Kauring Ibukin te Bwabwaro
Tain te Botaki: E na uki mataroan te tabo ni bwabwaro n 8:00 n te ingabong. E na moanaki te katangitang ni boong aika tenua n 9:20 n te ingabong. N te tai anne, ti riai ni kaei ara tabo n tekateka bwa e aonga ni waakinaki te kaetieti n te aro ae riai. E na karaoaki te kabanea n anene ao n tataro n 4:55 ni bwakantaain te Kanimabong ma te Kaonobong, ao n 3:45 ni bwakantaain te Taabati.
‘Karaoiroa Iehova n te Anene’: E aki toki ni karaoiroaki Iehova n te anene irouia ana aomata rimoa, ao e teimatoa ni kakawaki ngkai bon iteran te taromauri ae koaua. (TA. 28:7, BG) E moanaki te katangitang tabeua te miniti ni katoaa te tai are e na waakinaki iai kaetietin te bwabwaro n aono. Tiaki tii ibukin te ongongora, ma a katauraoaki bwa ti na reiakina iai taekan Iehova ao n taromauria. Ni koauana, ngkana e katanoata te tia babaire bwa e nang moanaki te katangitang tabeua te miniti, ti riai n tekateka ao n ongoraei. Karaoan anne iroura, ti kaotia iai bwa e kakawaki aia kakorakora kaain te kuaea man te Watchtower, ake a katangi bwaai ni katangitang aika kakaokoro. Ni katoa uoua te ririki, a kawara Patterson i New York taari mwaane ao aine aikai n oin aia kabanemwane, bwa a na karaoi kuuna aika tangiraoi ibukira. Imwin ongoraean kuuna ake a katangaki tabeua te miniti, a riai ni bane kaain te botaki ni karaoiroa Iehova, n anenei kuuna ibukin te Tautaeka n Uea.
Nneni Baao ni Mwamwananga: N taabo ake a karaoaki iai bwabwaro, ao ti anganaki te kariaia ibukin nneni baao ni mwamwananga. Bon akea boon taabo akanne, ao e riai ni kaonaki irouia naake a moan roko. E riai ni baireaki raoi nneni baao ake a uotaki, kioina ngkai e aki tau te tabo ibukia ni kabane. Bon tii baoia mwauku ake a kanikinaeaki, aika kariaiakaki n tei n taabo aikai.
Tauan Taabo n Tekateka: Ngkana e kaukaki mataroan te tabo ni bwabwaro ni katoa ingabong, taiaoka tai kawaekoako ni kaei taabo n tekateka, kangaa aron ae ko a kuri ma naake a roko naba. Taiaoka n iaiangoia tabemwaang, tao n angania tarira ara tabo n tekateka ake ti taui. E kaotaki n nanora n anga boni ngaira bwa boni Kristian ni koaua, ao a kona taani mataku n neboa iai te Atua. (Io. 13:34, 35; 1Kor. 13:5; 1 Bet. 2:12) A riai n tauaki taabo n tekateka tii ibukia naake a iri ma ngkoe n te bao ae ti teuana, a maeka ma ngkoe, ke ae ko reirei ma ngaia n te Baibara. Taiaoka tai katukui bwaai n taabo n tekateka aika ko na aki kabonganai. Am ibuobuoki i aon aio, e na buokiia tabemwaang n noria ae a mwaawa taabo akanne. A katauraoaki naba taabo ibukia kaara ke aika a aki konamaki. Kioina ngkai e aki tau mwaitina, e riai temanna ke uoman ake a buoka teuare ke neiere e a kara ke e aki konamaki n tekateka irarikina.
Kunnikai Aika Taraaraoi: A riai n tau ao n taraaraoi kunnikaira n tain te bwabwaro, are a kaokoro ma ake a bwabwaini kaain te aonnaba. (1 Tim. 2:9) Ti riai n aki kunnikainira n aki akaka ke aika aki itiaki, ngkana ti moan rin ao ni kitana te outero ao n taai naba ni motirawa imwain ao imwin te bwabwaro. Ni koauana, ti riai ni kakatonga ni bwain ara badge ni bwabwaro ao n aki maama n uarongorongo n te tai ae angaraoi. Taraakira ao arora aika raraoi ni kaeani bwabwaro aika imwaira, a na aki ti atikaki aomata aika raoiroi nanoia nakon te rongorongo ni kamaiu man te Baibara, ma e na kamoamoaaki naba iai Iehova.—Tbn. 3:17.
Kaotiota te Aroaro Ae Riai ma Bwaai ni Kukune Aika Boou: Ti kaotiota te aroaro ae riai n tain te bwabwaro, n taraakin raoi ara mobwaao ke bwaai ni kukune aika boou tabeua riki bwa a na aki uruana ongoraeia tabemwaang. Ti kani kaota te akoi, n arora n aki katabetabeia tabemwaang ke n tuki mataia ngkana ti kabongana te kai n rawetaamnei ao ae rawerawe naba, te tablet ke tabeua riki. Ti kaota naba te aroaro ae riai n arora n aki kabooi rongorongo n te mobwaao ae intanete ke ae e aki, n tain te botaki.
Katawanou: Taiaoka uota am katawanou n oneani mwin are ko na kitana te tabo ni bwabwaro ni karekea kanam. E kona ni uotaki nnen te amwarake ae uarereke ao ni kaakaki n am tabo n tekateka. A aki riai n uotaki nnen amwarake aika bubura ao aika kiraati nakon te tabo ni bwabwaro.
Bwaintangira: Ti kona ni kaota ara kakaitau n taiani babaire ibukini bwabwaro, n arora ni bwaintangira n te mwane n tain te bwabwaro ibukini boutokaan te mwakuri ni katobibia te aonnaba. E riai ni koreaki aran te “Ekaretia ni Kristian ibukia Ana Tia Kakoaua Iehova” i aoni kabwakamwane n te tieke. A kona naba ni kabwakaaki bwaintangira rinanon akaunti man te bangke.
Bwainnaoraki: Ngkana ko kainnanoa te bwainnaoraki, taiaoka uotii am bwainnaoraki kioina ngkai akea ae na tauraoi n tain te bwabwaro. A riai ni kawakinaki ni nneni maange aika boitin, kai n iiti ibukin te tioka ma wia, ao tiaki ni bwaoki ni maange n te tabo ni bwabwaro ke n te outero.
Totokoani Kabuanibwai Aika na Riki: Taraia raoi bwa a na totokoaki kabuanibwai ake a kona n reke man te marannako ke te bwaka. Ni katoa ririki, ao a aki toki n reke ikoaki mani kabonganaani kaau, riki ake a tei bukia. A riai ni bwainaki aika a bon taraaraoi, aika tau raoi n te aro bwa e na kona ni kabongana temanna n nakonako n akea ana kangaanga i aoni kawai aika karabee, a kaintamwarake, kawai aika marangaranga ao tabeua riki.
Ibukia Bonotaninga: E na katangaki kanoan te bwabwaro i aon te FM. Ko riai n uota am rerio ae baetere ae uarereke ma ana bwai ni kakauongo, bwa ko aonga n ongora kanoan te bwabwaro.
Aia Kaa Ataei ao Kaintekateka Aika Uouotaki: A riai n aki uotaki aia kaa ataei ao kaintekateka aika uouotaki nakon te tabo ni bwabwaro. Ma, a kariaiakaki ngkana iai kabaeaia ibukia ataei ao n taraaki raoi irouia kaaro.
Kaboiarara: A karaoaki angiini bwabwaro n taabo aika bono. Ngaia are, ti kaota te mwamwannano ngkana ti kauarerekei ke n aki kabonganai boiarara, tangauri, ao tibureei aika matoatoa boia, ake a na kona n aoraki iai aomata ke ni karikii riki aia kangaanga tabeua.—1Kor. 10:24.
Te Booma ae te Please Follow Up (S-43): E riai ni kabonganaaki te booma ae te Please Follow Up ibukin rongorongoia naake a kan ongora, ake a reke n te uarongorongo ae aki baireaki n tain te bwabwaro. A riai n nikiraki booma aikai, ngkana a tia ni kanoaaki nakon te Tabo ni Boki ke n angan te tia koroboki n am ekaretia n okim nakoni mwengam.
Taabo n Amwarake: Karinea aran Iehova man aroarom aika raraoi n taabo n amwarake. Oneiko n te aro ae tau ibukin te Kristian. Anga te mwane nakon te touati, ngkana e kakaraoaki n te tabo anne.
Outero:
Taiaoka n aki kabaei ruu ake e riaon ae ko na kabonganai, ao tai karokoia aomata aika bati nakon are e kariaiakaki.
Tai kamauna am ruu are ko kabaea, ma ti ngkana iai te kangaanga ae karina n riki ao moantaai kaongoa te outero n te tai naba arei, bwa a aonga ni kabongana tabeman riki. (Mt. 5:37) Ngkana ko na kamauna kabaean am ruu, ko riai ni karekea aia nambwa naake a tabe ma aei. E na aki okiriko am mwane ngkana ko kamauna kabaean te ruu n te maan ae kee i aan 48 te aoa imwaini kabonganaana.
Uringnga bwa ngkana ko kabongana am akaunti man te bangke ni kabaea iai am ruu n te outero, e bon riai te outero n taua am mwane n te bangke ni kaaitara boon am ruu, am urubwai ke kabuanibwai ake a kona n riki n tikum. Ko na aki kona ni kabongana am mwane anne ni karokoa e nakoraoi am akaunti mairouia, imwini kitanan te outero.
Anaa te kaa ae kokokaki ibukini baeki ngkana ko na kabongana, ao kaokia naba ngkekei bwa a na manga kabongana tabeman.
A anga te mwane nakoia taani mwakuri ake a buokiko n uotii am baeki, ngkana e kakaraoaki n te outero anne.
Kuuka n ruu ake a boni kariaiakaki.
Tai mwangainrang ni kabonganai amwarake, moi rannibue ke mwaitoro ake a katauraoaki ibukia iruwa n tikuia n te outero.
Kaotiota uaan te taamnei ae raoiroi ni katoatai, ngkana ko kaetieti ma taani mwakuri n te outero. A tabeakinia iruwa aika rangi ni bati ao a kakaitau n ara akoi, ara taotaonakinnano ao nanoraoira.
A riai kaaro n taraiia raoi natiia n taai nako ni menaia n te outero, ni kaintamwarakena aika buubuti, ana tiwimingbu, taabo n tekateka ibukia iruwa, taabo ni kamarurung ao a bati riki.
Taan Anganano n Ibuobuoki: A riai naake a kan anganano n ibuobuoki n reitaki ma te Koraki Ake a Butimwaea te Anganano Ibukin te Ibuobuoki n tain te bwabwaro. A kona naba ni manena ataei ake i aan 16 te ririki, n anganano ni mwakuri i aan aia kairiri aia karo, taani kawakinia ke naake a ikawai riki ake a mwiokoaki ibukia.