ko a tia raoi n nenera aroaroni maium ngkai ma n noria iai bwa ko kona ni manga riki bwa te bwaiania?
2. Bukin tera bwa a riai n nenera aroaroni maiuia ngkai te koraki ake a bwaiania ngkoa?
2 Bibitakin Aroaroni Maiura: Tao e a tia n toki te kangaanga are e kairiko bwa ko na katoka iai am mwakuri ni bwaiania. N te katoto, ngkana ko kerikaaki man te mwakuri ni bwaiania ibukina bwa ko a aki kona ni kakoroa mwaitin te aoa ae 90 n te namwakaina, ko kona ngkanne ni manga riki ngkai bwa te bwaiania ngkae e a tia ni kakerikaakaki mwaitin te aoa nakon 70? E a kerikaaki kainnanoakin am mwakuri ni kareketianti ke tabem n am utu man te tai are ko a aki riki iai bwa te bwaiania? Temanna te tari te aine are e a aki bwaiania ibukin aorakina, e a manga riki bwa te bwaiania ngke ai 89 ana ririki ni maiu. E tuai man rin neiei n te onnaoraki n te maan ae raka i aon teuana te ririki, ao e a namakinna iai bwa e a kona ni manga bwaiania!
3. A na kanga kaain te utu n ibuobuoki ni buoka temanna n aia utu bwa e na bwaiania?
3 Tao tiaki ngkoe te bwaiania, ma temanna kaain am utu e a manga aikoa bwaiania ibukin tabeakinan temanna kaain te utu, tao n aron ana karo ae e a kara. (1Tim. 5:4, 8) Ngkana ngaia anne, ko kona ngkoe ke tao temanna kaain am utu ni karaoa ae bati riki ni buoka iai are e a aki bwaiania? Bukin tera bwa kam aki kaai ni maroroakini kangaanga? (TaeRab. 15:22) Ngkana a ibuobuoki kaain te utu n te aro are e na kona ni bwaiania iai temanna mai buakoia, a kona ni bane n namakinna bwa e rangi ni kakawaki boutokaan temanna kaain aia utu bwa e na bwaiania.
4. Tera arom ngkana ko a aki kona ni karaoa te mwakuri ni bwaiania n te tai aei?
4 Tai bwarannano ngkana e kairiko aroaroni maium ngkai bwa ko na aki manga moana riki am bwaiania. E kakukureia Iehova tauraoim ni karaoa anne. (2Kor. 8:12) Kabongana te rabakau are ko karekea n am mwakuri ni minita ni bwaiania ngkai. Tataroakina am kantaninga, ao tiatiani mwakuri aika a na bita aroaroni maium. (1Ioa. 5:14) Tao imwin tabeua te tai, e nangi kauka nakoim “mataroan te mwakuri ae bati” Iehova n te aro are ko a kona ni manga kimwareirei n te mwakuri n regular bwaiania!—1Kor. 16:9.