Tera Reireiam ae Kona n Reke Man Taian Anene?

Iai anene tabeua aika ko tatangiri? Ao bukin tera? N am iango, a kaotaki iai baika kakaraoaki ni katoabong? Kioina ngkai e kakaokoro te boto n iango iai ao tein te katangitang, e na bae n iai te bwai ae e anaaki iai nanoia aomata nako. E ngae n anne, e bati riki manenan anene aika iai taamneia aikai nakon ae tii te bwai ni kaakibotu.

Iai reirei aika manena n taian anene aikai ake ti kona ni kamanenai ni maiura ni Kristian ao n ara mwakuri ni minita. Tabeua kuuna a boto i aon te kakairuwa, te boonnano, te iraorao, te ninikoria, te tangira, ke te onimaki. Ake tabeua bon taekan okiran Iehova, te ikabwarabure, kateimatoaan etin arora ni katoabong, ao uaiakinan tiia n te onimaki. Iai naba te anene ibukini kamanenaan te mobwaao n te aro ae riai. Baikara riki reireiam ake ko karekei man taian anene?

MATAKU N TE ANENE AE IAI TAAMNEINA AE I AONI KAWAINA N ROKO, AO KAEKAI TITIRAKI AIKAI:

• Tera te kakabwaia n te tai ae e na roko ae a iaiangoia taanga aika kara aikai?​—KB 12:3

• Ti na kangaa ni kakorakoraa onimakinan ae e boni kona Iehova ni kakoroi bukin ana berita?

• Antai aika ti na manga kaitiboo ma ngaiia n te tai ae e a kaan roko?

• A kangaa baike ti kantaningai i aan te Tautaeka n Uea ni buokira bwa ti na nanomwaaka i aani kataaki ngkai?​—⁠Ro 8:⁠25