Titiraki Mairouia Taani Wareware

Ngkana e buuraure te Kristian n akea kariaiakana n te Baibara ao ni manga mare ma temanna, e na tera aia iango kaain te ekaretia ibukin te mare are mai mwaina ao te mare ae boou aei?

Kangaanga n aron aikai, a kona iai kaain te ekaretia n iangoia bwa e a tia n toki te mare are mai mwaina ngkana e a manga mare te buu te mwaane ma temanna riki, ao akea buren te mare ae boou. Ibukini kamatataan aei, ti na rinanon te baere taekinna Iesu ibukin te buuraure ao te manga mare.

E taekinna Iesu ni Mataio 19:9 bukina ae e tii kariaiakaki iai n te Baibara te buuraure. E taku: “Teuare buuraure ma buuna ao e a manga mare ma temanna, e wene ni kimoa. Ma e kona ni buuraure teuanne ngkana e a tia ni wene ni bure neienne.” Man ana taeka Iesu akanne, ti reiakinna bwa (1) e tii kariaia te Baibara katokan te mare, ngkana iai ae karaoa te wene ni kimoa ao (2) te mwaane ae buuraure ma buuna n akean bukina ae riai n te Baibara ao ni manga mare ma temanna, e boni wene ni kimoa.a

E nanonaki naba n ana taeka Iesu bwa e a kona te mwaane, ae wene ni bure ao ni buuraure ma buuna, ni kariaiakaki n te Baibara bwa e na manga mare? Tiaki ngaia anne. Ngkana e riki te wene ni kimoa, e kona te buu are akea ana bure ni baireia bwa e na kabwaraa ana bure buuna ke e na aki. Ngkana e aki kani kabwaraa ana bure ao e bairea te buuraure i aan te tua, ngkanne a a kaai ni kona ni manga mare ma temanna ngkana e a tia raoi karaoan aia buuraure.

N te itera are teuana, e kona te buu are akea ana bure n iai nanona ni kani kawakina ana mare ao e kani kabwaraa ana bure buuna. Ma tera arona ngkana te buu te mwaane are wene ni kimoa, e rawa ni butimwaea kabwaraakin ana bure irouni buuna ao e boni karekea naba te beeba ni buuraure i boni irouna? Bon akea kariaiakana n te Baibara bwa e na manga mare, ibukina bwa e kani kabwaraaki ana bure irouni buuna ao e kani kateimatoa aia mare. Ngkana e boni baireia naba teuanne bwa e na mare ma temanna, e ngae ngke e aki kariaiakaki n te Baibara, ngkanne e a manga wene ni kimoa naba. A a riai ngkanne unimwaane ni karaoa te komete ni kaboowi ibukin bairean te bure aei.—1Kor. 5:1, 2; 6:9, 10.

Ngkana e a manga mare te mwaane n akea kariaiakana n te Baibara, e na tera aia iango kaain te ekaretia ibukin te mare are mai mwaina ao te mare ae boou? E bon teimatoa naba n iai manenan te mare are mai mwaina n te Baibara? E boni kona naba te buu are akea ana bure ni baireia bwa e na kabwaraa ana bure buuna ke e na aki? E na kona n iangoaki te mare ae boou bwa te wene ni kimoa?

A kona ngkoa kaain te ekaretia n iangoa te mare ae boou aei bwa te wene ni kimoa, ngkana te buu are akea ana bure e teimatoa ni maiu, e tuai ni manga mare ma temanna ao akea bukinana n te wene ni kimoa. E aki kaotaki taekan te buu ae akea ana bure, n ana kabwarabwaraa Iesu ibukin te buuraure ma te manga mare. Ma e tii taekinaki iai bwa te mwaane ae buuraure n akea bukina ae riai n te Baibara ao ni manga mare ma temanna, e boni wene ni kimoa. Ngkana e riki aei, ngkanne e a kona ni katokaki te mare are mai mwaina rinanon te buuraure ao te manga mare, are kabotaua Iesu ma te wene ni kimoa.

Ngkana e buuraure te mwaane ao ni manga mare ma temanna, e a aikoa kona te buu are akea ana bure, ni manga kabwaraa ana bure buuna are mai mwaina ke n ribaia. Ngaia are e aki rinanon te rawawata ni bairean aei. Irarikin anne, a aki kona ni bitaki aia iango kaain te ekaretia n te mare ae boou aei, e ngae naba ngkana te buu are akea ana bure e a tia ni mate, e a manga mare ma temanna ke e wene ni bure.b

N te katoto are e taekinaki mai mwaina, ao e wene ni kimoa te buu te mwaane are e a karekea iai te buuraure. Ma tera arona ngkana te buu te mwaane, e aki wene ni bure ma e boni karekea naba te buuraure ao ni manga mare ma temanna? Ke tera arona ngkana te buu te mwaane, e aki wene ni bure imwain te buuraure ma e a karaoa anne imwin te buuraure ao e a manga mare ma temanna, n aki ongea nanoni buuna ni kani kabwaraa ana bure? Ni katoto aikai ni kabane, te buuraure ao te manga mare are bon akea okorona ma te wene ni kimoa, e a katoka te mare are mai mwaina. Te mare ae boou bon te mare ae e eti i aan te tua. E taekinaki aei n Te Taua-n-Tantani ae bwain Nobembwa 15, 1979, iteraniba 32, “Ngkai ao e a karaoa te mare ae boou, ao e aki kona ni katokia ao ni manga okira buuna are mai mwaina. Te mare are mai mwaina, e a tia n toki imwini karaoan te buuraure, te wene ni kimoa ao te manga mare.”

Bitakin otara aei, e aki nanonaki iai bwa a a riai Kristian n iangoa te mare, bwa te bwai ae e aki tabu ke bon tiaki te bure ae kakaiaki te wene ni kimoa. Ngkana e buuraure te mwaane ma buuna, n akea kariaiakana n te Baibara, ao ni manga mare ma temanna riki, e bon riai te komete ni kaboowi ni karaoa nakoina te moti ibukin te wene ni kimoa. (Ngkana bon te Kristian buuna ni mare ae boou, e riai ni karaoaki naba nakon neiei te komete ni kaboowi ibukin te wene ni kimoa.) E ngae ngke e taraaki aia mare ae boou bwa tiaki te wene ni kimoa, ma e na bon aki tau teuanne nakoni mwioko n te ekaretia i nanon ririki aika bati, ao ni karokoa naba ae e toki unia tabeman ibukin ana mwakuri ake a buakaka ake e a tia ni karaoi. E kona naba n irekereke aei ma rinanoani kangaanga ake e rinanoi te buu are akea ana bure, are e a tia ni karaoaki ae iowawa nakoina, n ikotaki naba ma naati ake a kitanaki iroun te buu are e bure.—Maraki 2:14-16.

Ibukini iangoan raoi kangaanga aika kakaiaki ake a riki man te buuraure ao te manga mare are e urua ana tua te Baibara, a wanawana Kristian ngkana a kakairi iroun Iehova n iangoa te mare bwa e tabu.—TeMin. 5:4, 5; Ebera 13:4.