E Aera Ngkai E a Butanako te Riribai?

Tera te Riribai?

Te riribai bon te namakin ae rangi ni korakora iai ribaakin temanna ke aomata tabeman. Bon te namakin ae teimatoa ibukini kani karaoan ae buakaka.

BUKINA NGKAI A RIRIBAI AOMATA

A bati bukina ngkai a a moanna n riribai aomata. A riribaaki tabemwaang tiaki ibukini baike a karaoi ma ibukina bwa antai ngaiia. A kona naba n iangoaki ake tabeman bwa a buakaka, bon nanoia ni kammarakia aomata ao a aki kona ni bitii aroaroia nakon ae raoiroi riki. A kona naba n taraaki bwa a mangori, a karuanikaiia aomata ke a kakarikii kangaanga. A a bae naba n tia naake a riribaiia aomata n rinanon te mwakuri n iowawa, te ribuaka ke bwaai riki tabeua aika karikirakea i nanoia te riribai.

ARONI BUTANAKONA

E kona temanna n riribaiia naake e tuai kaitiboo ma ngaiia. N te katoto, e kona temanna ni kakairi n aia iango ae kairua kaain ana utu ke raoraona ibukin taekaia aomata tabeman. Ngaia are ngkana iai tabeman kaain aia kaawa aika a riribaiia aomata tabeman, a a kona ngaiia ni manga riribaiia naba aomata akanne.

Ngkana ti ota raoi ni kai butanakon te riribai, ti na ataa iai bukin riribaakia aomata aika bati irouia tabeman. Ma ibukini katokani butanakon te riribai, ti riai n ataia bwa e moan riki mai ia te riribai. Ti kona n reiakina anne n te Baibara.

E KAOTAKI N TE BAIBARA MOAN RIKIN TE RIRIBAI

E AKI MOAN RIKI TE RIRIBAI AE IOWAWA MAIROUIA AOMATA. E moan riki aei mairoun te anera ae Tatan te Riaboro are karitei nakon te Atua. Bon “te tia tiriaomata ngaia mangke e moani moana” ana mwakuri ni karitei. E kakarikirakea te riribai ao te un ibukina bwa “bon te tia kewe ngaia, ao taman te kewe.” (Ioane 8:44; 1 Ioane 3:11, 12) E taekinaki te Riaboro n te Baibara bwa te tia burebureiia aomata, te tia un ao e korakora ana kairiribai.—Iobi 2:7; Te Kaotioti 12:9, 12, 17.

E KAI REKE TE RIRIBAI IROUIA AOMATA AIKA AKI KORORAOI. E kakairi te moan aomata are Atam iroun Tatan n ana mwakuri aika bure. Ngaia are a a bane ni bure aomata ao n aki kororaoi. (I-Rom 5:12) Kain are ana moan nati Atam, e riribaa tarina are Abera ao e a tiringnga. (1 Ioane 3:12) Ni koauana, a bati aika kaotiota te tangira ma te nanoanga. Ma ibukin rikiara ae te bure, a a bati aika kaotiotii aroaro aika kakorakoraa riki te riribai, n aron te bangaomata, te bakantang, ao te kamoamoa.—2 Timoteo 3:1-5.

E KAI REKE RIKI TE RIRIBAI IROUIA AIKA INANONANO. Ti a maeka ngkai n te aonnaba ae wantongaa te riribai mani karikirakean aroaro aika aki kaota te nanoanga ao a karuanikai. E a rikirake te inanonano, taetae aika kaun, te maiubuaka ao mwakuri n iowawa ibukina bwa “a bane kaain te aonnaba ni mena i aani mwaakan teuare buakaka,” are Tatan te Riaboro.—1 Ioane 5:19.

Ma e bati riki ae kaotaki n te Baibara nakon tii kaotan aroni moan rikin te riribai. E boni kaota naba aroni katokana.