Ara Atureti ae Kakawaraki n te Internet—E Katauraoaki Ibukini Buokara ao Buokaia Tabemwaang
E mwiokoira Iesu bwa ti na tataekina te rongorongo ae raoiroi ae taekan te Tautaeka n Uea “n te aonnaba ni kabutaa bwa te bwai ni kaotioti nakoia botannaomata ni kabaneia.” (Mat. 24:14) Ibukini buokara ni ‘kakororaoa raoi ara mwakuri ni minita,’ a a tia n ikotaki atureti aika watchtower.org, jw-media.org, ao jw.org n te atureti ae jw.org.—2 Tim. 4:5.
“Te Aonnaba ni Kabutaa”: E kaania teuana te katenimwakoro mwaitiia aomata n te aonnaba aei aika a kakabongana te Internet. E a moanna n riki bwa aia moan tabo ae a kakawaria ibukini karekean rongorongo aika a kainnanoi, moamoa riki irouia rooro n rikirake. A kona taani kabongana te Internet ni karekei kaeka aika koaua i aon titiraki man te Baibara, man ara atureti aei. A kai kinaaki iai n ana botaki Iehova ao e bebete naba irouia aia bubutii ibukin te reirei n te Baibara ae akea boona ni mwengaia. E a kona iai n roko te rongorongo ae raoiroi n taabo nako n te aonnaba ake e kangaanga iai reken aia tai aomata n ongoraea rongorongon te Tautaeka n Uea.
“Botannaomata ni Kabaneia”: Ti riai n tataekina te koaua man te Baibara n taetae aika kakaokoro bwa te bwai ni kaotioti nakoia “botannaomata ni kabaneia.” E kona ni bebete irouia taani kawara te atureti ae jw.org bwa a na karekea te rongorongo n taetae aika e kaania 400, nakon ae a kona ni karekei man atureti riki tabeua.
Kabongana Raoi: E aki tii katauraoaki te atureti ae jw.org ibukin te uarongorongo nakoia aomata aika tiaki kaain te onimaki. E katauraoaki naba ibukia Ana Tia Kakoaua Iehova bwa a na kabongana. Ngkana ko kauka te Internet ao ti kaungako bwa ko na kataneiako ni kakawara te atureti ae jw.org. A kaotaki i nano aanga tabeua ibukini kabonganaana.
[Diagram n iteraniba 3]
(Ibukini bitakin taeka, nori booki)
Kataia
1 Taibina te taeka ae www.pr418.com n am kaombiuta n te tabo are ko na kakaaei iai atureti n te Internet.
2 Mamataku n te atureti anne ngkana ko kotei atu nako aika oti mai eta, kanoana aika karinanaki mai rarikina, ao aika karinanaki rikaaki i aana.
3 Kataia ni kabongana te atureti ae jw.org ni bwaai nako aika e kona n reke iai te Internet n aron te tareboon ae uouotaki. E kona ni bitaki tiaaitina bwa e na titeboo ma buburan am tareboon ke am kaombiuta, ma e aki bitaki kanoana.