E na Moanaki ni Maati 1 te Mwakuri Ibukini Katanoataan te Kauring
1. N ningai ae ti na moana iai katanoataan te Kauring, ao bukin tera bwa e abwabwaki taini karaoana n te ririki aei?
1 N te Kanimabong, Maati 1 ao ti na moana iai karaoan te mwakuri ae kakaraoaki ni katoa ririki ae kaoaia aomata bwa a na kaea te Kauring ma ngaira. E na karaoaki te Kauring ni Maati 26, are nanona bwa e na abwabwaki teutana tain te mwakuri ibukini katanoataan te Kauring ni kabotauaki ma ririki aika nako. Aei are e na reke iai aia tai aomata aika bati ni karekea te beeba ni kakao, moamoa riki ngkana a karina ni mwaing nakon aonon te ekaretia ae bubura ana aono ae mwakuria.
2. Baikara babaire ibukin anaakini beeba ni kakao ao karaoan te aono?
2 Katauraoiko: A na baireia unimwaanen te ekaretia aroni mwakurian te aono, ao a na baireia naba bwa tao a na katukaki ke a na aki beeba ni kakao n auti ake a nakonako kaaia. Ngkana a nikirana beeba ni kakao imwini karaoan te auti teuana ma teuana n te aono, a kona ni kabonganaaki n te uarongorongo n ana tabo te botannaomata. E riai te mataniwi ibukin te mwakuri n taraia raoi bwa a na katokaaki beeba ni kakao i aon te kabwate ni boki ke maekatin ibukia taan uarongorongo bwa a na kabonganai, ma a aki riai ni kaotinakoaki beeba ni kakao ni kabane. Ti riai n tii anaa mwaitin are ti kainnanoia i nanon teuana te wiki.
3. Tera ae ti riai n ururingnga ngkana ti anganako te beeba ni kakao?
3 Tera ae Ti na Taekinna? E nakoraoi riki ngkana ti kakimototoa ara maroro, bwa ti aonga ni kawariia aomata aika bati n aron ae ti kona. Iai n iteraniba 4 aroni kabwarabwaraan te mwakuri ae kaoaia aomata nakon te Kauring, ae ti kona ni bita iai ara maroro nakoia kaain ara aono. Ni koauana, ti aki kani waekoa ni kitana te auti ngkana e momoaaomata kaaina ke iai ana titiraki. Ngkana ti tibwai beeba ni kakao n te wikeen, ti riai naba n anganako te maekatin ngkana e angaraoi. Ti na kaatuua ara mwakuri i aon tibwaakini beeba ni kakao ni Maati 2, ma tiaki moanakin te reirei n te Baibara.
4. Bukin tera bwa ti riai n ingainga n uataboa te mwakuri ibukini katanoataan te Kauring?
4 Ara kantaninga bwa a na mwaiti aika a na kaea te Kauring ma ngaira. E na maroroakinaki n te kabwarabwara bwa antai Iesu. (1Kor. 11:26) E na maroroakinaki naba arora ni buokaki ni matena. (IRom 6:23) Ao e na kamatataaki iai, bukina ngkai e kakawaki bwa ti na ururinga Iesu. (Ioa. 17:3) Ti bia ingainga n uataboa te mwakuri ibukini katanoataan te Kauring!