Kamanenai Raoi Maekatin Aika Maan Taia

Kioina ngkai a aki kona ni kakabwaiaaki aomata ngkana a kawakinaki ke ni karenakoaki maekatin aika maan taia, ti riai ngkanne ni kataia n tibwainako. E kona n anaaki nanon te aomata nakon te koaua man te maekatin teuana ao ni kairia bwa e na taboa aran Iehova. (IRom 10:13, 14) A kaotaki i nano aanga tabeua ibukini kamanenaan raoi maekatin aika maan taia.

• Ngkana ko uarongorongo n aono aika aki kakawaraki n angiin te tai, tao ko kona ni katuka teuana te maekatin n auti ake a nakonako kaaia.

• Ngkana ko karaoa te mwakuri ni minita n ana tabo te botannaomata are a tataninga iai aomata n aroni kai ni bwati ke matabaiawa, tuangia ngkana a tangira aia boki ni wareware ao kaotii nakoia tabeua maekatin aika maan taia ao kariaia bwa a na bon rineia.

• Ngkana ko kawara te onnaoraki ke taabo n aron akanne ake a mena n aonon am ekaretia, katikui maekatin tabeua iai n taabo n tataninga. E rangi n tamaroa ngkana ko karekea moa te kariaia n taai nako mairoun te aomata are e taraa te tabo anne. Ngkana ko noria bwa iai maekatin imwaim, e na raoiroi riki ngkana ko aki katikui ni kauataoi ikanne.

• Ngkana ko katauraoi ibukini manga okiraia aomata, rinanoi baike a kan ongoraei aomata nako ake ko iangoia bwa ko na okiriia. Iai ana utu? E tatangiria ni mwamwananga nako? E tatangira te ununiki? Nori maekatin aika maan taia ni kakaaei kaongora iai aika tao a kukurei ni warekia ao ni kaotia nakoia ni manga okiraia.

• Ngkana e memena imwaim ni mwengana te aomata ane e kukurei n ongora anne imwin okiokirana ao kaotii nakoina maekatin aika maan taia ake e tuai ni karekei.