ARONI KATOKANI BUTANAKON TE RIRIBAI

2 | Tai Irantangaiko

Ana Reirei te Baibara:

‘Tai kabooa ana buakaka te aomata n te buakaka. Karaoa ami kabanea ni konaa ni karekea te rau ma aomata ni kabane. Tai irantangaingkami bwa e koreaki ae kangai: “E taku Iehova: ‘Au bwai te karekekai, N na kabooi mwin aia mwakuri aika bubuaka.’”’—I-ROM 12:17-19.

Ae Nanonaki n te Kibu Anne:

Ngkana iai ae e kammarakira, ti boni bae n un, ma e aki tangirira te Atua bwa ti na manga kammaraka te aomata anne. Ma e kaumakira bwa ti na kantaningaia bwa e na boni waekoa ni kaetii aaro n ribuaka.—Taian Areru 37:7, 10.

Te Bwai ae Ko Kona ni Karaoia:

Ngkana a irantangaia aomata aika aki kororaoi, e a kakorakoraa riki butanakon te riribai. Ngaia are ngkana e kauniko temanna ke ni kammarakiko, tai irantangaiko. Kataia n taotaona unim ao kaekaa ma te rau. N tabetai, e na karako riki marakim ngkana ko tarariaoa te bure anne. (Taeka N Rabakau 19:11) Ni koauana, e raoiroi riki ngkana ko ribootina te kangaanga anne. N te katoto, ngkana iai ae iowawa nakoim, ko kona n ribootinna nakon te bureitiman ke kaain te tautaeka riki tabeman.

Ukeran te kan irantangaiko, ko na boni kammarakiko riki iai

Ma tera ae ko na karaoia ngkana e taraa n akea te anga ae ko na raoiakina iai te kangaanga anne? Ke tao ko a tia ni karaoa am kabanea ni konaa n raoiakinna n te aro ae rau? Tai irantangaiko. Bwa rimwi ao e na kakaiaki riki te kangaanga anne. Ma katoka butanakon te riribai. Onimakina te anga ae e kukurei iai te Atua ibukin raoiakinan te kangaanga. “Onimakinna ao e na karaoi bwaai ibukim.”—Taian Areru 37:3-5.

Te Rongorongo ae Koaua—ADRIÁN

E Tokanikai i Aon te Kan Irantangaia

Ngke ai tebwi tabun ana ririki Adrian, e bon rangi n iowawa ao ni korakora ana riribai ao e kani kakabooa mwini kaina. E taku: “I aki toki n irekereke ma te kakatii ao n tabetai I a raraabuabua ao ni kitanaki bwa N na mate n te kawai.”

E moana ana reirei n te Baibara Adrián ngke 16 ana ririki. E taku: “Ngke I a tabe n ririkirake n au reirei n te Baibara, I a ataia bwa I riai ni bitii aroarou.” E a riai ni katoka ana riribai ao anuana ae te iowawa. E rangi ni kakabwaiaaki n te baere e reiakinna n I-Rom 12:17-19 ae taekan te aki irantangaiko. E taku: “I a kakoauaa ae e na boni katoka te ribuaka Iehova n aron are bon taku ao n te tai are e baireia. Teutana imwin teutana ao I a tokanikai i aon anuau ae te iowawa.”

N te tairiki teuana ao I a kamwaruaaki irouia kaain te kaeng n roro n rikirake teuana ae I unun ngkoa ma ngaiia. E boni kibarai aia bwaoti n orea akuu ao e takarua ni kangai: “Katokaa kaim!” E taku Adrián: “I boni kani katokaa kaiu.” Ma n oneani mwin are e na katokaa kaina, e tataro nakon Iehova ao ni mwaawa nako man te tabo anne.

E reitia ni kangai: “N te bong are imwina, I a kaitiboo ma te bwaoti are n te kaeng arei n tii ngai ma ngaia. I bon un ao I rangi ni kan raira kaiu, ngaia are I a manga tataro riki ni butiia Iehova bwa e na buokai n taotaona uniu. I rangi ni mimi bwa e a keerakeai naba te roro n rikirake arei ao e taku: ‘Kabwaraa au bure n te baere riki ngkebong. Ma ni koauana, I kani katotongko. I kan reirei n te Baibara.’ Ai kukureira ngai ngke I taotaona uniu! I kakaitau naba bwa ti a kaai n reirei n te Baibara.”