Antai ae N na Kaoa?

Ni katoa ririki ti kakorakoraira ni kaoia aomata n ara aono bwa a na raonira n tain te Kauring. Angiina i buakoia ti bon aki kinaia. Ti riai naba ni kaoia aomata aika ti kinaia. Aomata aika anganaki aia beeba ni kakao irouia ake a boni kinaia, n angiin te tai a na bae n roko. (yb08-E 11 ¶3; 14 ¶1) Antai aika ko kona ni kaoia?

• Am koraki

• Raom ni mwakuri ke n reirei

• Kaain rarikim

• Naake ko okiokiriia ao am reirei n te Baibara ngkoa ao aika ngkai

Irarikin anne, a na kaoia unimwaane naake a aikoa iriri n te taromauri ke n te uarongorongo. Tera arom ngkana e aki maeka n am aono te aomata ae ko kinaa? Ko kona ni kakaaea te tai ao te tabo ae e na boo iai te Kauring n te tabo are e maeka iai. Nakon RONGORONGORA n ara atureti n te intanete ae jw.org, ao kotea “Te Kauring.” N am tai ni katauraoi ibukin te kauring n te ririki aei, iangoiia naake ko kona ni kaoia, ao angania aia beeba ni kakao.