Rongorongo

◼ Aotiteria: Tiaon bon te mwaane ae bubura ana reirei are e kaakaea te taromauri n ana Aro ngke e uarereke, ma e a manga riki bwa “te aomata ae kakewea ae iai te Atua.” E angan teuaei te boroutia ae Was Life Created? te bwaiania temanna, ao imwini kakawarana e a manga anganna te boroutia ae te Origin of Life. E teimatoa te bwaiania aei ni karikirakea kan ongoran teuaei n uouotii nakoina maekatin aika boou, ao e kaotii kaongora tabeua ibukin te karikibwai ke te taetae ni burabeti man te Baibara. Ngke e a iangoia te bwaiania aei bwa e a tauraoi Tiaon n reirei n te Baibara, e a anganna te boki ae The Bible​—God’s Word or Man’s? Imwini warekan te boki anne iroun Tiaon, e a kabwarabwaraa nakon te bwaiania anne anuana ae e “kakewea ae iai te Atua.” E a kaota ngkanne te boki ae Ana Reirei te Baibara te bwaiania aei nakon Tiaon ao ni kaota nakoina barakirabe 8 n iteraniba 20, ao barakirabe 13-16 n iteraniba 23-24. E rangi n anaaki nanon Tiaon ni kiibu aika kaotaki n te kaongora ao e taku, “Tao I riai ni karekea riki au tai n reiakina te Baibara.”

◼ Mexico: E tuanga te tia uarongorongo, temanna te mwaane bwa e aki kakoauaa ae kairaki korean te Baibara iroun te Atua. E kukurei te tia uarongorongo aei ni kaota nakon teuanne kakoauaan ae e kairaki korean te Baibara iroun te taamnei. Imwin te maroro teutana, ao e a rotaki nanon te mwaane aei n te baere e reiakinna man te Baibara. E bon rangi n anaaki nanona n reiakinan ana kaetieti te Atua. E tuanga te tia uarongorongo ni kangai: “N te moantai ngke I kaai ni wareka te Baibara ma ngkoe, ao irou titeboo kanoana ma te taeka n reirei man te boki teuana ao bon akea rotakin nanou iai. Ma ngkai ti a warekia, ao e kaineti raoi te reirei ni kairiri iai ma te aroaro ni maiu ae riai, ao e rawawata nanou iai.”

◼ United States: N uataboan te mwakuri n uarongorongo ae okoro n te aono ae bubura irouia te taanga teuana, ao a kaitiboo ma te aine ae kaain Taiwan are e kakoauaa te Atua, ma e iangoia bwa te Baibara bon tii ibukia kaain Amerika ao te aono n Eurobe. E kawara aia taibora te taanga aei neiei are a katokaaki i aona maekatin ao booki bwa a na noraki irouia aomata, ibukini minotakin ana iango e ngae naba ngke e maiu ni kaubwai. E kantaningaia bwa e na reke buokana man te Baibara ibukini karekean te maiu ae manena. A moana te reirei n te Baibara te taanga aei ma neiei ni kabongana te boki ae Ana Reirei te Baibara, n ikotaki naba ma te boroutia ae Lasting Peace and Happiness​—How to Find Them. N oneani mwin are a na reirei ni mwakoro 2 n te boki ae Ana Reirei te Baibara, a maroroakina mwakoron te boroutia i aan te atu ae “A Guidebook for the Blessing of All Mankind.” Imwin rinanoani moani barakirabe aika onoua n te mwakoro anne, e a kaota miimiina neiei bwa e rangi ni kaokoro te Baibara ni kabotauaki ma bokin Aaro riki tabeua. Imwin rinanoan taetae ni burabeti man te Baibara ake a a tia ni kakoroaki bukia, ao e taku neiei, “Bon akea riki te boki teuana i rarikin te Baibara ae e eti kanoana ae I kona n iangoia.”

◼ Tiaban: E ngae ngke e tuanga te tia uarongorongo kaain te auti bwa e aki kakoauaa te Atua, ma e teimatoa te tia uarongorongo ni kakawara teuaei ao n tibwaa te kaongora ae “Was It Designed? man te Awake! Teutana imwin teutana, e a bita ana iango teuaei ao e a taekinna bwa tao bon iai te Tia Karikiriki. E a kakoauaa ngkai bwa bon iai te Atua, ao e a reirei ma ngaia n te Baibara te tia uarongorongo aei ni kabongana te boroutia ae Te Rongorongo ae Raoiroi Mairoun te Atua!

◼ Kanata: E angan te aine temanna te maekatin ae boou te tari te aine ngke e otinako neierei man ana auti ao e nakon ana kaa. Ngke e a manga oki imwina te tari te aine anne, e a motinnanoia te aine are kaain te auti bwa e na tuanga te tari te aine aei bwa e aki kan ongora ao e aki naba kakoauaa te Atua. E baireia te tari te aine aei bwa e na aki bwarannano, ma e na anganna te boroutia ae A Satisfying Life​—How to Attain It. Ngke e kaitiboo te tari te aine aei ma neiei ni mwengana, e a tuangnga bwa e ngae ngke e ataa neiei bwa e aki kakoauaa te Atua, ma e teimatoa te tari te aine aei n iaiangoa neiei ibukina bwa e ataia bwa te tina ae akea buuna. E kaota nakoina barakirabe 6 n iteraniba 4 n te boroutia, ae maroroakinaki iai aroni karekean te taeka n reirei ae ibuobuoki. Imwina, e kaungaa neiei bwa e na wareka te reirei n ibuobuoki n reirei 2 ni kaineti ma kaikawaaia naati. E rangi ni kukurei neiei ni butimwaea te boroutia.