Ko Kona ni Karababaa Nako Am Kakao?

Iai taan uarongorongo n ekaretia aika bati, ake a kona ni karaoa te mwakuri ni minita n te aro ae uarereke ibukin aorakia ae wenemaan ke rikirakeia ni kara. (2 Kor. 4:16) Ko kona ni kaoa temanna ae rotaki ni kangaanga akanne bwa e na katoako ni kawara te aomata ae ko reirei ma ngaia n te Baibara? Ngkana e aki kona ni kitana mwengana te tia uarongorongo, tao ko kona ni kaira te reirei n te Baibara ni mwengana. Ko kona ni karaoi babaire n tabetai bwa ko na airi ma te tia uarongorongo ae uarereke korakorana, ni karaoa te mwakuri ni minita ma ngaia ni kawari auti tabeua man te auti teuana ma teuana ke ni manga okiriia aomata tao temanna ke uoman? A bati taan uarongorongo ake a a kara ae a rangi ni mwaatai n te mwakuri ni minita. Mangaia are a na aki tii kaungaaki n am kakorakora ni karaoa anne, ma ko na boni kakabwaiaaki naba iai. (IRom 1:12) Irarikin anne, e na kakabwaiaaki iroun Iehova am kakorakora ni kaotiota te tangira n te aro aei.​—TaeRab. 19:17; 1Ioa. 3:17, 18.