E na Moanaki n Eberi 2 Tibwaakini Beeba ni Kakao Ibukin te Kauring
1. N ningai ae ti na tibwai iai beeba ni kakao ibukin te Kauring n te ririki aei, ao tera manenan te mwakuri ae kakaraoaki ni katoa ririki aei?
1 Ni moa man Eberi 2 nakon Eberi 17, ao ti na tibwai iai beeba ni kakao nakon te botaki ae rangi ni kakawaki i nanon te ririki, ae Kauringaani mateni Kristo. N taai aika nako ao a bati te koraki ake a raraoi nanoia aika a butimwaea te mwakuri ae kakaraoaki ni katoa ririki aei. N te katoto, n te bong are e nang boo iai te Kauring ao e tareboonia te aobiti n tararua teuana temanna te aine ao e kangai: “Ngke I okira mwengau ao iai te beeba ni kakao teuana i matan au mataroa. I tangiria ni kaea te botaki anne ma I aki ataa te tai are e na boo iai.” E kabwarabwaraaki iroun te tari temanna te tabo are e na nora iai tain te botaki n te beeba ni kakao. E motika ana maroro te aine anne n taekina ae kangai, “N na roko n ami botaki n tairiki!”
2. Tera ae ti kona n taekinna ngkana ti tibwaa te beeba ni kakao?
2 Arora n Tibwaa te Beeba ni Kakao: E raoiroi riki bwa ti na kakimototoa ara maroro ngkai e a uarereke ara tai ni karaoa ara aono ni kabane. Ti kona n taekina ae kangai: “Mauri. Ti tangiria n angania kaain am utu te beeba ni kakao aei nakon te botaki ae kakawaki ae kakaraoaki ni katoa ririki, ae na karaoaki ni katobibia te aonnaba n te Taabati, Eberi 17. [Angani kaain te auti te beeba ni kakao.] Te bong anne boni kauringaani maten Iesu. E na karaoaki naba te kabwarabwara man te Baibara ae a kona n ongora iai aomata nako, are e na kabwarabwaraa arora ni kona ni kakabwaiaaki man ana kaboomwi Kristo. E kaotaki n te beeba ni kakao aei te tai ao te tabo are e na boo iai te botaki anne n ara tabo.”
3. Ti na kanga ni kaoia aomata aika mwaiti riki?
3 Ngkana e bubura ana aono te ekaretia, a kona ngkanne unimwaanen te ekaretia ni kariaia katukani beeba ni kakao nakon auti ake akea kaaia, n te tabo are e na aki noraki iai irouia ake a rirarikin te auti anne. Taraia raoi bwa ko na kaoia aomata ake ko okiokiriia, am koraki, raom ni mwakuri, raom n reirei, ao ake ko kakaitiboo ma ngaiia. Ngkana ko uataboa tibwaakini beeba ni kakao n te wikeen anne, kabongana te maekatin n te tai are e angaraoi iai. Ko kona n auxiliary bwaiania i nanon Eberi ao ni kabatiaa riki am tai n te mwakuri ae kakukurei aei?
4. Bukin tera bwa ti tangiriia te koraki ake a raraoi nanoia bwa a na kaea te Kauring?
4 Tera aron te kaotioti ae moan te raoiroi ae a na karekea te koraki ake a raraoi nanoia ake a roko! A na ongoraea taekan ana tangira Iehova ae korakora ni katauraoa iai te kaboomwi. (Ioa. 3:16) A na reiakina aron Ana Tautaeka n Uea te Atua ni kakabwaiaia te botannaomata. (Ita. 65:21-23) A na kaoaki naba bwa a na kawariia taan ibuobuoki ao ni bubutii bwa a na reirei n te Baibara n reiakina ae bati riki. Bon ara tataro ibukia te koraki ake a raraoi nanoia bwa a na butimwaea te mwakuri aei ao n airi ma ngaira nakon te Kauring!