MAIURA NI KRISTIAN
Te Uaia n Ibuobuoki n te Uarongorongo n te Aono ae Kakaokoro Iai te Taetae
N angiin te tai, a kukurei riki aomata n ongora taekan te Tautaeka n Uea n oin aia taetae. Tao anne bukina are e a baireia Iehova ni Bentekota 33 C.E. bwa “I-Iutaia aika taatangira te Atua man aaba nako aika i aani karawa” a na ongo te rongorongo ae raoiroi n “oin [aia] taetae,” e ngae ngke a rabakau te taetae n Ebera ke ni Kuriiti. (Mwa 2:5, 8) N taai aikai n aono aika e kakaokoro iai te taetae, ekaretia ake a karaoi aia botaki n taetae aika kakaokoro e kona n iai aia mwabe n aono naba akanne. A na kangaa taan uarongorongo n ekaretia akanne n uaia n ibuobuoki ni mwakuria te aono anne ao n aki kaunia kaaina, n aroia n okioki ni karaoia?
Maroro (TNR 15:22): A riai mataniwi ibukin te mwakuri n uaia ni maroro ao ni kakaaea te anga ae tamaroa ibukia ekaretia nako ake a irekereke ma kabutan te rongorongo ae raoiroi. Ngkana e uarereke aia aono, ekaretia ake a uarongorongo n taetae riki tabeua a bae n aki tangira kawaran auti ake n aia aono aika kabongana aia taetae. Ma ngkana e aki kona ni bane aia aono ae bubura ae a kakaraoia ibukina bwa a uamaenako auti iai, a bae n tangiria bwa ko na kawari auti nako iai, ma kaongoia ngkana iai ae e kan ongora. (od 93 ¶37) Ke a kona n tuanga am ekaretia bwa e na ibuobuoki ni kakaaeia aomata aika taetae n te taetae ae kabonganaaki n aia ekaretia ao a kona ni kamwaingaki nako aan aia aono. (km 7/12 5, bwaoki) Uringnga bwa n tabetai e kona ni kakaokoro aia taetae kaain te auti ae tii teuana. E riai n iraki nanon tuan te aba ni karaoani babaire ibukini mwakurian te aono ni kabane.
Uaia n Ibuobuoki (Ebt 4:16): Ira raoi nanon te kaetieti are mairoun am mataniwi ibukin te mwakuri. Ko kaira te reirei n te Baibara ma temanna ae kaokoro ana taetae ma ae kabonganaaki n am ekaretia? E kona ni waekoa n rikirake ngkana ko angan temanna kaain te ekaretia ke te kurubu ae uakaan ae kabongana ana taetae.
Katauraoi (TNR 15:28; 16:1): Ngkana e butimwaeiko kain te auti ae kaokoro ana taetae, kabanea am kona n taekina te rongorongo ae raoiroi. Ko kona ni katauraoi n arom ni kaman atai taetae aika kakabonganaaki n am aono ao karekei n te intanete aia Baibara ao taamnei n am tablet ke n am mobwaao. Ko kona naba ni kabongana te JW Language n reiakina aron te kamauri n taetae tabeua.