Ko Kona n Rinea te Kabwaia Nakon Taai Aika a na Roko

Tao 3,500 te ririki n nako ao Iehova e tuangia taan taromauria te bwai ae a riai ni karaoia bwa a aonga ni kabwaia nakon taai aika imwaia: “I a tia ni kaaki i matami te maiu ao te mate, te kakabwaia ao te rekenikai, ao kam na rinea te maiu bwa kam aonga ni maiu, ngkami ma kanoami.”​—Te Tua-Kaua 30:19.

A riai ni karaoa aia rinerine ae raoiroi ngkana a na kabwaia nakon taai aika imwaia. Ai bon titeboo naba ma ngaira ni boong aikai. E kaotaki n te Baibara arora ni karekea te kabwaia nakon taai aika imwaira: “N aromi n tangira Iehova ae Atuami, n ongo ni bwanaana.”​—Te Tua-Kaua 30:20.

TI NA KANGAA N TANGIRA IEHOVA AO N ONGO NI BWANAANA?

REIAKINA TE BAIBARA: Ngkana ko na tangira Iehova, ko riai moa n reiakina taekana man te Baibara. Ni karaoan anne, ko na noria ae bon te Atua ae tatangira, ao e tangira ae te kabanea n tamaroa ibukim. E kaungako bwa ko na tataro nakoina “ibukina bwa e [mumutiakiniko].” (1 Betero 5:7) E berita te Baibara bwa ngkana ko kakorakorako ni kaaniko ma ngaia, “ao ane e na [kaaniko].”​—Iakobo 4:8.

MAIUAKINA AM REIREI: Te ongo ni bwanaan te Atua e nanonaki iai te ongeaba n te kaetieti man te Baibara. Ni karaoan anne, “e na nakoraoi arom iai, ao ane ko na bwaina te wanawana iai.”​—Iotua 1:8.