Buokiia Natimi Bwa A na Kamoamoaa Iehova
1. Baikara aia katoto ataeinimwaane ao ataeinnaine ake a kamoamoaa Iehova aika a taekinaki n te Baibara?
1 A kaungaaki ataeinimwaane ao ataeinnaine n Taian Areru 148:12, 13 (BG), bwa a na “kamoamoa aran Iehova.” A mwaiti rongorongon aia katoto ataei ake a karaoa anne n te Baibara. A na kanga kaaro n reireinia natiia bwa a na kamoamoaa Iehova?
2. E aera ngkai e rangi ni kakawaki irouia kaaro bwa a na katea te banna ni katoto ae raoiroi ibukia natiia?
2 Te Katoto: A tuangaki kaaro aika I-Iteraera bwa a riai moa ni karina tangiran Iehova ao n taui i nanoia ana tua, imwaini karinan te koaua i nanoia natiia. (TuaKau. 6:5-9) Ngkana ko kaungaa taekan te mwakuri ni minita nakoia natim ao ni karikia bwa anuam n uataboa karaoana ni katoa wiki, a na bae n taraa te mwakuri anne bwa e rangi ni kakawaki ao ni kakukurei.
3. Tera ae nanonaki n reiakinaia ataei n te aro ae a na rikirake riki?
3 Reiakinia n te Aro ae A na Rikirake Iai: Kairiia natim bwa a na uataboa te uarongorongo ma ngkoe. Tao a kona n anga te turaeki nakoia kaain te auti, ke ni wareka te kibu. E na kabatiaaki riki iai kimwareireia, ao a na buokaki iai bwa a na onimakina raoi aia konabwai n tibwaa rongorongon te Tautaeka n Uea. Ngkana a tabe n ikawairake, e nang rikirake riki aia ibuobuoki iai. Ngaia are buokiia bwa a na ririkirake riki, ao n iangoi tiaia n te onimaki ake a na buoka rikirakeia iai.
4. Tera ae kainnanoaki ibukin te ataei bwa e na tau n riki bwa te tia uarongorongo ae tuai ni bwabetitoaki?
4 Maroro ma unimwaane ngkana ko namakinna ae natim a a mwaatai ni kona n riki bwa taan uarongorongo aika a tuai ni bwabetitoaki, ao a kaota nanoia ni kani karaoa te mwakuri anne. Ngkana a a riki bwa taan uarongorongo, a na namakina riki riaini kamoamoaan Iehova irouia. Uringnga bwa e aki riai n titeboo ana atatai te ataei ma ana atatai te ikawai ae e a tia ni bwabetitoaki, imwain rikina bwa te tia uarongorongo. E atai moan reirei man te Baibara natim? E maiuakini ana reirei te Baibara ibukin te aroaro ni maiu ae riai? E kan uataboa te mwakuri ni minita ma ni kinaaki bwa temanna naba ngaia Ana Tia Kakoaua Iehova? Ngkana e karaoi baikai, a na kariaia ngkanne unimwaane bwa e a tau n riki bwa te tia uarongorongo ae tuai ni bwabetitoaki.—Nora te boki ae Te Botaki ae Baireaki Ibukini Karaoan Nanon Iehova, i. 79-82.
5. Bukin tera bwa e manena irouia kaaro bwa a na reiakinia natiia?
5 Bon te mwakuri korakora reiakinaia ataei bwa a na kakorakoraia ni kamoamoaa Iehova mai nanoia. Irarikin anne, a karako bwaai aika a kona ni kakukureiaki iai kaaro nakon kukureia n norakia natiia bwa a rikirake n te onimaki. Ma ae moan te kakawaki riki, boni kukurein Iehova ngkana e noriia ataei n taekin ana mwakuri aika kamimi.