Te Atu n Reirei ae Ibuobuoki n Ara Mwakuri ni Minita
1. Baikara tiia aika uoua n te kaongora ae “Te Maroro ma te Aomata Temanna”?
1 N te tai teuana ma teuana, ao e kaotaki n Te Taua-n-Tantani ae te maekatin ibukia aomata nako, te atu n reirei ae “Te Maroro ma te Aomata Temanna.” Iai tiia aika uoua n te kaongora aei, bwa e kaota nakoira aroni kairan te reirei n te Baibara n te aro ae anainano, ao arora ni kona ni kabwarabwaraa te reirei teuana ma teuana n te aro ae ti na aki iai kaunia aomata. (1 Bet. 3:15) Ti na kanga ni kamanenai raoi kaongora aikai?
2. Ti na kanga ni kamanena te atu n reirei aei n ara mwakuri ni minita?
2 Kamanenai n te Mwakuri ni Minita: Ko kona ni kawakin tabeua katoton Te Taua-n-Tantani ae kaotaki iai te kaongora n te atu n reirei aei. Ngkana e tabeka te titiraki kaain te auti, te aomata ae kan ongora ke te aomata ae reirei n te Baibara, ke e taekina te taeka n totoko ae e a tia ni maroroakinaki n te kaongora teuana mai buakoni kaongora aikai, anganna katoton te kaongora anne ao maroroakinna ma ngaia. Ngkana akea iroum katoton te maekatin ae kaotaki iai te kaongora ae ko kainnanoia, ko kona n download man te atureti ae jw.org.
3. Ti na kanga ni maroro ma kaain te auti i aon teuana mai buakoni kaongora n te atu n reirei aei?
3 Ko na kanga ni maroro ma temanna i aon teuana mai buakoni kaongora aikai? Tabeman a tuanga te aomata bwa e na kabaibati ni wareka ana taeka te aomata are tiaki te tia kakoaua, ao ngaiia a wareka ana taeka te tia Kakoaua. E kona n ibuobuoki maroroakinani kanoan te maekatin, bwa e reke iai ana tai te aomata n nenera ara koaua n akea ana kauntaeka.—TuaKau. 32:2.
4. Ti na kanga ni kamanenai kaongora n te atu n reirei aei ni kataneiaira iai?
4 Kataneiako ao Kataneiaia Naba Tabemwaang: Ngkana ko wareki ni kabane kanoani kaongora aikai, korei kiibu iai, kaikonaki ao reirei aika kakawaki iai. Nora tein te kaongora, ao imwina kataa te aeka ni maroro anne n am mwakuri ni minita. (TaeRab. 1:5; 9:9) E taekina ae kangai temanna te tari te aine, “Warekani kaongora aikai, ai aron ae ko karekea iai reireiam mairoun te bwaiania ‘ae mwaatai’ ae e atai n taai nako baika a riai n taekinaki!”
5. Ti na kanga ni buokiia aomata aika ti reirei ma ngaiia n te Baibara, bwa a na katauraoiia ibukin te mwakuri ni minita?
5 Ko kona naba ni kamanenai katoto aika a a kamani katauraoaki aikai, ni buokiia iai aomata aika ko reirei ma ngaiia n te Baibara bwa a na katauraoiia ibukin te mwakuri ni minita. Wareka te kaongora ma ngaia, ao tuangnga bwa e na wareka te baere e na karaoia te tia uarongorongo. N te aro aei, a kona iai aomata aika reirei n te Baibara ni kataneiaia ni kaotiota aia koaua n te aro ae riai. (IKoro. 4:6) Ni koauana, kaongora aikai bon teuana mai buakon ana aanga aika bati Iehova ake ti buokaki iai ni “kakororaoa raoi” ara mwakuri ni minita.—2 Tim. 4:5.