Aron te Tia Karikiriki ni Kaotii Ana Berita Aika Tatangira

Ni moa mani karikaia aomata ao e rereitaki ara tia Karikiriki ma aomata rinanoia anera ao burabeti. E boni baireia naba bwa a na koreaki taekan ana rongorongo ao ana berita. Ana berita te Atua aikai a boni kaineti ma maiura n taai aika na roko. Ngaia are ko na kunei ia ana berita te Atua ni boong aikai?

E koreaki ana rongorongo te Atua nakoira n te Koroboki ae Tabu. (2 Timoteo 3:16) E kangaa ni kabonganaia burabeti te Atua bwa a na korea ana rongorongo? (2 Betero 1:21) E karina ana iango te Atua n aia iango taani koroboki, ao imwina a a koreia. Ai arona naba ni boong aikai, bwa ngkana e kabongana te tia koroboki te tia bitineti ni korea ana rongorongo, ti bon taekinna naba bwa te tia bitineti ae korea te rongorongo anne. Ai aron naba te Atua, bwa e ngae ngke e kabonganaia mwaane bwa a na korea ana rongorongo, ma boni ngaia te tia Korea te Koroboki ae Tabu.

E A BUTANAKO ANA TAEKA TE ATUA

E rangi ni kakawaki ana rongorongo te Atua ngaia are e tangiriia aomata nako bwa a na wareware ao n ota iai. Ni boong aikai ao e a tauraoi ana “rongorongo ae raoiroi ae teimatoa n aki totoki . . . nakoia natannaomata nako ao baronga ao taian taetae.” (Te Kaotioti 14:⁠6) Man ana kakabwaia te Atua, e a tauraoi ngkai te Koroboki ae Tabu ae bwanin ke mwakorona n taetae aika raka i aon 3,000, ao e mwaiti riki nakoni booki aika n te aonnaba.