MAIURA NI KRISTIAN
Tangiran te Atua ao Raora n Aomata—Aroni Karikirakeana
E ngae ngke a aki kabaeaki Kristian n te Tua Rinanoni Mote ma iai uoua tuua iai aika taiani kabanea ni kakannato bwa tangiran te Atua ao raora n aomata, ae a a bane naba i aana baike e tangiria Iehova mairoura. (Mt 22:37-39) E aki kona n reke iroura n akea mwakuriana. E riai ni karikirakeaki. N te aro raa? Te anga ae kakawaki iai boni warekan te Baibara ni katoabong. Ngkana ti iaiangoi aroaron te Atua aika kakaokoro n te Baibara, ti a nora iai “tamaroan Iehova.” (TA 27:4) E a rikirake iai tangirana ao ti a kona n iango riki n arona. Ti kairaki n aei bwa ti na iaiangoi ana tua te Atua, n ikotaki ma te tua ae kaotiotan te tangira ae kaotaki iai bwa ko anga boni ngkoe ibukia tabemwaang. (Io 13:34, 35; 1Io 5:3) Aikai tenua aanga aika e na kakukurei riki iai warekan te Baibara:
Kataamneia n am iango ao karekea am iango ae riai. Iangoia bwa aongkoa iai ngkoe n te tai anne. Tera ae ko na noria, n ongo, ao n arokia? E na tera aia namakin aomata n te tai anne?
Bitii am anga. Aikai aanga tabeua: Wareware ni kabaibati, ke wareware n irira te bwanaa ae raweaki. Wareka rongorongon temanna n te Baibara ke te reirei teuana iai n oneani mwin are ko wareki mwakoro ni karinanna raoi. N te katoto, kabongana Bukinibaa A7 ke B12 n te Baibara ae Tabu—te Rairai ae te Aonnaba ae Boou ni wareka iai rongorongon Iesu. Wareka te mwakoro ni kabane are e aanaki iai te kibu ibukin te bong. Wareki bokin te Baibara ni kaineti ma taia ake a koreaki iai.
Warekia n te aro bwa ko na ota. Warekan te mwakoro teuana ni katoabong ao kananoan am iango n te aro bwa ko na ota iai, e tamaroa riki nakon are ko wareki mwakoro aika bati tii ibukina bwa e aonga ni bane te mwakoro anne. Iangoa naba te tai, te tabo, ao baika a riki n te tai anne. Nenera rongorongona ae bwanin. Kabonganai naba mwaabe ao taian toma ni kibu. Karaoa am kakaae i aon te bwai ae ko aki ota iai. Karekea am tai ni kananoa am iango, ae titeboo abwakina ma am tai ni wareware.