Aroni Kabonganaan te Boroutia ae Antai Aika A Kakaraoa Nanon Iehova ni Boong Aikai?
Te Boroutia ae Boou ae Katauraoaki Ibukini Kairaia Aomata Aika Reirei n te Baibara, Nakon Ana Botaki Iehova
1. Baikara bukina aika tenua ae katauraoaki iai te boroutia ae Antai Aika A Kakaraoa Nanon Iehova?
1 Ko a tia ni moana kabonganaan te boroutia ae Antai Aika A Kakaraoa Nanon Iehova ni Boong Aikai? E katauraoaki te boroutia aei ibukin: (1) buokaia aika ti reirei ma ngaiia n te Baibara bwa a na kinaia raoi Ana Tia Kakoaua Iehova, (2) buokaia bwa a na atai baika ti kakaraoi, ao (3) kaotan aroni waakin ara botaki. Tii teuana te reirei n iteranibaan nako te boroutia ae Antai Aika A Kakaraoa Nanon Iehova, are e kai rinanoaki i nanon tii nimaua nakon tebwina te miniti ni katoaa banen ara reirei.
2. Kabwarabwaraa kanoan te boroutia aei ao aroni katauraoana.
2 Aroni Katauraoana: E tibwaaki kanoan te boroutia aei n tenua te mwakoro, ae maroroakini baika kakaokoro ibukin ana botaki Iehova n aron ae kaotaki i eta. A koreaki bwa taian titiraki atun reirei nako aika 28, ao a oti kaekaan titiraki akanne n atun reirei aika uarereke ni koroboki aika turu. A karekeaki man aaba aika e raka i aon 50 mwaitiia, taamnei aika a karinanaki n iteranibaana nako aika a kaota aron raababan ara mwakuri ni katobibia te aonnaba. A mwaiti reirei n taiani bwaoki ae “Ukeuke Riki” aika a reke iai iango tabeua aika ko kona ni kaungaa te aomata ae ko reirei ma ngaia n te Baibara, bwa e na iri nanoia.
3. Ti na kanga ni kabongana te boroutia ae Antai Aika A Kakaraoa Nanon Iehova?
3 Arom ni Kabongana: Moana am maroro ni kaota te titiraki ae atun te reirei. Imwina ngkana kam wareka te reirei ni kabane, ao kamataatai atun reirei aika uarereke aika turu. Ni kabanean am reirei, rinanoi titiraki ni kauring aika mena mai nano n te iteraniba. Ko kona ni wareka te reirei ni kabane ke ni wareka ao ni maroroakina te barakirabe teuana imwin teuana. Bwaina te wanawana n rineani kiibu aika a na warekaki. Tai mwaninga n rinanoi taamnei ao taiani bwaoki ae “Ukeuke Riki.” N angiin te tai, a riai ni maroroakinaki reirei ni kabane n aroni karinanakia. Ma ko kona moa ni maroroakina te reirei are e kan ongoraeia am aomata. N te katoto, ko kona ni maroroakina reirei 11 ngkana e a kaan te runga ke te bwabwaro.
4. Bukin tera ngkai ko kukurei ni karekea te bwai ni mwakuri ae boou aei?
4 Ngkana iai ae ti reirei ma ngaia n te Baibara, ti a buokia bwa e na kinaa raoi Tamara are i karawa. Ma ti riai naba n reiakinna taekan ana botaki Iehova. (TaeRab. 6:20) Ai kukureira ngaira ngkai ti a karekea te bwai ni mwakuri ae boou aei, ae bebete iai aroni karaoan anne!