Kabonganai Raoi Ami Tai n te Mwakuri ni Minita
A kabanea te aoa ae 1,945,487,604 Ana Tia Kakoaua Iehova n te mwakuri ni minita n te ririki ni mwakuri ae 2014, bwa te bwai ni kakoaua ibukini motinnanoan ae ti katabetabeira ni beku ibukin Iehova! (TA. 110:3; 1 Ko. 15:58) Kioina ngkai “e a kimototo te tai,” ti kona ni kabonganai raoi ara tai n te mwakuri ni minita n roko irouia aika bati riki?—1 Ko. 7:29.
E kainnanoaki te kabaeranti raoi ngkana ti na kabonganai raoi ara tai n te mwakuri ni minita. N te katoto, ngkana ko kakabanea teuana te aoa iai ke i aona riki n te anga ae kaokoro n aki taetae nakon temanna, ko kona ni karaoi bitaki ibukini kakaaeaia riki tabeman ao n taetae nakoia? A kakaokoro baika riiriki n te tabo teuana ma teuana. Ma a kona aanga aikai ni buokiko ni kabongana raoi am tai bwa ko aonga n aki “orea te ea.”—1 Ko. 9:26.
Te Uarongorongo Man te Auti Teuana ma Teuana: N ririki aika bati ao a tataneiai taan uarongorongo ni moana aia mwakuri ni minita man te auti teuana ma teuana. Ma kioina ngkai a bati aika mwakuri n te ngaina, e aera ko aki uarongorongo n te bwakantaai, ke n te moan tairiki ngkai a bati aika a motirawa ao ni mena n aia auti? E uaana riki te uarongorongo n te ngaina, i nanoni kawai ke n taabo ni bitineti.
Te Uarongorongo n Ana Tabo te Botannaomata: A riai ni kateaki taibora ao baika kokokaki n taabo aika e bati iai te ririaki irouia aomata, n ana aono te ekaretia. (Nora Ara Mwakuri ni Minita ae bwain Turai 2013, i. 4.) Ngkana a aki bati aika a ririaki n te tabo are e baireaki ibukin te uarongorongo ibukia aomata, e kona te Komete Ibukin te Mwakuri n te Ekaretia ni bairea te aono ae a na kaakaki iai baikanne n te tabo are e korakora riki iai te nakonako.
Manga Okiraia Aomata ao Reiakinaia n te Baibara: Ko kona ni bairea manga okiraia aomata ao reiakinaia n te Baibara, ngkana a aki uaana iteran nako te mwakuri ni minita? N te katoto, ngkana e uaana te uarongorongo man te auti teuana ma teuana n ingabongin te Kaonobong, e aera ko aki waakina am reirei n te Baibara imwin te tawanou ke n te moan tairiki? A kona taan uarongorongo ni bairea manga okiraia naake a reirei n te Baibara n te tabo are a kaai ni mena iai n te tai are a baireia, bwa e aonga n uaana riki aia mwakuri ni minita?
Ngkai e kakoauaaki bwa ti kona n taua mwin ara tai ngkana ti uarongorongo, e a rikirake riki iai kimwareireira ngkana e uaana ara mwakuri. Ngkana ko noria bwa e aki uaana iteran te mwakuri ni minita are ko karaoia n te tai ae okoro, manga kataa te anga riki teuana. Tataro nakon Iehova ae “Mataniwin te tai” ibukin ana ibuobuoki, bwa ko aonga ni kabongana raoi am tai n te mwakuri ni minita!—Mt. 9:38.