Ti Buokaki n te Kuura ni Kataneiai Ibukia Taan Uarongorongo Ibukin 2015 ni Karikirakea Arora n Angareirei

¹ E korea ae kangai te tia areru are Tawita: “A na tangiraki ana taeka wiu ma iangoan nanou i matam, Iehova, ae au bwa ae rietata, ma au tia kamaiu.” (TaiAre. 19:14, BG) Ti tangiri naba ara taeka bwa a na kakukureia Iehova ibukina bwa a kakawaki iroura mwiokoara ae bwainan te koaua n te ekaretia ao n te mwakuri ni minita. Te anga teuana ae e kataneiaira iai Iehova n te mwakuri ni minita bon te Kuura ni Kataneiai Ibukia Taan Uarongorongo. E kakaraoaki ni katoa wiki te reirei ni kataneiai aei n ekaretia aika raka i aon 111,000 mwaitiia ni katobibia te aonnaba. E a tia ni buokiia taari mwaane ao aine aika kakaokoro ni katobibia te aonnaba, bwa a na riki bwa minita aika tau ibukin te rongorongo ae raoiroi aika konabwai n angareirei ma te ingaingannano, te atataiaomata ao te ninikoria.—Mwa. 19:8; IKoro. 4:6

² A na rinanoaki reirei mani boroutia aika te Rongorongo ae Raoiroi Mairoun te Atua! ao Antai Aika A Kakaraoa Nanon Iehova ni Boong Aikai? n te kaetieti ibukin te kuura n 2015. Irarikin anne, a a tia ni karaoaki bitaki ibukin te tai ae katauaki ibukin reirei aika kakawaki man te Baibara ao Reirei Na. 1. A rinanoaki n taiani barakirabe aika i nano, bitaki aikai n ikotaki ma kaetieti n aroni kabwarabwaraani mwakoron nako te reirei.

³ Reirei Aika Kakawaki Man te Baibara: A mwiokoaki taari mwaane n te mwakoro aei bwa a na kabanea uoua te miniti n rinanoa te reirei teuana ae kakawaki ao ni manena man te wareware n te Baibara ibukin te wiki. E kona ni maroroakinaki te reirei ae manena nakoia kaain te ekaretia i nanon te tai ae katauaki ngkana ko katauraoi raoi. Imwin anne, a kantaningaaki kaain te ekaretia bwa a na kabanea onoua te miniti n taekin reireiaia i aon reirei aika kakawaki ake a karekei man aia wareware n te Baibara n te wiki, i nanon 30 te tekan ke i aana. E kainnanoaki te katauraoi ao te taotaonakinnano ni katauraoan reireiara aika kakawaki i nanon 30 te tekan. Ma karaoan aei bon te kataneiai ae raoiroi ibukira. E reke naba iai aia tai tabemwaang n taekin reireiaia imwin aia ukeuke.

⁴ Reirei Na. 1: E a tia ni baireaki bwa e na uarereke tain te wareware n te Baibara nakon tenua te miniti ke i aana ao e na uarereke naba te bwai are e warekaki. A riai te koraki ake a mwiokoaki n aei ni kakataneiai ni wareware rinanon te wareware ni kabaibati ao ni kaetii raoi atongan taeka n te aro ae na ota te rongorongo. Kioina ngkai e kakawaki te wareware ibukin ara taromauri, a riai ana aomata nako Iehova ni karikirakea rabakauia ni wareware. Ai kakimwareireira noraia ara ataei ni kona ni wareware raoi! A riai ni kamoamoaaki kaaro ibukin aia kakorakora ni buokiia natiia bwa a na riki bwa taani wareware aika rabakau.

⁵ Reirei Na. 2: E na karaoaki te reirei ae manna nimaua te miniti aei iroun te tari te aine. E riai te tia karaoa te reirei ni kabongana atun ana reirei ae baireaki. Ngkana e boto ana reirei man te boroutia ae te Rongorongo ae Raoiroi Mairoun te Atua! ao e riai ni kainetaki nakon iteran te mwakuri ni minita aika koaua ao ni manena ibukin te aono. E na baireaki temanna ae e na katoaa te reirei aei iroun te mataniwi ibukin te kuura.

⁶ Reirei Na. 3: E na karaoaki te reirei ae manna nimaua te miniti aei iroun te tari te mwaane ke te aine. Ngkana e mwiokoaki iai te tari te aine, e riai ni karaoia n aron are oti n Reirei Na. 2. Ngkana e mwiokoaki iai te tari te mwaane, e riai ni boto te reirei anne n te boroutia ae Antai Aika A Kakaraoa Nanon Iehova ni Boong Aikai? ao ni karaoaki n aron te kabwarabwara nakoia kaain te botaki. E riai te tia karaoa te reirei ni kamataata atun ana reirei are e anganaki, n rinei kiibu ake a riai ni kabonganaaki ao ni kaota kakawakin te reirei ae reke mani karaoan nanon te Atua.

⁷ Te Reirei n Ibuobuoki: E na kabanea uoua te miniti te mataniwi ibukin te kuura n anga taeka ni kamoamoa n ikotaki ma te reirei n ibuobuoki ae boto man te boki ae te Benefit From Theocratic Ministry School Education, imwini karaoan te reirei. E aki riai te mataniwi n taekina tein te reirei ngkana e katanoataa atun ana reirei te tia karaoa te reirei n te kuura ni kataneiai. Imwini karaoa te reirei, e riai te mataniwi n te kuura n anga taeka ni kamoamoa nakon te tia karaoa te reirei anne, e na taekina tein te reirei are mwakuri iai ao aron nakoraoin karaoana irouna ke ni kabwarabwaraa ma te akoi bwa e aera ngkai e manena kaatuuan ana iango iai.

⁸ E kona n reke te booma ibukin te reirei n ibuobuoki n ana boki te tia karaoa te reirei ae te Ministry School, n te iteraniba 79 nakon 81. Imwini karaoan te reirei, e riai te mataniwi ni kanikinaea ana boki te tia karaoa te reirei ao n titirakinna bwa e karaoa te kataneiai i aon tein te reirei are e mwakuri iai ke e aki. E kona n anganaki taeka ni kamoamoa ao n ibuobuoki riki tabeua te tia karaoa te reirei, imwin te botaki ke n te tai ae angaraoi. A riai n iangoaki reirei n ibuobuoki ake a anganaki taani karaoa te reirei n te kuura bwa te tai ae angaraoi ibukini buokana bwa e na rikirake n te onimaki.—1 Tim. 4:15.

⁹ E riai te mataniwi ke te tia ibuobuoki n tauraoi n anga te kanikina n aroni katangan te beero ke ni karebwerebwe bwa e na ataia te tia karaoa te reirei bwa e a boo ana tai, ngkana e riaon te tai are e katauaki iai. E riai te tia karaoa te reirei ni butimwaea anne rinanoni motikan ana maroro ao ni kitana mooa.—Nora te boki ae te Ministry School, i. 282, bar. 4. 

¹⁰ A kaungaaki koraki nako ake a tau ibukini kaainakin te Kuura ni Kataneiai bwa a na anga araia. (Nora te boki ae te Ministry School, i. 282, bar. 6.) Te kataneiai ae reke man te kuura aei, a buokaki iai ana aomata Iehova bwa a na riki bwa taan tataekina ao n reireinia aomata te rongorongo ae raoiroi ibukin te Tautaeka n Uea ma te aki nanokokoraki, te karinerine ao te tangira. Akea te nanououa bwa E boni kukurei Iehova n neboaki irouia te koraki aika kakabwaiaaki n te kuura ni kataneiai aei!—TaiAre. 148:12, 13; Ita. 50:4.