Katauraoiko Ibukin te Kauring ma Kimwareirein Nanom
1. Namwakainan te Kauring bon te tai ae okoro ibukini karaoan tera?
1 Bon te tai ae rangi n angaraoi te Kauring ae e na karaoaki n te Kauabong, Maati 26, ibukini kaotani kimwareirein nanora n te baere e katauraoia te Atua ibukira. (Ita. 61:10) E na buokira kimwareirein nanora bwa ti na tauraoi raoi nakon te Kauring ae imwaira. N te aro raa?
2. Tera ae kairira bwa ti na katauraoi ibukin te Kauring?
2 Katauraoiko Ibukin te Kauring: Moanibaan te kakawaki Ana Katairiki te Uea ao bon te botaki ae bebete karaoana. E ngae n anne, e kainnanoaki te moantaai ni babaire bwa a aonga n aki tarariaoaki baika kakawaki. (TaeRab. 21:5) E riai ni baireaki te tai ao n rineaki te tabo ae tau. A riai ni katauraoaki banna ni kauring. E riai ni kaitiakaki ao ni katauraoaki te tabo ni botaki. E riai ni katauraoi raoi te tia kabwarabwara are e rineaki, ao a riai ni mataata taan ibuobuoki n taiani kaetieti. Akea te nanououa bwa a bati baika a a tia ni katauraoaki ibukin te botaki aei. Ti kairaki n ara kakaitau ibukin te karea ni kaboomwi, bwa ti na katauraoi raoi ibukin te botaki ae tabu aei.—1 Bet. 1:8, 9.
3. Ti na kanga ni katauraoi nanora nakon Ana Katairiki te Uea?
3 Katauraoa Nanom: E rangi ni kakawaki naba katauraoan nanora bwa ti aonga n ataa kakawakin te Kauring. (Etira 7:10) Ni kakororaoan anne, ti riai ni kamwaawa ara tai n rinanoa te wareware n te Baibara ae okoro ibukin te Kauring, ao ni kananoi ara iango ni kabaneani bongini maiun Iesu i aon te aba. Ngkana ti kananoi ara iango i aon aron Iesu ni kan anga ngaia, ti a kairaki iai bwa ti na kakairi irouna.—IKar. 2:20.
4. Tera te kakabwaia man te kaboomwi ae karekea nakoim te kimwareirei ae korakora?
4 E kakoauaaki ni mateni Kristo riain Iehova n tautaeka. E karekea te kainaomataaki man te bure ao te mate. (1Ioa. 2:2) E kauka te kawai ibukini karekean te iraorao ae rau ma Iehova ao te kawai nakon te maiu are aki toki. (IKoro. 1:21, 22) E buokira naba ni kakorakoraa ara motinnano bwa ti na maiuakina nanon ara katabu nakon Iehova, ao n teimatoa n nene bwa taan rimwini Kristo. (Mat. 16:24) E bia rikirake kimwareireim ngkai ko katauraoiko nakoni kaean te Kauring ae imwaira!