Tera Aron Taraakiu Iroun Iehova?
1. Te aro raa ae kabotauaki iai te Baibara ma te tirotaam?
1 Iraua am tai ae ko tirotiroiko iai n te tirotaam? A karaoa aei ni katoabong angiina mai buakora ibukina bwa ti buokaki iai n nori itera aika a riai ni katamaroaaki. E kabotauaki te Baibara bwa ai aron te tirotaam. Ti buokaki mani warekan Ana Taeka te Atua bwa ti na tiroa iai nanora are e tii kona n noria Iehova. (1Tam. 16:7; Iak. 1:22-24) E kona Ana Taeka te Atua “n atai baike e iangoi te nano ma baike e kantaningai.” Ti na kanga ni buokaki mani warekan te Baibara ao kananoan ara iango iai ni katoabong bwa ti na nori itera aika ti riai ni kakorakoraaki iai bwa ti na riki bwa taan uarongorongo aika uaana aia mwakuri?—TaiAre. 1:1-3.
2. Ti na kanga ni buokaki n te Baibara bwa ti na tuoira iai i bon iroura?
2 Kabongana te Baibara Bwa Kaanga te Tirotaam: Ti reiakinaki aroaro aika E kukurei iai Iehova man rongorongoia ana toro aika kakaonimaki aika taekinaki n te Baibara. N te katoto, e kaotiota te ingaingannano Tawita ibukin aran te Atua. (1Tam. 17:45, 46) E ninikoria Itaia n anga ngaia bwa e na uarongorongo n te tabo ae karuanikai. (Ita. 6:8, 9) E kairaki Iesu ni korakoran nanona n tangira Tamana are i karawa, bwa e na iangoa ana mwakuri bwa nibwan te kaungaunga ao te raunnano n oneani mwin are e na iangoia bwa a aki kakukurei ma ni karawawata. (Ioa. 4:34) A uarongorongo ma ingaingan nanoia Kristian ake n te moan tienture, a onimakina Iehova ao a motinnanoia bwa e na aki kerikaaki ingaingan nanoia. (Mwa. 5:41, 42; 2Kor. 4:1; 2Tim. 4:17) Mani kananoan ara iango ni katoto aikai, ti a buokaki iai bwa ti na tirotiroira ni kaineti ma karikirakean aroarora ibukin ara mwakuri ae tabu.
3. Bukin tera bwa ti riai n aki waeremwe ni karaoi bitaki aika riai?
3 Mwakurian Arora Aika Kairua: Ni koauana, e aki raoiroi bwa ti na tiroira n te tirotaam ao n aki mutiakin arora aika kairua. Ti kona ni butiia Iehova bwa e na buokira n tirotiroi arora ao ni buokira imwina ni karaoi bitaki aika ti kainnanoi. (TaiAre. 139:23, 24; Ruka 11:13) Kioina ngkai e a kimototo te tai ao e irekereke iai maiuia aomata, ti riai n aki waeremwe ni karaoi bitaki aika riai.—1Kor. 7:29; 1Tim. 4:16.
4. Tera ae riki nakon te mwaane ae tirotiroia n Ana Taeka te Atua ao imwina e karaoa nanon are e noria?
4 Te bwai ae rangi ni kakawaki are e taraia Iehova bon nanon te aomata ao tiaki tinanikuna. (1Bet. 3:3, 4) Tera ae riki nakon te aomata ae tirotiroia n Ana Taeka te Atua ao imwina e karaoa nanon are e noria? “E aki riki bwa te tia ongora ae mwamwaninga ma bon te tia kakaraoa te mwakuri, ao e na kukurei ngkai e karaoia.” (Iak. 1:25) Eng, ti na kukurei ao n riki bwa minita aika a uaana aia mwakuri ibukina bwa ti “tabe ni kaotiota mimitongin Iehova n aron te tirotaam.”—2Kor. 3:18.