E Kataneiaira Iehova n te Mwakuri Aei
1. Tera te bwai ae e karaoia Iehova ngke e angania aomata mwiokoaia?
1 Ngke e angania aomata mwiokoaia Iehova, ao e angania naba te ibuobuoki ae a kainnanoia ibukini katiaan raoi mwiokoaia. N te katoto, ngke e tuanga Noa Iehova bwa e na kabaa te aake ae te bwai ae tuai kakaraoia mai mwaina, ao E tuangnga naba aroni karaoana. (KBwaai 6:14-16) Ngke e mwiokoaki te tia kawakin tiibu ae nimamannei ae Mote bwa e na kawariia unimwaanen Iteraera ao Barao, e karauaki nanona iroun Iehova ni kangai: “N na memena i wim, ma n reireiko am taeka.” (TeOti. 4:12, BG) Ni karaoani mwiokoara ae tataekinan te rongorongo ae raoiroi, e bon aki katikuira Iehova bwa ti na karaoia i bon iroura. E kataneiaira n te mwakuri aei rinanon Te Kuura ni Kataneiai Ibukia Taan Uarongorongo ao Te Botaki Ibukin te Uarongorongo. Ti na kanga ni kakabwaiaaki man te kataneiai aei?
2. Ti na kanga ni buokaki man Te Kuura ni Kataneiai Ibukia Taan Uarongorongo?
2 Te Kuura ni Kataneiai Ibukia Taan Uarongorongo: Rinanoa te boki are e na kabonganaaki imwaini kaeani bobotaki nako. Ngkana ko nora aroni kabonganaan aanga aikai irouia te koraki ake a angareirei, e na rikirake riki iai otam n angareirei. (TaeRab. 27:17) Uota am boki ae te Ministry School nakon te botaki bwa buokam n tain te reirei. Ngkana e taekina te mwakoro te mataniwi ibukin te kuura are e na mwakuri i aona te tia angareirei, kanikinaei aanga n ibuobuoki ake ko kani kamanenai, ao korei kauring ni mangeen te boki. Ma te anga ae te kabanea n tamaroa ibukini buokara man te kuura n reirei aei, bon ara ibuobuoki iai. Ko a tia ni karina aram? Ngkana ko a anganaki am reirei, katauraoi raoi ao kabonganai reirei ni kairiri ake ko anganaki. N tain te mwakuri ni minita, kabonganai baike ko a tia n reiakin.
3. Tera ae ti na buokaki iai man Te Botaki Ibukin te Uarongorongo?
3 Te Botaki Ibukin te Uarongorongo: Ti na uringi riki reirei ake a maroroakinaki n te botaki aei n arora ni kamani wareka te boki are e na kabonganaaki ao n tauraoi n anga ara kaeka. Ngkana ti kakimototoi ara kaeka, e na reke naba aia tai tabeman n anga aia kaeka. Kakauongo raoi nakoni kaotioti ake a karaoaki, ao kabonganai aanga mai iai ake ko iangoi bwa e na uaana riki iai am mwakuri ni minita. Kawakini katoton kaongora aika kakawaki man Ara Mwakuri ni Minita bwa bwaai n ibuobuoki n taai aika na roko.
4. Bukin tera bwa ti riai ni kamanena raoi te kuura ni kataneiai?
4 N aron te mwioko are a anganaki Noa ma Mote, ao ti kaaitara naba ma kangaanga ni mwiokoara ae tataekinan te rongorongo ae raoiroi ni kabutaa te aonnaba. (Mat. 24:14) Ti kona n tokanikai ngkana ti onimakina raoi Iehova ae ara tia Reirei ae Moan te Kakannato, ao ni kamanena raoi te kuura ni kataneiai are e katauraoia.—Ita. 30:20.