Uarongorongo Nakoia “Aomata n Aekaia Nako”
1. A kanga n riki n ai aron te kabentaa ae mwaatai taan tataekina te rongorongo ae raoiroi?
1 A mwaiti ana bwai ni mwakuri te kabentaa ae mwaatai, ao e ataa tain ao aroni kamanenaia ni kabane. N aron anne, iai ara bwai ni mwakuri aika kakaokoro aika a na buokira ni kakororaoa ara mwakuri ngkai taan tataekina te rongorongo ae raoiroi ngaira. N te katoto, a tia ni karaoaki boroutia aika kakaokoro ibukini buokara n uarongorongo nakoia “aomata n aekaia nako.” (1Kor. 9:22) A karinanaki tabeua mai buakoni boroutia aikai n te iteraniba ae raka, ao e kabwarabwaraaki iai bwa antai te koraki ake a katauraoaki ibukia, ao aron naba tibwaakia.
2. N ningai te tai ae ti kona iai ni kabonganai boroutia n te mwakuri ni minita?
2 Taini Kabonganaani Boroutia: E na kabonganai ana bwai ni mwakuri te kabentaa, n taai ake e kainnanoi iai. N aron anne, ti kona n anganako boroutia n te tai ae na buokaki iai temanna, ma tiaki tii n te tai are a tibwaaki iai maekatin ni katoa namwakaina. N te katoto, ngkana ti uarongorongo n taabo ake aongkoa Kristian kaaina ike a karako iai aika kan ongora n tain tibwaakin te boki ae Ana Reirei te Baibara, e na ibuobuoki riki ngkana ti anganako te boroutia ao ni kaota te boki ae Ana Reirei te Baibara ngkana ti a tia ni karikirakea te kan ongora iroun te aomata anne.
3. Bukin tera bwa ti riai n rabakau ni kabonganai ara bwai ni mwakuri ibukin te uarongorongo?
3 A kaotaki n te Baibara rongorongoia te koraki ake a mwaatai n aia mwakuri. (TaeRab. 22:29) Ni koauana, akea riki te mwakuri ae kakawaki ni boong aikai nakon “te mwakuri ae tabu ae tataekinan te rongorongo ae raoiroi.” (IRom 15:16) Ngkana ti na riki bwa ‘te tia mwakuri ae akea kamaamaeara n te bwai teuana,’ ti riai ni kakorakoraira bwa ti na rabakau ni kabonganai ara bwai ni mwakuri.—2Tim. 2:15.