Kamanena Raoi te Tirotaam

E kabotaua te Baibara ma te tirotaam te tia rimwini Kristo ae Iakobo, ae e na buokira n nori aroarora ake i nanora. (Iak. 1:​22-25) Ti na kangaa ni kamanena te Baibara bwa te tirotaam?

Karaua raoi ni warekia. Ngkana ti a bon tii tiroira nako naba n te tirotaam, ti bae n aki nori tabeua kabwakara. Ngkana ti na atai aroarora aika riai ni kanakoraoaki, ti riai ni karaua raoi ni wareka Ana Taeka te Atua.

Kaatuua am iango i aon te bwai ae ko na kanakoraoia iroum, ao tiaki tabeman. Ti kona n nora kabwakan temanna man te tirotaam are ti tiroira iai. N aron anne, ti kona ni kamanena te Baibara ni kaota iai ana kairua temanna. Ma e aki ibuobuoki aei ni kaetiira.

Bwaina te aki imanono. Ngkana ti taraa te tirotaam ao n tii nora te bwai ae ti aki tangiria, a na kona ni bwara nanora. Ti riai n aki imanono ngkana ti wareka Ana Taeka te Atua n arora n aki kantaningaa ae bati riki mairoura nakon ae kantaningaia Iehova.​—Iak. 3:17.