Karekea Reireiam Mairouia Taan Uarongorongo Aika Mwaatai Riki

A rangi ni kakawaki iroura taan uarongorongo aika mwaatai n te ekaretia. A tia tabeman ni kakaonimaki ni beku iroun Iehova i nanon ririki aika bati. Tabeman, a tia ni karikirakei riki rabakauia n te uarongorongo ni boong aikai. A tia taan uarongorongo aikai n nora aron Iesu ni kaira te ekaretia ni Kristian ni kabanean boong aikai, ni karababaa nako te uarongorongo ao karekeaia taan rimwina. (Mt. 28:19, 20) A karekea “te korakora ae riaoni korakoraia aomata” ngkana a kaaitarai oin aia kangaanga ao kataakia, ngke a boutokaa te mwakuri aei. (2 Kor. 4:7) E reke te reirei ae bati mairouia taan uarongorongo aika mwaatai aikai. A karekea te kimwareirei ngkana a manga reiakinia tabemwaang baike a tia n reiakin. (TA. 71:18) Ngaia are, ti riai ni karekei aanga ake ti na reiakinaki mairouia. E na kangaa ni karaoaki anne?

N te Mwakuri ni Minita. Ngkana e na uaana te mwakuri ni minita, e kainnanoaki te reirei ni kataneiai nakoia taan uarongorongo aika boou ke aika aki rangi ni mwaatai. E reke te reirei ae bati man norakia taan uarongorongo aika mwaatai ni karaoa aia mwakuri ni minita. (Nora te kaongora n te Taua-n-Tantani bwain Beberuare 15, 2015, “Kateimatoa Ingaingam n te Mwakuri ni Minita” n te katenua ni barakirabe i aan te atu ae “Buokiia Aika Aki Rangi ni Mwaatai.”) Ko kangaa n tia ni kakabwaiaaki mani karaoan te mwakuri ni minita ma aeka n aomata akanne?

Ko kani kaoa te tia uarongorongo ae mwaatai riki bwa e na toa ma ngkoe n te mwakuri ni minita? Ngkana e aki konamaki te tia uarongorongo anne, tao ko kona ni kaira te reirei n te Baibara ma am aomata temanna ni mwengana. Imwin te reirei, ongora ana iango te tia uarongorongo anne ibukin arom n angareirei ao ana taeka n reirei.

Karekea Am Tai ma Ngaiia: Karekea am tai ma taan uarongorongo aika mwaatai bwa ko aonga ni mwaatai naba. Kaoa temanna nakon am taromauri n utu ao maroro ma ngaia. Ngkana e aki konamaki te tia uarongorongo, e kona ni karaoaki te taromauri n utu ae kakukurei ni mwengana? Ongora arona ni karekea te koaua. Baikara kakabwaia ake e a tia n rinanoi? Tera te rikirake ae e a tia n noria n ana ekaretia? Tera te kimwareirei ae e karekea n ana beku ibukin Iehova?

Ti riai n ota ao ni butimwaei baike a kona ni buokira iai. N ai arora naba, a kakaokoro nako bwaintituaraoi n te mwakuri ni minita irouia taan uarongorongo aika maan n te onimaki. (Ro. 12:6-8) Iai tabeman aika a kara, ao aei are e aki bati aia tai iai ma ngaira. Ma, a kona n reke reireiara aika bati, ibukin aroia ni beku ma te kakaonimaki nakon Iehova.