Kateimatoaa “Tangirau Are Ko Moa N Tangirai Iai”
“Taua raoi te bai ane iroum.”—TE KAOTIOTI 3:11, BK.
1, 2. Tera am namakin ngkoa ngke ko moan ataia raoi, bwa a boni koaua baike ko reiakin ibukin Iehova?
KO URINGA arom ngkoa ngke ko moan reiakina ana kaantaninga ae moan te raoiroi Iehova ibukia ake a ongeaba? Ngkana arona bwa kaain te Aro teuana ngkoe mai mwaina, tera am namakin ngke e a kabwarabwaraki nakoim ana kaantaninga te Atua rinanoni kamanenaan te Baibara, ke tao reirei tabeua aika matoatoa ake a kamatataaki raoi nakoim? Ko na boni bae n ataia ae ko a tia ni burebureaki. Ma ai kimwareireira ngkoe ngkai ko a ataa te koaua! Ngkana tao ko kaikawaaki irouia am karo aika Kristian, ko ururinga aron am namakin ngke ko a butimwaea raoi te koaua, ae baike ko reiakin ibukin Iehova a boni koaua, ao ko a moana kaboraoani maium ma ngaai?—I-Rom 12:2.
2 A mwaiti tarim n te ekaretia ake a na tuangko bwa a namakina te kimwareirei, te kaaniaki riki ma Iehova, ao te kakaitau ngkai a burimauniaki nakoina. (Ioane 6:44) A kairaki ni kukureia anne, bwa a na uataboi mwakuri ni Kristian. Ibukin onraken nanoia n te kimwareirei a a kairaki iai bwa a na manga tibwauaa aia namakin anne nakoia aomata nako. Ko a tia naba n namakina ae ai aron anne?
3. Tera are e riki n te ekaretia are i Ebeto ngke e korea ana reta Iesu nakoia?
3 Ngke e taetae Iesu nakon te ekaretia ni Kristian are i Ebeto n te moan tienture, ao e mwanewea iai, ‘te tangira are e reke irouia n te moantai.’ A bati aroaroia Kristian i Ebeto aika raraoi, ma e ngae n anne, e tabe ni kekerikaki tangiran Iehova irouia are a kaotiotia rimoa. Mangaia are e tuangia Iesu ni kangai: ‘I atai ami makuri, ma kuami, ma nanomwaakami, ma aromi ngkai kam aki kona n taotaon nanomi irouia akana buakaka, ao kam a tia ni kataiia akana taku bwa taan tuatua ngaiia, ao bon tiaki, ao kam ataiia bwa bon taani kewekewe; ao iai nanomwaakami, ao kam taotaon nanomi i bukin arau, ao e aki bwara nanomi. Ma bon iai au bwai ni boaingkami iai, ngkai kam kitana tangirau are kam moa n tangirai iai.’—Te Kaotioti 2:2-4.
4. Bukin tera bwa e kakawaki naba ni boong aikai ana reta Iesu nakoia I-Ebeto?
4 E rangi n tonu raoi aroni boaakiia kaain te ekaretia are i Ebeto ao ekaretia riki tabeua ake e taetae nakoia Iesu n te boki ae Te Kaotioti, ibukin aroaroia Kristian aika kabiraki are e a kaman n riki ni moa man 1914. (Te Kaotioti 1:10) Mangaia are e boni kona naba ni manga kekerikaki irouia Kristian tabeman ni boong aikai ‘aia tangira are e reke irouia n te moantai’ ibukin Iehova ao te koaua ni Kristian. N iaiangoan anne ti bia neneria bwa e kanga n riki aei, rinanon uringan ao kananoan ara iango i aoni baike a riki nakoira ake a na kona ni kateimatoaa, ni kabooua ao ni karikirakea tangiran ma ingaingan nanora ibukin te Atua ao te koaua ni Kristian are ti karekea n te moantai.
Tera ae Kairiko Bwa Ko na Kakoauaa Raoi te Koaua?
5, 6. (a) Tera ae a riai ni kakoauaa raoi i bon irouia Kristian n tatabemania nako? (b) Tera ae e kairiko bwa ko na kakoauaa raoi ae a bon reiakina te koaua Ana Tia Kakoaua Iehova? (c) Tera ae e kona ni buoka te aomata ni kabooua ana tangira are e karekea n te moantai?
5 Ni kabaneia ake a katabui maiuia nakon Iehova, a riai moa ni ‘kakoauaa’ i bon irouia bwa tera “nanon te Atua, are raoiroi, are kakukurei, are koro-raoi.” (I-Rom 12:1, 2) Te bwai teuana ae irekereke ma karaoan anne, bon reiakinan te Baibara. Te bwai ae kakoauaa temanna ibukia Ana Tia Kakoaua Iehova bwa a taekina te koaua, e kona ni kaokoro ma are e kakoauaa temanna. Tabeman a uringnga bwa e moani bitaki nanoia ngke a wareka aran te Atua ae tabu man te Baibara ke ngke a a tibwa ota raoi n aroia maate. (Taian Areru 83:18; Te Minita 9:5, 10) Ma te bwai ae e anaaki nanoia iai tabeman, bon te tangira are e kaotiotaki i marenaia ana aomata Iehova. (Ioane 13:34, 35) Ma tabeman riki, a anaaki nanoia ngke a oota raoi n ae nanonaki n te kaokoroaki ma waakin te aonnaba. A kakoauaa raoi ae a aki riai Kristian ni koaua n irekereke ma kauntaeka ibukini waaki n tautaeka, ke aia buaka te natannaomata.—Itaia 2:4; Ioane 6:15; 17:14-16.
6 Reiakinani baikana taekinaki n te barakirabe ae imwain aei ao ake tabeua riki, a kona ni kauekea i nanoia aomata aika mwaiti, moan tangiran te Atua irouia. Karekea am tai n ururingnga, bwa tera ngkoa are e moani kairiko nakoni kakoauaan te koaua. Bon te aomata ngkoe ae kaokoro aroarom ao baika a a tia n ririki ni maium, ai ngaia are e na boni bae naba ni kaokoro bukin tangiran Iehova ao kakoauaan ana berita iroum ma ake te korakina. Tao ni koauana, baika a riki aikai a bon teimatoa naba ni koaua nakoim ni boong aikai, n arom ngkoa ngke ko moan reiakina te koaua. E bon aki bibitaki te koaua. Mangaia are ururingan iango ao namakin aikai, e kona ni kabooua am tangira are e reke iroum n te moantai ibukin te koaua.—Wareka Taian Areru 119:151, 152; 143:5.
Kakorakoraa Am Tangira Are n te Moantai
7. E aera bwa ti riai ni kakorakoraa ara tangira are reke iroura n te moantai, ao ti na kanga ni karaoa anne?
7 Tao a bati bitaki ni maium mangke ko moani katabua maium nakon Iehova. E rangi ni kakawaki iroum tangiran te koaua are n te moantai, ma ni waakinakon te tai, ao ko a kainnanoa te tangira ae korakora riki bwa ko aonga ni kona ni kaaitarai kangaanga tabeua ake a a kataa am onimaki. Ma e boni boutokaiko iai Iehova. (1 I-Korinto 10:13) Mangaia are baike a a tia n riki nakoim i nanon ririki aika nako, a bon rangi ni kakawaki naba nakoim ngkai. A a tia ni buokiko ni karikirakea riki am tangira are e reke iroum n te moantai, ao aaro aikai bon aanga aika ko kona iai ni kakoauaa i bon iroum nanon te Atua ae raoiroi ae kakukurei.—Iotua 23:14; Taian Areru 34:8.
8. E kanga Iehova ni kabwarabwaraa arona nakoni Mote, ao a kanga tibun Iteraera ni kinaa raoi te Atua n te aro ae kaan?
8 Ni kabwarabwarana, iangoa aroia tibun Iteraera, ngke e taekina ana kaantaninga Iehova nakoia ni kaineti ma kainaomataia man te tautoronaki i Aikubita. E kaota arona te Atua nakoni Mote ngke e kangai: “N na bon riki bwa te bwai ae N na riki.” (Te Otinako 3:7, 8, 13, 14, NW) E nanonaki raoi n aei, bwa e taekinna Iehova bwa e na boni kona n riki bwa te bwai ae e kona iai ni kainaomataia ana aomata. Mani baike a riki imwin te tai anne ao aaro riki tabeua, a nori iai iteran nako aroaron Iehova tibun Iteraera, bwa boni ngaia Teuare Moan te Mwaaka, te tia Motikitaeka, te tia Kairiri, te tia Kakamaiu, te tia Buaka, ao te tia Katauraoi baika kainnanoaki.—Te Otinako 12:12; 13:21; 14:24-31; 16:4; Neemia 9:9-15.
9, 10. Tera te anga ae kona ni buoka te aomata bwa e na kinaa riki iai te Atua, ao bukin tera ngkai e raoiroi ururingani baikanne?
9 E kaokoro arom ma aroia tibun Iteraera ake rimoa. Ma e ngae n anne, ko a bae n tia ni kaaitara ma aaro tabeua ake a kairiko bwa ko na kakoauaa raoi iai tabeakinam iroun te Atua, ao are e a kakorakoraki iai am onimaki. Tao e a tia Iehova ni karaoi bwaai tabeua ake e kaotia iai nakoim bwa te tia Katauraoi baika ko kainnanoi, te tia Karaunano, ke te tia Reirei. (Wareka Itaia 30:20b, 21.) Ke tao ko a tia n noria bwa e kaekaaki am tataro. Tao ko a boni bae n tia ni kaitiboo ma karawawataaki, ao e a tii karina naba n roko raom ni Kristian temanna ao n anganiko ana ibuobuoki. Ke tao rinanon am ukeuke n te Baibara i bon iroum, ao ko a nori iai kiibu ake a boni kaineti raoi nakoim.
10 Ngkana tao ko taekini baikanne nakoia tabemwaang, e na boni bae n iai tabeman aika a na aki nora kakawakiia n aron ae ko noria. Ni koauana bon tiaki taiani kakai baikanne. Ma ko tarai bwa baika a rangi ni manena. Eng, e boni kakoauaa raoi Iehova nakoim bwa e boni kona n riki bwa te bwai ae tangiria ibukim. Uringi ririki ake ko mena iai i nanon te koaua. Ko kona n uring taai ake ko namakina iai mwannanoam iroun Iehova i nanoni maium? Ngkana ko a tia, ao ururingani baikana a riki akanne ao aron am namakin iai, a na kona ni kauekea i nanom, te aeka n tangira are ko tangira iai Iehova n te moantai. Kakaitau ibukini baikana riki akanne ao ni kananoa am iango i aoia. Bwa baikai ni bane, a riki bwa kakoauaan ae e mwamwannanoingkami Iehova n tatabemaningkami nako, ao bon akea ae e kona n anaa te aeka n namakin anne mairoum.
Tuoa Raoi Nanom
11, 12. Baikara bwaai aika karika kekerikakin tangiran te koaua iroun te Kristian, ao tera ana reirei Iesu ni kaineti ma anne?
11 Ngkana ko a aikoa namakina aekan tangiran te Atua ao te koaua iroum n aron are mai mwaina, tiaki nanona bwa e a bitaki te Atua. Bwa e bon aki bibitaki Iehova. (Maraki 3:6; Iakobo 1:17) E rangi ni mwannanoiko ngkai n aron naba mwannanoam irouna ngkoa. Ma tera ngkanne ae kariki bitaki nakon am iraorao ma Iehova? Te koaua bwa ko a namakina riki karawawatam ao tabeaiangam ni bwaikorakin te maiu aei? Tao n taai akekei, ao ko rangi n tataromwaaka riki, e bati riki am tai n ukeuke i bon iroum, ao ni kakananoa riki am iango. Te koaua bwa e mwaiti riki ngkoa am tai ni kakaraoa te mwakuri ni minita ma te ingaingannano, ao ni kaakaei bobotaki nakon ae ngkai?—2 I-Korinto 13:5.
12 Ko kona n aki nori bitaki aikai imwin neneran raoi arom, ma ngkana arona bwa ko nori, ao tera ngkanne ae kariki bitaki akanne? Ma te koaua bwa a kona ni kakerikaka nanom n umaki ngkai e a kaan ana bong Iehova, katabetabe aika riai n aroni katauraoani baika a tau ibukin am utu, tararuan oin marurungim, ke bwaai riki aika kainnanoaki n aron aikai? E tua ae kangai Iesu nakoia ana abotoro: “Kawakiningkami, ba a kawa n taonaki ami iango n te buabeka, ma te mamanging, ma taian iango n raraomaeakini bwain te maiu aei, ao ba e rina n roko te bong arei i roumi n ai aron te ao-ni-katatai: ba ane e na roko n te aro anne i aoia aomata ni kabaneia aika maeka i aonaba ni bane. Ma kam na kamarurungingkami n tai nako, ao kam na tataro, ba kam aonga n tokanikai ni biri nako mani baika nangi roko ni kabane.”—Ruka 21:34-36.
13. E kabotaua ma tera Ana Taeka te Atua Iakobo?
13 E kaumakiia raona ni Kristian te tia korea te Baibara ae kairaki n taamnein te Atua ae Iakobo, bwa a na tuoi raoi nanoia n te aro ae riai ni kaineti ma Ana Taeka te Atua. E korea ae kangai Iakobo: “Kam na riki ba taan toua mwin ana taeka te Atua, ao tiaki ti taan ongo, ni mamanaingkami. Ba ngkana e ti ongo ana taeka te Atua temanna n aki toua mwina, ao ai aron te aomata ae tirotiroa matana n te tirotam: ba e tirotiroia, ao e nako, ao e a manuoka naba arona. Ma ane tarataraa te tua are moan te raoiroi, are te tua n inaomata, ni memena naba iai, ngkai tiaki te tia ongo te tua ae mamanuokia, ma e makuria te makuri, ao e na kabaia n ana makuri.”—Iakobo 1:22-25.
14, 15. (a) E kanga te Baibara ni kona ni buokiko ni karikirakea marurungim n te onimaki? (b) Baikara titiraki aika ko riai ni mutiakini?
14 E kona te aomata ni kabongana te tirotaam n nora iai taraaraoina. N te katoto, ngkana te mwaane bwa e nora ana neketai bwa e bure teina, e kona ni kaetia. Ngkana e nora irana te aine bwa e mangaongao, e na kona ni kaaria ni kaetia. N aron naba anne, te Baibara e kona ni buokira n tuoi nanora bwa a uara. Ngkana ti kaboraoi maiura ma are n te Baibara, ai aron ngkanne ae e a riki te Baibara bwa te tirotaam nakoira. Bwa e na tera uaan tiroara n te tirotaam ngkana ti aki karaoi bitaki nakoni baike ti nori? Ti boni wanawana ngkana ti karaoa are e boraoi ma are ti noria n te “tua are moan te raoiroi” are mairoun te Atua, ao n “toua” mwina. Ai ngaia are ngkana iai temanna ae e noria bwa e a moanna ni kekerikaki tangiran te Atua ao te koaua are e reke irouna n te moantai, e karaoa ae riai ngkana e iangoi titiraki aikai: ‘Baikara karawawata aika I boo ma ngaai ni maiu, ao tera arou iai? Tera arou ngkoa nako iai? Iai bitaki aika riki?’ Ngkana arona bwa a kaotaki mamaarara n te tai are ti tuoira iai i bon iroura, ti riai n aki tarariaoi. Ngkana e kainnanoaki te mwakuri korakora ibukini manga kaetana, tai baenikai ni karaoia.—Ebera 12:12, 13.
15 Kananoan am iango n te aro anne e na buokiko ni katei tiam aika tau ibukin rikiraken am onimaki. E anga te reirei ni kauring te abotoro Bauro nakon raona ni mwakuri are Timoteo, ibukini katamaroan ana mwakuri ni minita. E kaumaka te rorobuaka aei Bauro ni kangai: “Ko na botumwaka ni mutiakini baikai; ko na tabe ni baikai; ba e aonga n noraki rikirakem n te raoiroi irouia aomata ni kabaneia.” Ngaira naba ti karaoa ae raoiroi, ngkana ti mutiakini baike e tua Ana Taeka te Atua bwa ti riai ni waekoa ni karaoi.—1 Timoteo 4:15.
16. Ngkana ko tuoa raoi nanom ni kaineti ma te Baibara, tera te karuanikai ae ko riai n iaiangoia?
16 Ko na kona n nori kabwakam tabeua, ngkana ko bon tuoa raoi nanom. E kona ni karika te bwarannano nakoim, ma tai kariaia rikin anne. Bwa rimwi riki, ao ane ko na noria bwa tuoam i bon iroum, e na kairiko nakon ataakini baika ko riai ni karaoi, aika a na katamaroaa riki arom. Ni koauana, Tatan e tangiriia Kristian bwa a na namakinna ae a aki rangi ni kakawaki ngkai a aki kororaoi. Ni koauana, e a tia ni karaoaki te bukibuki are aongkoa e aki tabeakin aia kekeiaki aomata te Atua, ake a karaoi ibukina. (Iobi 15:15, 16; 22:3) Ma e a tia Iesu ni kaotia bwa e boni kairua te bukibuki anne; E boni mumutiakinira n tatabemanira nako. (Wareka Mataio 10:29-31.) Ataakin aki kororaoim, e riai ni kairiko bwa ko na nanorinano n iangoa kanakoraoan riki arom n ana ibuobuoki Iehova. (2 I-Korinto 12:7-10) Ngkana e tinewangaaki am kekeiaki n te aoraki ke te kara, katei tiam aika botau ma am konabwai, ma tai kariaia bwa e na kekerikaki iai am tangira.
Kakaitau Ibukini Baika Bati
17, 18. Baikara kakabwaia aika reke mani kateimatoan am tangira are e reke iroum n te moantai?
17 Ko na karekei kakabwaia aika mwaiti ngkana ko teimatoa ni kanenea aan am tangira are ko karekea n te moantai. Ko kona ni karikirakea am atatai ibukin te Atua ao am kakaitau ibukin ana kairiri ae boto i aon ana tangira. (Wareka Taeka N Rabakau 2:1-9; 3:5, 6.) E taku te tia areru: ‘E bati booni kawakinan ana moti nako Iehova.’ Ao “e boni koaua ana taeka Iehova, ao e kawanawana ane e ro nanona.” Ao a “kabaia akana a moa n raoiroi aroia, akana nakonako n ana tua Iehova.”—Taian Areru 19:7, 11; 119:1.
18 Ko na boni kakoauaa raoi bwa a mwaiti baika raraoi aika ko riai ni kakaitau iai. Ko bon atai raoi bukini baika riki n te aonnaba aei. Ko kakabwaiaki mani baika e katauraoi te Atua ibukia ana aomata ni boong aikai. Akea te nanououa bwa ko bon rangi ni kakaitau naba ngkai e a tia Iehova ni burimauniko nakon ana ekaretia ae katobibia te aonnaba, ao ni mwiokoiko bwa temanna naba ngkoe ana tia Kakoaua. Kaota am kakaitau ni kakabwaia akanne! Ngkana ko karaui ni karinani kakabwaia akanne, ao e na boni bae n rangi ni mwaiti. Ngkana ko kakaraoa anne n taai nako, akea te nanououa bwa e na buokiko ni maiuakina te kauring are e kangai: “Taua raoi te bai ane iroum.”—Te Kaotioti 3:11, BK.
19. Irarikini kananoan am iango i aon am reitaki ma te Atua, baikara riki aanga tabeua aika a kona ni buokiko ni kateimatoaa marurungin am onimaki?
19 Kananoan am iango i aon rikiraken am onimaki i nanon ririki aika bati, bon te anga teuana ae ko kona ni karaoia, ae e na buokiko n taua raoi te bwai ane iroum. E a tia te maekatin aei n okioki ni kotei baika a riki aika kakawaki, ake a kainnanoaki iroura ibukini kateimatoani marurungin ara onimaki. Tabeua mai buakoni baikanne, bon te tataro, kakaaean ao te kaekaeka ni botaki ni Kristian, ao uataboan te mwakuri ni minita ma te ingaingannano. A kona ni buokiko baikai ni kabooua ao ni kateimatoaa am tangira are e reke iroum n te moantai.—I-Ebeto 5:10; 1 Betero 3:15; Iuta 20, 21.
Ko na Kanga ni Kaeka?
• A kanga baike a kairiko nakon tangiran Iehova ni kona n riki bwa aani kaungaan nanom n taai aikai?
• Tera ae ko a kakoauaa raoi n iaiangoani baike a riki nakoim i nanon ririki aika bwakanako?
• Bukin tera ngkai ko riai n tuoa raoi tangiran te Atua iroum?
[Taamnei n iteraniba 25]
Tera aron te koaua are e moani katika nanom ao mani kakoauaki raoi iroum?
[Taamnei n iteraniba 26]
Iai baika ko nori ni maium aika a riai ni kaetaki?