Taari Mwaane Aika Rooro n Rikirake, Kam Kakorakoraingkami n Uaiakin Tiia?
1. N ningai ae e riai te tari te mwaane ae te roro n rikirake ni moana maiuakinan te kairiri ae kuneaki n 1 Timoteo 3:1?
1 “Ngkana iai te aomata ae [uaiakina te tia teuana] . . . , ao e tangira te mwakuri ae raoiroi.” (1Tim. 3:1) Taeka aika kairaki koreaia aikai, e kaungaia taari mwaane bwa a na uaiakina tiaia ae a na katauaki iai nakoni mwioko n te ekaretia. Ko riai n ikawai ibukini karaoan anne? Ni koauana, e raoiroi riki bwa ko na moana uaiakinan tiia ngkana te roro n rikirake ngkoe. N te aro anne, ko kona ni karekea reireiam ao ni kaotia bwa ko tau ni mwiokoaki ke ko aki bwa te tabonibai n te ekaretia ngkana ko a ikawai. (1Tim. 3:10) Ngkana te tari te mwaane ngkoe ae te roro n rikirake ae ko a tia ni bwabetitoaki, ko na kanga n uaiakin tiia?
2. E na kanga ni karikirakeaki ao ni kaotiotaki te nano ni kan anga boni ngkoe?
2 Aanga Boni Ngkoe: Uringnga ae ko uaiakin tiia ibukin te mwakuri ae raoiroi, ma tiaki te nakoa. Mangaia are karikirakea te nano ni kani buokiia tarim ao mwaanem n te onimaki. Te anga teuana ni karaoan anne boni kananoan am iango n ana katoto ae raoiroi Iesu. (Mat. 20:28; Ioa. 4:6, 7; 13:4, 5) Butiia Iehova bwa e na buokiko bwa ko na tabeakinia tabemwaang. (1Kor. 10:24) Ko kona n anga te ibuobuoki ae manena nakoia te koraki ake a a kara ke a mwauku n te ekaretia? Ko tauraoi n ibuobuoki ni koro uteute, n iaaki, ke ni karaoi mwakuri tabeua ibukini kateimatoaan taraaraoin te Tabo n Taromauri? Ko anganano bwa ko na onomwi ibukin te wareware ao te kabwarabwara n te Kuura ni Kataneiai Ibukia Taan Uarongorongo? Ane ko na karekea te kimwareirei ngkana ko buokiia tabemwaang.—Mwa. 20:35.
3. Tera kakawakin am iraorao ma Iehova, ao ko na kanga ni karikirakea?
3 Am Iraorao ma Iehova: E rangi ni kakawaki iroun te tabonibai n te ekaretia bwa e na karekea ana iraorao ma Iehova, nakon ae e na karekea ana tarena ke ana konabwai ae okoro. E kataia te aomata ae kairaki n te taamnei, n iangoi bwaai n aron iangoaia iroun Iehova ao Iesu. (1Kor. 2:15, 16) E kaotiota “uaan te taamnei.” (IKar. 5:22, 23) Te tia tataekina te euangkerio ngaia ae ingainga nanona, ae e moanibwaia te Tautaeka n Uea. (Mat. 6:33) Ko kona ni karikirakei aroaro ni Kristian man am babaire ae nakoraoi n te ukeuke n reirei i bon iroum. E irekereke aei ma warekan te Baibara ni katoabong, warekan Te Taua-n-Tantani ao te Awake! ae katoa namwakaina, ao te katauraoi nakoni bobotaki n te ekaretia ao ni kaei naba. (TaiAre. 1:1, 2; Ebera 10:24, 25) E korea ae kangai Bauro ni kaungaa Timoteo ngke te roro n rikirake bwa e na rikirake n ikawai n te onimaki: “Teimatoa n tarataraa raoi . . . aron am angareirei.” (1Tim. 4:15, 16) Mangaia are katauraoa raoi am wareware ao am kabwarabwara ae ko mwiokoaki iai n te Kuura ni Kataneiai Ibukia Taan Uarongorongo. Katauraoi ibukin te mwakuri ni minita ao uataboa karaoana n taai nako. Katei tiam n te onimaki ao mwakuria, n aron te bwaiania, te mwakuri n te Betaera, ke kaean te Kuura n Reirei n te Baibara Ibukia Taari Mwaane Aika Akea Buuia. E na buokiko am iraorao ma Iehova ni “birinako mani baike a bwabwarui rooro n rikirake.”—2Tim. 2:22.
4. Tera kakawakin te onimakinaki ao te kakaonimaki?
4 Onimakinaki ao Kakaonimaki: Bon akea aia nanououa abotoro ibukini karaoan te mwakuri irouia taari mwaane “aika tau” ni mwiokoaki ibukin tibwaan te amwarake nakoia Kristian ake a kainnano n te moan tienture, kioina ngke a bon ataaki raoi bwa a onimakinaki ao a kakaonimaki. A a kairaki iai abotoro bwa a na kaatuua aia iango i aoni baika a kakawaki riki. (Mwa. 6:1-4) Mangaia are ngkana ko anganaki mwiokoam n te ekaretia, karaoia n aron am kabanea ni kona. Kakairi iroun Noa are e tou raoi mwini kaetieti ake e anganaki ibukini kabaan te aake. (KBwaai 6:22) E kakawaki iroun Iehova te kakaonimaki ao e kaotaki naba iai te ikawai n te onimaki.—1Kor. 4:2; nora te bwaoki ae atunaki ni “Kakabwaia Aika Reke Man te Kataneiai.”
5. Bukin tera bwa a riai n uaiakin tiia taari mwaane aika rooro n rikirake?
5 N aron ae taetae ni burabetinaki, bon Iehova ae e na kawaekoaa te mwakuri ibukin ikoikotaia aomata. (Ita. 60:22) E katautauaki bwa teuana te kaamwakoro mai buakoia mirion ma mirion aomata aika a bwabetitoaki ni katoa ririki. Kioina ngkai a bati aika boou ae e a tibwa reke irouia te koaua, a kainnanoaki mwaane aika Kristian aika tau ibukini karaoani mwioko n te ekaretia. E a rangi ni bati riki ngkai nakon are mai mwaina, te mwakuri ae e na karaoaki n te beku ibukin Iehova. (1Kor. 15:58) Taari mwaane aika rooro n rikirake, kam kakorakoraingkami n uaiakin tiia? Ngkana ngaia anne, ao kam bon tangira te mwakuri ae raoiroi!
[Kabwarabwaraan te taamnei n iteraniba 2]
Kioina ngkai a bati aika boou ae e a tibwa reke irouia te koaua, a kainnanoaki mwaane aika Kristian aika tau ibukini karaoani mwioko n te ekaretia
[Te Bwaoki n te iteraniba 3]
Kakabwaia Aika Reke Man te Kataneiai
A kakabwaiaaki taari mwaane aika rooro n rikirake aika tau, ngkana a anganaki mwiokoaia irouia unimwaanen te ekaretia ao ni kataneiaaki iai. Imwin te taromauri, ao e tekateka i aon te kaintekateka n te tabo ni kabwarabwara te mataniwi n te aono ae uarereke ni kaungaa te tia uarongorongo temanna. E nora te teinimwaane ae uarereke n tei n uakaan ma ngaiia, ai ngaia are e a titirakinna bwa iai ana rongorongo ae e na tuangnga ngkai e a tei n tataningaia. E kaeka te teinimwaane ae uarereke aei bwa e mwiokoaki ni kaitiaka te tabo ni kabwarabwara imwini bobotaki nako. A nang oki rikaaki ana karo, ma e aki ngaia kani moantaai n oki ngkai e tuai karaoa mwiokoana. E kukurei ni kamwaawa te tabo anne te mataniwi n te aono ae uarereke. E taku te mataniwi anne: “A tatauraoi unimwaanen te ekaretia anne ni kataneiaia taari mwaane aika rooro n rikirake aika tau, n angania mwiokoaia n te ekaretia. N tokina, bon anne te bwai ae riki ngke I kawara te ekaretia anne, bwa akea aia kangaanga unimwaane ni mwiokoia taari mwaane aika rooro n rikirake bwa tabonibai n te ekaretia.”