“Ko Kona n Riki Bwa te Bwaiania ae Raoiroi!”
1. Tera ana namakin te tari temanna ni kaineti ma ana mwakuri ni bwaiania?
1 E taku Kathe B. Palm: “Akea riki te mwakuri teuana ae kona n anganai te raunnano ae bati ke ae kona ni karekea kakabwaiau ni kaineti ma au onimaki.” E kabanea irabwi te ririki neiei n anga ngaia n te mwakuri ni bwaiania, n uarongorongo mai tabon Chile i Amerika Maiaki, nakon tabona are teuana. Tao e kona ni kangai temanna nakoim, ngkana e iaiangoa kakabwaiaani maiuia te koraki ake a a tia ni beku ni kabwanina aia tai: “Ko kona n riki bwa te bwaiania ae raoiroi!”
2. Kabwarabwaraa bwa e aera ngkai e reke te raunnano ae korakora mani karaoani mwakuri aika kaineti ma te onimaki.
2 Te Aroaro ni Maiu ae Karaunano: E kunea Iesu ae ara Banna ni Katoto, bwa karaoan nanon Tamana bon te bwai ae karaunano ni koaua. (Ioa. 4:34) Mangaia ae e nako raoi mai nanon Iesu reireinaia taan rimwina bwa e bon reke te karaunano ni koaua mani karaoani mwakuri aika irekereke ma taromaurian Iehova. Ti rauaki raoi ngkana ti kabatiai karaoani mwakuri aika kakukureia Iehova. N reitaki ma anne, ngkana ti anga riki ara tai ae bati, korakorara, ao ara bwai ibukini buokaia tabemwaang, ti boni karikirakea iai kukureira.—Mwa. 20:31, 35.
3. Te kimwareirei raa ae ti kona ni karekea mani kabanean te tai ae bati n te mwakuri ni minita?
3 E kona n reke kimwareireira mani moanakin ao kairan reirei n te Baibara aika mwaiti riki, mani kabatiaan riki ara tai n te mwakuri ni minita. E ngae ngke a taraa n aki bwerengaki aomata aika bati ake ti kawariia n aia auti, ma ti kona n noria bwa e a uaana riki karaoan ara aono nakon are ti moani kantaningaia, ngkai ti a mwaatai riki ma n rabakau n te mwakuri ni minita. A kona bwaiania ni kabonganai reireiaia ni kabane ake a karekei man te Reirei ni Bwaiania, ae a kona n iria imwin aia mwakuri ni bwaiania i nanon teuana te ririki. (2 Tim. 2:15) Ngkana ti taningamarau, ti kona ngkanne n uniki koraan te koaua ake a na karikiuaa n te tai rimwi.—TeMin. 11:6.
4. Tera ae a riai n iangoia rooro n rikirake ake e a kaan aia tai n angabeeba?
4 Rooro n Rikirake: Ngkai e a bane am reirei, ko a tia ni karaua n iangoa arom nakon taai aika imwaim? Ko a tia n rangi n tatabetabe ni karaoan am bwai n reirei mangkekei ni karokoa ngkai. Ko na kanga ngkanne ni kabongana te tai are e nangi mwaawa are imwin am angabeeba? N oneani mwin are ko na kabwanina am tai n te mwakuri ni kareketianti, e aera ko aki tataroakina te tia ae te regular bwaiania? Rabakau ake ko na karekei, n aron te uarongorongo nakoia aomata aika kakaokoro rikiaia, te tokanikai i aon am kangaanga, karikirakean arom n taotaonakinnano, ao karikirakean rabakaum i aon te angareirei, a na boni kakabwaiako n uaa tokini maium.
5. A na kanga kaaro ao kaain te ekaretia ni kaungaunga nakon te mwakuri ni bwaiania?
5 Kaaro, kam karaoi tabemi ni kaineti ma kairaia natimi nakon te beku ibukin te Atua ni kabwanina aia tai iai? E kona n rangi n ibuobuoki nakoia te bwai ae ko taekinna ma am katoto ae raoiroi, bwa a na moanibwaia te Tautaeka n Uea. (Mat. 6:33) E ururing ni kangai Ray ae moana ana mwakuri ni bwaiania ngke e bane ana kauarinan: “E aki toki n iangoia tinau bwa moan te kakukurei mwini karaoan te mwakuri ni bwaiania.” A bane ni kona ni kaungaunga nakon te mwakuri ni bwaiania kaain te ekaretia ni kabane n aia taetae ao n aia boutoka. E taku Jose mai Tibein: “E iangoaki n au ekaretia bwa te mwakuri ni bwaiania bon te nakoa ae te kabanea n tamaroa ibukia kairake. E a kairai aia taeka ao aia kaungaunga ibukin te mwakuri ni bwaiania, n ikotaki ma aia mwakuri n ibuobuoki, bwa N na kai moana au mwakuri ni bwaiania.”
6. Tera ae ti kona ni karaoia ngkana akea nanora ni kani bwaiania?
6 Te Tokanikai i Aoni Bwaai n Tutuki: Ma tera arom ngkana ko kangai, ‘Ai bon akea nanou ni kani bwaiania.’ Ngkana ngaia anne ae ko moan iangoia, tataro nakon Iehova ibukin am namakin anne ao tuangnga ni kangai, ‘I aki ataia bwa I kani karaoa te mwakuri ni bwaiania ke I aki, ma I kani karaoa ae ko na kukurei iai.’ (TaiAre. 62:8; TaeRab. 23:26) Ukera ngkanne ana kairiri rinanon ana Taeka ao ana botaki. A bati bwaiania ake a regular ngkai, ake a kataa moa te auxilliary bwaiania, ao e a kairiia te kimwareirei are a rinanona bwa a na beku ni kabwanina aia tai iai.—TaiAre. 34:8.
7. Ti na kanga n tokanikai i aon te nanououa bwa ti na kona ni kakoroa te aoa ae 70 ni katoa namwakaina ke ti aki?
7 Ma tera arom ngkana ko aki ataia bwa ko kona ni kakoroa te aoa ae 70 ni katoa namwakaina ke ko aki? E aera ngkai ko aki maroro ma bwaiania ake titeboo aroaroni maiuia ma ngkoe? (TaeRab. 15:22) Korei tabeua am kaetieti aika ko kona ni kakoroi. Ko kona n noria bwa kabonganaan raoi te tai ibukin te mwakuri ni minita, n oneani mwini karaoani mwakuri aika akea uaaia, e a bebete riki iai karaoan te mwakuri ni bwaiania iroum nakon are ko moan iangoia.—IEbe. 5:15, 16.
8. E aera ngkai ti riai ni manga tutuoi aroaroni maiura?
8 Manga Tuoa Riki Aroaroni Maium: E aki toki ni bibitaki aroaroni maiun te aomata. E raoiroi manga tutuoan arom n te tai teuana ma teuana. N te katoto, ko a kaan uritaea man am mwakuri ni kareketianti? E taku Randy ae e moantaai n uritaea: “E kairai te motinnano aei bwa N na kona ni moana au regular bwaiania i rarikini buu, ao e a reke iai angara n nako ni beku ike e kainnanoaki riki iai te ibuobuoki. Moan te bati kakabwaiau man au motinnano aei, ma kakabwaiau ae rangi ni kakawaki riki boni mataniwin nanou ae raoiroi.”
9. Tera ae a riai n iangoia taanga ni mare?
9 A noria tabeman taanga imwin tuoan raoi aroia bwa a aki kainnanoa ae a na uaia ni kabwanina aia tai ni mwakuri ni kareketianti. Ni koauana, tao e kainnanoaki n aei bwa a na kabebetea riki aroni maiuia kaain te utu, ma e rangi ni materaoi te waaki n anga boni ngaiia aei. E taku John, ae buuna e a tia ni kaaki ana mwakuri ni kareketianti ae kabwanina ana tai iai ibukini kabatiaan riki ana mwakuri ni minita: “Akea te namakin ae kakukurei riki nakon ataakin ae e tatabetabe buu n te mwakuri ibukin Iehova i nanon te ngaina.”
10. Tera ae e kairiia Kristian bwa a na iangoa te mwakuri ni bwaiania?
10 Kaotiotan te Tangira ao te Onimaki: E a tia Iehova ni karika te uarongorongo bwa te mwakuri ae te kabanea ni kakawaki ae kona ni karaoaki iroun temanna. I aoni kawaina ngkai ni kamaunaaki te waaki nikawai, ao bon tii ake a taboa aran Iehova aika a na kamaiuaki. (IRom 10:13) E na kairira nanora ae onrake n tangirana ma ara kakaitau nakoina n te bwai ae e a tia ni karaoia ibukira, bwa ti na ongeaba n tuangakira iroun Natina ae ti na kakorakoraira n uarongorongo. (Mat. 28:19, 20; 1Ioa. 5:3) N reitaki ma anne, onimakinan ae ti a boni maeka ngkai ni boong aika kaitira, e na kairira bwa ti na karaoa ara kabanea ni kona n te mwakuri ni minita, ngkai bon iai naba te tai, n oneani mwin are ti na kabanei ara tai ni waakin nako te aonnaba aei.—1Kor. 7:29-31.
11. Tera arora n iango ngkana iai temanna ae tuangira bwa ti kona n riki bwa te bwaiania ae raoiroi?
11 E rangi ni kakawaki riki te mwakuri n regular bwaiania nakon tii karaoani mwaitin te aoa are e katauaki iai, ibukina bwa boni kaotiotan ara tangira nakon te Atua. Mangaia are ngkana iai ae tuangko bwa ko kona n riki bwa te bwaiania ae raoiroi, ao iangoia bwa te bwai ni kamoamoa. Ao iaiangoa ma n tataroakina ae ko na raonia te koraki ake a karaoa ngkai te mwakuri ibukin te Atua, ae karaunano aei.
[Kabwarabwaraan n iteraniba 4]
Kaaro, kam karaoi tabemi ni kaineti ma kairaia natimi nakon te beku ibukin te Atua ni kabwanina aia tai iai?
[Kabwarabwaraan n iteraniba 5]
E a tia Iehova ni karika te uarongorongo bwa te mwakuri ae te kabanea ni kakawaki ae kona ni karaoaki iroun temanna.