Bon ‘Nibwani Kimwareireira ae Bati’ Iehova

1-2. (a) Tera ae a rinanona aomata aika bati ni boong aikai? (b) Tera ae ti na maroroakinna n te kaongora aei?

A BATI aomata n ara aonnaba aei aika a ukera te kukurei. Ma a bon teimatoa naba ngkai n aki kukurei. A bati aika a a taonakinako n namakinan ae akea bongani maiuia ao te nanokawaki. Anne naba ae a nanamakinna ana aomata Iehova. Kioina ngkai ti a maeka ni “kabaneani boong” ti boni kantaningaia bwa ti na rinanoni bwaai ao namakin aika “karuanikai.”​—2Tim. 3:1.

² N te kaongora aei, ti na maroroakini iai bwaai aika kona n iraea kimwareireira ao arora ni kaoka kimwareireira are e bua. Ma imwain moa anne, ti riai n ataia bwa tera Nibwan te kukurei ao te kimwareirei ni koaua.

NIBWAN TE KUKUREI AO TE KIMWAREIREI NI KOAUA

3. Tera ae ti reiakinna ibukin Iehova man te karikibwai? (Nori naba taamnei.)

³ E kukukurei Iehova n taai nako. Ao e tangirira bwa ti na kukurei ao ni kimwareirei. Ngaia are ti aki mimi ngkai ti nora kimwareireina rinanon ana karikibwai, n aron ara buraneti ae tamaroa, kaara aika kakaokoro mataia, maan aika kona n takaakaro, ao ai amwarake aika kangkang aika rangi ni bati. E bon tangirira te Atua ao e tangiria bwa ti na kukurei ni maiura!

Te erebwanti ae te teei: Ana taamnei © Romi Gamit/Shutterstock; taiani penguin: Vladimir Seliverstov/500px via Getty Images; kooti aika ataei: Rita Kochmarjova/stock.adobe.com; taiani kua aika uoman: georgeclerk/E+ via Getty Images

4. (a) E kangaa Iehova n teimatoa ni kukurei n aki ongea te rawawata ae noria n te aonnaba aei? (b) Tera ana bwaintituaraoi nakoira Iehova? (Taian Areru 16:11)

⁴ E ngae ngke “te Atua ae kukukurei” Iehova, ma e bon nora naba te nanokawaki ma te rawawata n te aonnaba aei. (1Tim. 1:11) Ma e aki kariaia te bae riki aei bwa e na kakerikaaka kimwareireina. E ataia ae e na aki teimatoa te rawawata ao e a kaman tia n namata te tai are e na toki iai. Ao e taotaona nanona nakon te bong are e nang kamauna n aki toki iai te tang ma te rawawata ni kabane. E nori Iehova baika ti rinanoi ngkai ao e kani buokira. E buokira n te aro raa? Te anga teuana, e anganira ana bwaintituaraoi ae te kimwareirei. (Wareka Taian Areru 16:11.) Nora arona n anga te bwaintituaraoi anne nakon Natina ae Iesu.

5-6. Tera bukini kimwareirein Iesu?

⁵ Bon Iesu te kabanea ni kukukurei mai buakon ana karikibwai nako Iehova. Bukin tera? Iangoi bukina aika uoua. (1)  “Boni ngaia katotongan te Atua ae aki nonoraki” ao e kororaoi arona ni kaotiotii aroaron Tamana. (IKoro. 1:15; nora “happy” n te study note n 1 Timoteo 6:​15, nwtsty-E.) (2) E bati riki ana tai Iesu ma Tamana are Nibwan te kukurei.

⁶ E kimwareirei Iesu n taai nako ni karaoan nanon Tamana. (TaeRab. 8:​30, 31; Ioa. 8:29) Ibukini kakaonimakina, e a karekea akoana ao tangirana iroun Iehova.​—Mat. 3:17.

7. Ti na kangaa ni kunea te kimwareirei ni koaua?

⁷ Ti kona naba ngaira ni kimwareirei ni koaua ngkana ti kaanira riki ma Iehova are Nibwan te kukurei. Ti na kukurei riki ngkana ti kabatiaa reiakinan taekan Iehova ao ni kakairi irouna. Ti na karekea naba te kimwareirei ni karaoan nanon te Atua ao n ataakin ae ti a karekea akoara irouna.a (TaiAre. 33:12) Ma tera arora ngkana ti namakinna n tabetai ke n taai nako bwa ti aki kimwareirei? Nanon anne bwa ti a kabuaa akoara iroun te Atua? Tiaki ngaia anne. Ti aki kororaoi ao ti rinanon te maraki n te tai teuana ma teuana, te nanokawaki, ao te rawawatannano. E ota n aei Iehova. (TaiAre. 103:14) Ti na maroroakini ngkai baika kona n iraea kimwareireira ao arora ni kaoka kimwareireira.

TAI KARIAIA TE BWAI TEUANA BWA E NA IRAEA KIMWAREIREIM

8. Tera aron rotakira ni kangaangan te maiu aei?

⁸ Te tia iraa Na. 1: Kangaangan te maiu aei. Ko rotaki ni mwin te bwainikirinaki, te kabuanibwai ae karina, te maiu ni kainnano, te aoraki, ke te kara? A kai bua kimwareireira ngkana ti boo ma aeka ni kangaanga aikai, moarara riki ngkana ai bon akea ara aanga n totokoa te bae ti rinanona. E kakoauaaki naba n te Baibara ae “ngkana e nanokawaki te aomata ao e bwara nanona iai.” (TaeRab. 15:13) E taku Babis ae te unimwaane n te ekaretia are e mate tarina ao ana karo i nanon aua te ririki: “I namakinna ae I a tiku n tii ngai ao akea te bae I konaa ni karaoia. Iai taai ake I karawawataaki iai, ibukina bwa a bati baika I kabokorakora ma ngaai ao e a aki reke au tai ma au karo ao tariu imwaini mateia.” A kona kangaangan te maiu aei n rotakibuaka iai rabwatara ao ara iango.

9. Tera ae kona ni buokira ni kaoka kimwareireira? (Ieremia 29:​4-7, 10)

⁹ Tera ae kona ni buokira ni kaoka kimwareireira? Ti kona ni kaoka kimwareireira ngkana ti kataneiaira ma baika riki nakoira ngkai ao ni kakaitau. E a taabangaki ngkai te iango ae e riai ni kororaoi kukureira ni maiura aei. Ma bon tiaki anne te koaua. N te katoto, e tua Iehova nakoia I-Iutaia ake a kairaki bwa taenikai i Baburon bwa a na kataneiaia ma te maiu n taenikai n te aba are a iruwa iai, ao a na kabanea aia konaa n teimatoa ni kukurei e ngae ngke e kangaanga. (Wareka Ieremia 29:​4-7, 10.) Tera reireiam? Kataneiako ma baika ko rinanoi ngkai, ao kakaitau ni baika raoiroi aika riki ni maium. Uringnga are e na boni buokiko Iehova. (TaiAre. 63:7; 146:5) E taku Effie are e rinanon te kangaanga ae karina ao e a aki kona iai ni kakammwakuri: “I karekea te ibuobuoki ao te boutoka ae bati mairoun Iehova, au utu, ao te ekaretia. Ngaia are irou, I kaota te aki kakaitau ngkana I a kabwaraa naba nanou. I kani kaota au kakaitau nakon Iehova ao raoraou ibukin aia ibuobuoki ae korakora.”

10. E aera ngkai ti boni kona ni kimwareirei e ngae naba ngkana ti boo ma kangaanga?

¹⁰ E ngae ngkana e aki nakoraoi maiura ke a riki kabuanibwai nakoira ke nakoia ara utu, ma ti boni kona naba ni kimwareirei.b (TaiAre. 126:5) Bukin tera? Ibukina bwa e aki boboto kimwareireira i aoni baika riki nakoira. E taku te bwaiania ae Maria: “Ngkana ko boo ma kangaanga ao ko teimatoa ni kimwareirei, tiaki nanona bwa ko kakeaa rawawatam. Ma e oti iai bwa ko tuai ni mwaninga ana berita nako Iehova. E na buokira Tamara ni kateimatoa kimwareireira.” Uringa aei, e ngae ngkana a karawawata baika riki ngkai, ma a na bon aki teimatoa ara kangaanga ni kabane, bwa titeboo aroia ma mwaneka ake a tane i aon te bike. E na waekoa n roko te nao ma ni kamaunai ni kabane.

11. E kangaa ana katoto te abotoro Bauro ni kaungako?

¹¹ Ma tera arora ngkana ti a manga iangoia ae a riki ara kangaanga ibukina bwa ti a kabuaa akoara iroun Iehova? E na bae n ibuobuoki iangoan aia katoto ana toro Iehova aika kakaonimaki ake a boo naba ma kangaanga. Iangoa ana katoto te abotoro Bauro. E rineaki iroun Iesu bwa e na uota te koaua “nakoia natannaomata, ao ueea, ao tibun Iteraera.” (Mwa. 9:15) Ai kakabwaiaakira! Ma e bon teimatoa ni boo Bauro ma te kangaanga. (2Kor. 11:​23-27) E nanonaki ni kangaanga ake a inenei n riki nakoni Bauro bwa e a kabuaa akoana iroun Iehova? Bon tiaki ngaia anne! Ni kaitaraana, e oti n nanomwaakana bwa e boni kakabwaiaaki iroun Iehova. (IRom 5:​3-5) Iangoi ngkanne baika riki nakoim. Ko nanomwaaka ma te kakaonimaki n aki ongei kataakim. Ngaia are ko boni kona naba ni kakoauaa ae ko karekea akoam iroun Iehova.

12. E kangaa n iraeaki kimwareireira ngkana a aki koro bukini baika ti kantaningai?

¹² Te tia iraa Na. 2: Baika ko kantaningai aika aki koro bukia. (TaeRab. 13:12) Ti kairaki n tangiran Iehova ao ara kakaitau nakoina bwa ti na katei tiara n ara beku ibukina. Ma a na boni bwara nanora ngkana ti katei tiara aika riaon ara konabwai. (TaeRab. 17:22) E taku te bwaiania ae Holly: “I kani kaea te Kuura Ibukia Taan Uarongorongoa te Tautaeka n Uea, I kani beku i tinanikun abau, ke n ira te kateitei i Ramapo. Ma a a tii bitaki naba bwaai ao a aikoa teke tiau aikai. E boni bwara nanou. E kamarakinano ngkana iai baika ko kani kakororaoi ma ko a aki konaa.” A bati aika namakina naba anne.

13. Ngkana a tiatianaki ara mwakuri ni baika riki nakoira, baikara tiia aika ti kona ni katei?

¹³ Tera ae kona ni buokira ni kaoka kimwareireira? Uringnga ae e aki tuamatoa Iehova. E aki naba tangira te bae e riaon ara konabwai ao e aki boto kakawakira irouna i aoni baika ti kona ni kakororaoi n ara beku ibukina. E tangirira Iehova bwa ti na nanorinano ao ni kakaonimaki. (Mika 6:8; 1Kor. 4:2) E tabe riki ma nanora ao tiaki te bwai ae ti karaoia. E na raoiroi ngkanne ngkana ti kantaningaira naba bwa ti na karaoa ae riaon are e kantaningaia Iehova?c E bon aki! Ngaia are ngkana e tiatianaki arom ni beku iroun Iehova ni baika riki nakoim, kataia kaatuua am iango i aoni baika ko kona ni karaoi. Ko kona ni buokiia rooro n rikirake ke ni kakorakoraia kaara? Ko kona ni katea tiam ae kaungaan temanna, rinanon te tareboon ke te text? E na kakabwaiako Iehova n anganiko te kimwareirei, ngkai ko kakorakorako n uaiakin tiia aika manena ao aika aki riaon am konabwai! Ao tai mwaninga ae e a kaan rokon ana waaki ae boou Iehova ike ti nang kona iai ni beku irouna n aanga aika riaon ara kantaninga! Anne te bae e kaungaaki iai Holly are taekinaki mai mwaina ao e taku neiei: “I iaiango ni kangai, ‘I kona ni karekea te maiu are aki toki.’ Ao N na kona ni kakoroi nanon tiau tabeua n te waaki ae boou man ana ibuobuoki Iehova.”

14. Tera riki ae kona n iraea kimwareireira?

¹⁴ Te tia iraa Na. 3: Uaiakinani baika ti kukurei iai. Iai tabeman aika a kabonganai taabo n reitaki n te intanete ni kauekea iai te iango ae e reke te kukurei ni koaua ngkana a karekei baika kakukureia. A kaungaaki aomata bwa a na moanibwaia aia kaakibotu, te bobobwai, ao te mwamwananga nakon taabo tabeua. E aki bure kakukureiara ni baikai. E karikira Iehova n te aro ae ti na kona ni kukurei ni baika raraoi. Ma a bati aika a noria bwa te baere a taku bwa a na kukurei iai, e riki bwa te tia iraea kimwareireia. E taku Eva ae te bwaiania, “Ngkana ko tii iaiangoi baika ko na kukurei iai, ao ane ko na aki kona n rauaki.” Uaiakinani baika ti na kukurei iai e kona ni kairira nakon namakinan te bwarannano ao te aki kukurei.

15. Tera reireiara mairoun te Uea are Toromon?

¹⁵ Ti kona ni karekei reireiara mairoun te Uea are Toromon ni kaineti ma kananokawakin uaiakinani baika ti kukurei iai. E kataia n ukera te kukurei n arona ni katoka nanona ni baike e tangiri, n aron amwarake aika kangkang, te katangitang ae tangiraoi, ao ai bwaai nako ake e kona ni kabooi n ana mwane n taai akekei. Ma e bon teimatoa naba n aki rauaki. E taku: “E aki rauaki te mata n taraakina, ao e aki naba rauaki te taninga n ongoraeakinana.” (TeMin. 1:8; 2:​1-11) Ana iango te aonnaba aei ni kaineti ma te kimwareirei ni koaua, kaanga ai aron te mwane ni kewe. A taraa ni kakawaki ma a bon aki kona ni karekea nakoim te baere a beritanna.

16. E na kangaa karaoan te mwakuri n anganga nakoia tabemwaang ni kona ni buokira ni kaoka kimwareireira? (Nori naba taamnei.)

¹⁶ Tera ae kona ni buokira ni kaoka kimwareireira? E reireinira Iesu bwa “e kakukurei riki te anga nakon te anganaki.” (Mwa. 20:35) E kangai te unimwaane ae Alekos: “I kaatuua au iango i aoni karaoani baika uarereke ibukia tabemwaang. Ngkana I anganga, e a kangaanga riki irou bwa N na iaiangoai i bon irou, ao anne bukina ae I kimwareirei.” Tera ae ko kona ni karaoia ibukia tabemwaang? Ngkana ko nora temanna bwa iai ana kangaanga, kataia ni kaungaa. Ko na bae n aki kona ni katoki ana kangaanga, ma ko kona ni kabebetea ngkana ko kakauongo nakoina ma te nanoanga, ngkana ko kaotiota te atataiaomata, ao ngkana ko kauringnga ae e na kaaki rawawatana i aon Iehova. (TaiAre. 55:22; 68:19) Ko kona naba ni buokia bwa e na kakaitau riki ngkai e aki kaaki taekana Iehova. (TaiAre. 37:28; Ita. 59:1) Ko kona naba n tuangnga bwa ko kani karaoa te bwai ae manena ibukina, n aroni katauraoani kanana ke ko na iria n rianna ni kamarurung. Kaoia bwa e na toaniko n te mwakuri ni minita, bwa e aonga ni kukurei naba. Kariaia bwa ko na riki bwa te bwai ni mwakuri i nanoni bain Iehova. Kaatuuan ara iango i aoia tabemwaang ao tiaki i aora, e na bon anganira te kimwareirei ni koaua!​—TaeRab. 11:25.

17. E kangaa n irekereke kimwareireira ma Iehova? (Taian Areru 43:4)

¹⁷ Ti kona ni kukurei ni koaua ngkana ti teimatoa ni kaanira ma Tamara are i karawa. E karaui nanora te Baibara bwa bon Iehova ‘nibwani kimwareireira ae bati.’ (Wareka Taian Areru 43:4.) Ngaia are n aki ongeia bwa tera ae ti rinanona ni maiura, ma a boni kona naba n rau nanora. Ti bia kaatuua ara iango i aon Iehova are ngaia Nibwani kimwareireira!​—TaiAre. 144:15.