Kabonganaani Kanoan te Boki ae Ana Reirei te Baibara n te Aro ae Uaana
Ngkana e a ataa ana reirei ni koaua te Baibara te aomata ae ti reirei ma ngaia ao e maiuakinna, e na rikirake ao ni karikiuaa n te aro n taamnei. (TaiAre. 1:1-3) Ti kona ni buokia bwa e na rikirake mani kabonganaan raoi tabeua kanoan te boki ae Ana Reirei te Baibara aika ibuobuoki.
Titiraki Ake Mai Moa: A moanaki mwakoro ni kabane ma titiraki aika iai kaekaaia i nanon te reirei. Ko kona n anaa nanon te aomata ae ko reirei ma ngaia n tabeki titiraki aikai ni kaingaingaa nanona nakon am maroro are imwina. Ke ko kona n tuangnga bwa e na kaekai titiraki akanne ni kakimototoi. Ngkana e taekina ana iango ae kairua, ko aki riai ni kaetia n te tai naba anne. E na buokiko ana kaeka bwa ko na atai itera ake e riai ni buokaki ao ni kamatataaki riki iai.—TaeRab. 16:23; 18:13.
Bukinibaa: Ngkana e a ota te aomata are ko reirei ma ngaia ao e butimwaea te baere e taekinaki n te reirei, ko kona ni kaungaa bwa e na rinanon te bukinibaa are e irekereke ma te reirei n oin ana tai. N te reirei are imwina, ko kona ni kabanea tabeua te miniti n taraia raoi bwa e ota iai. Ma ngkana e na uaana nakoina, ko riai ni karekea tain rinanoan te bukinibaa n tain te reirei ke tii mwakorona mani warekani barakirabe ao tabekan titiraki ake ko a kamani katauraoi.
Bwaoki Ibukin te Kauring: A katauraoaki kaekaan titiraki ake mai moa n te bwaoki ibukin te kauring ni kabaneani mwakoro ni kabane. Ko kona ni kamanena te bwaoki ni kauring aei n taraia raoi bwa e ota iai te aomata are ko reirei ma ngaia ao e na kona ni kabwarabwarai iango aika kakawaki. Kaai ni kabaibati ni wareki kaeka ni kabane ake iai n ikotaki ma kiibu aika kaotaki i rarikina. Imwina, kaungaa bwa e na kabwarabwarai koauan kaeka aikai ni kiibu ake iai.—Mwa. 17:2, 3.