A Tibwaaki Beeba ni Kakao Ibukin te Kauring ni Katobibia te Aonnaba!
1. Tera te mwakuri ae okoro ni katobibia te aonnaba are baireaki imwain te Kauring?
1 “Kakaraoa aei bwa kanuringau.” (Ruka 22:19) Ibukina bwa a ongeaba nakon ana tua Iesu aei, ao a na botaki taan taromauria Iehova ma te koraki ake a raraoi nanoia ni Maati 30, 2010 ni kauringa iai maten Iesu. E na tibwaaki nako te beeba ni kakao ae okoro aei ibukin te Kauring ni katobibia te aonnaba ni Maati 13 nakoni Maati 30.
2. Tao ti na kanga n tibwaa nako te beeba ni kakao?
2 Aroni Karaoana: Ko kona ni bon angani kaain te auti te beeba ni kakao n te aro bwa e na bon nora te taamnei are ni moani baana, ao ngkanne kangai: “N tairikini Maati 30 ao a na botaki mirion ma mirion aomata ni katobibia te aonnaba bwa a na kauringa maten Iesu. I roko bwa N na anganiko naba te beeba ni kakao ma am utu bwa kam na kaea. A rangi ni butimwaeaki naba raoraom. Taiaoka ma taraa raoi te tai ao te tabo are e na boo iai te botaki.” Ngkana e angaraoi, tao ko kona ni wareka Ruka 22:19 man te Baibara ni kaota ana tua te Baibara ni kaineti ma aei. Uringnga are ngkai e a uarereke te tai ni karaoan ara aono ni kabane, e tamaroa bwa ti na kakimototoa ara maroro.
3. Antai ae ti kona ni kaoia?
3 Ngkana e bubura ana aono am ekaretia, a kona ngkanne unimwaanen te ekaretia ni kariaia katukan te beeba ni kakao n te auti are akea kaaina ni moani kawarana iroum. Anga te maekatin irarikini kamanenaan te beeba ni kakao ngkana e angaraoi. Taraia raoi bwa ko na kaoia aomata ake ko okiokiria, aomata ake ko reirei ma ngaiia n te Baibara, am utu, kaain rarikim, ao ake ko kakaitiboo ma ngaiia.
4. E kairira ara kakaitau ibukin ana tangira Iehova ni katauraoa te kaboomwi bwa ti na karaoa tera?
4 Tauraoi ni Kabatiaa Am Ibuobuoki: E rangi n tamaroa namwakainan te Kauring ibukini kabatiaan riki ara tai ni mwakuri. Ko kona ni kaangaraoa am babaire bwa ko na auxiliary bwaiania? Iai natim ke te aomata ae ko reirei ma ngaia ae kaota rikirakena ae raoiroi ni bwain taamnei? Ngkana iai ao titirakinia unimwaane n te ekaretia bwa a na noria bwa e a tau n ira te mwakuri ae okoro aei bwa te tia uarongorongo ae e tuai ni bwabetitoaki. E kona ni kairira mataatara ao ara kakaitau ibukin ana tangira Iehova ni katauraoan te kaboomwi bwa ti na aki tii roko n te Kauring ma ti na kaoia aomata aika bati bwa a na airi naba ma ngaira.—Ioa. 3:16.