“Te Aomata Ngkoe ae Ko Rangi ni Kakawaki”!

1-2. Ti na kangaa ni kakoauaa ae ti rangi ni kakawaki i matan Iehova?

TABEMAN i buakoia ana aomata Iehova aika rangi ni kakawaki, a iangoiia bwa a mangori. Tao iai ae e a tia ni karaoa ae aki riai nakoia ni kamangoriia iai. E a tia naba n riki anne nakoim? Ngkana eng, ko na kangaa ni kakoauaa ae ko rangi ni kakawaki i matan Iehova?

² Ko kona n noria ae e ibuobuoki iaiangoan rongorongo aika n te Baibara, aika kaota aron Iehova n iangoiia aomata. E karineia aomata Natina are Iesu. Ni karaoan anne, e kaotia iai bwa a rangi ni kakawaki irouna ao Tamana aomata aika mangori aika namakinna bwa akea bongaia. (Ioa. 5:19; Ebera 1:3) N te kaongora aei, ao ti na rinanon: (1) aron Iesu ni buokiia aomata n ataa kakawakia ao (2) arora ni kona ni kairira bwa ti na kakoauaa ae ti rangi ni kakawaki i matan te Atua.​—Akai 2:7.

ARON IESU NI BUOKIIA AOMATA N ATAA KAKAWAKIA

3. Tera are e karaoia Iesu nakoia I-Kariraia ake a kawaria ibukini buokaia?

³ Ni katenuani mwanangan Iesu n uarongorongo i Kariraia, ao a uarurung aomata nakoina n taabo ake e roko iai bwa a na ongora ao ni kamarurungaki. E noriia Iesu bwa “a karawawataaki ma ni kananoanga, ao a uamaenako n aroia tiibu aika akea te tia kawakinia.” (Mat. 9:36; nori taian study note n te nwtsty-E) A iangoaki aomata aikai irouia mataniwi n aia Aro bwa a mangori, ao a arania naba bwa a “maraia.” (Ioa. 7:​47-49; te study note) Ma e karineia aomata aikai Iesu n arona ni karekea ana tai n reireinia ao ni kamarurungia man aorakia. (Mat. 9:35) Ma ibukini buokaia aomata riki aika bati, e a kataneiaia ana abotoro bwa a na uataboa te mwakuri n uarongorongo, ao e angania mwaakaia ni kamarurungia aika aoraki ao aika toabuaka bwain rabwataia.​—Mat. 10:​5-8.

4. Tera reireiara man aron Iesu nakoia naake a mangori ake a ongora irouna?

⁴ E kaotia Iesu bwa a rangi ni kakawaki irouna ao iroun Tamana aomata aika iangoaki bwa a mangori, n arona ni karineia ao ni mutiakinia naake a ongora irouna. Ngkana ko beku iroun Iehova ma raraomaeakinan ae ko kakawaki ke ko aki, iaiangoa aron Iesu n tabeakinia naake a mangori ake a kan reireinaki irouna. Karaoan anne e na kona ni buokiko n noria ae ko rangi ni kakawaki i matan Iehova.

5. Kabwarabwaraa ana kangaanga aineni Kariraia are kaitiboo ma Iesu.

⁵ E aki tii reireinia aomata aika bati aika ikotaki Iesu, ma e tabeakinia naba n tatabemania nako. N te katoto, ngke e karaoa ana mwakuri ni minita Iesu i Kariraia ao e a kaitiboo ma te aine ae nraraa i nanon 12 te ririki. (Mareko 5:25) Ibukina bwa e iangoaki neiei i aan te Tua bwa e kamwara, e na kamwara naba ane e ringnga. E bae n rangi ni kangaanga reitakina ma aomata ibukin aorakina aei. Tiaki tii ngaia, ma e aki naba kona neiei n raonia aomata ni kauringi ao ni bukamarui botaki n taromauri. (NakIbo. 15:​19, 25) E boni bae n rotakibuaka rabwatana ma ana iango n aorakina aei.​—Mareko 5:26.

6. E kangaa ni kamarurungaki te aine are nraraa?

⁶ E tangiria ni kamarurungaki iroun Iesu te aine ae karawawataaki aei. Ma e aki kawara raoi Iesu. Bukin tera? Tao e maamaa ke e bwainrang n aorakina. Ke tao e maaka ae e na katinanikua Iesu ibukina bwa e mena i buakoia aomata ao e kamwara i aan te Tua. Ngaia are e a tii ringa naba ana kauaatao ma onimakinan ae e na boni kamarurungaki tii mani karaoan anne. (Mareko 5:​27, 28) E reke kaniwangan ana onimaki bwa e kamarurungaki. Ma ngke e titiraki Iesu bwa antai ae e ringnga, ao e a kaota neiei te baere e karaoia. Ma tera aron Iesu nakon neiei?

7. Tera aron Iesu nakon te aine are rangi ni karawawataaki? (Mareko 5:34)

⁷ E bwaina te akoi ao te karinerine Iesu nakon neiei. E noria Iesu bwa e “maaku neiei ao e rurubenebene.” (Mareko 5:33) E ota n ana namakin ngaia are e a taetae ni karaua nanona. E weteia ni kangai “natiu,” ae te taeka ae oti iai te tangira ae irianaki ma te karinerine, te akoi, ao te atataiaomata. (Wareka Mareko 5:34.) E taekinaki n te study note ibukin te taeka aei ae “bon tii aei te tai ae wetea iai te aine Iesu bwa ‘natiu,’ tao ibukina ngke e kakaiaki ana kangaanga neiei ao e ‘rurubenebene.’ ” Iangoa aron raun nanon neiei! Ngke arona bwa e aki taetae Iesu ni karaua nanona, e na boonako ma te marurung ma e na bon rawawata nanona n ana bure. Ma e buoka neiei Iesu bwa e na ataia ae bon natin te Tama ae tatangira are i karawa ngaia, ao e rangi ni kakawaki.

8. Baikara ana kangaanga te tari te aine are mai Brazil?

⁸ Iai naba tabeman ana toro te Atua ni boong aikai aika karawawataaki n aorakia ao a iangoia bwa akea bongaia. E bungiaki ni bwaibwainnanti Mariaa ae te bwaiania ae katoatai mai Brazil, ae akea rangana ao baina are te maing. E kabwarabwaraa ni kangai: “I aki toki ni bwainikirinaki n te reirei ibukini mwaukuu aei. A aranai n aara aika kammaraki. Ao a iangoia naba au utu bwa akea bongau.”

9. E kangaa ni buokaki Maria bwa e na iangoia ae rangi ni kakawaki iroun Iehova?

⁹ E kangaa ni buokaki Maria? Ngke e riki bwa temanna Ana Tia Kakoaua Iehova, ao e a kabebeteaki irouia raona ni Kristian, ao a buokia bwa e na iangoia i bon irouna n aron ana iango Iehova. E taku neiei: “E aki tau baan au boki ae uarereke aei ngkana N na mwanewei araia naake a a tia ni buokai! I kaitaua Iehova mai nanou n anganakiu au utu n te onimaki aika akea n ai aroia.” A a tia mwaanen ao tarini Maria n te onimaki ni buokia bwa e na kakoauaa ae e rangi ni kakawaki i matan te Atua.

10. Baikara kangaanga ake e karawawataaki iai Maria are te I-Maketara? (Nori naba taamnei.)

¹⁰ Iangoa aron Iesu ni buoka riki temanna te aine ae Maria are te I-Maketara. E taniaki irouia itiman taimonio! (Ruka 8:2) E bae ni kamimi arona ibukina ngke e taniaki irouia taimonio, ngaia are e kakararoaaki irouia aomata. E bae n namakinna n taai ake e karawawataaki iai bwa e katinanikuaki, e aki tangiraki, ao akea ae kani buokia. N taraana ao e kanakoia taimonio ake a karawawataa neiei Iesu, ao e a riki neiei bwa te tia rimwina ae kakaonimaki. E kangaa riki Iesu ni buoka Maria are te I-Maketara bwa e na ataia ae e rangi ni kakawaki iroun te Atua?

11. E kangaa Iesu ni kaotia nakoni Maria are te I-Maketara ae e rangi ni kakawaki iroun te Atua? (Nori naba taamnei.)

¹¹ E kaoa Maria are te I-Maketara Iesu bwa e na raonna ni mwamwanangana n uarongorongo.b Ibukin anne, e teimatoa ni kakabwaiaaki neiei n ongorana n ana angareirei Iesu nakoia aomata. E kaoti naba Iesu nakoina n te bong are e kautaki iai. E mena i buakoia taan rimwini Kristo ake e moan taetae ma ngaiia n te bong naba anne. E mwiokoia naba Iesu bwa e na nako ni kaongoia abotoro ae e a kautaki. E buokaki neiei ni baikai iroun Iesu bwa e na ataia ae e rangi ni kakawaki iroun Iehova!​—Ioa. 20:​11-18.

12. Kabwarabwaraa bwa e kangaa n namakinna Lidia bwa e katinanikuaki.

¹² N aroni Maria are te I-Maketara, a bati naba ni boong aikai aika kabokorakora ma namakinan ae a katinanikuaki. E taku te tari te aine ae mai Tibein ae Lidia, bwa ngke e bikoukouaki ao e iangoia tinana bwa e na kabwakaa. Ngke e uarereke ao e uringnga Lidia ae e aki tabeakinna tinana ao e tataetae n iowawa nakoina. E taku neiei: “Tiau n te maiu aei bwa N na butimwaeaki ao n tatangiraki irouia aomata. I raraoma bwa I tau n tangiraki ke I aki, ibukina bwa I a tia ni kakoauaa iroun tinau bwa bon te aomata ngai ae I buakaka.”

13. Tera are e buoka Lidia bwa e na ataia ae e rangi ni kakawaki iroun Iehova?

¹³ Ngke e a reke te koaua iroun Lidia, ao e a buokaki n ataia ae e rangi ni kakawaki i matan Iehova, rinanon ana tataro ma ana ukeuke n reirei i bon irouna, n ikotaki naba ma aia taeka ao aia mwakuri n akoi raona ni Kristian. E taku neiei: “E aki toki buu n tutuangai ae e rangi n tangirai. E okioki ni kauringai aroarou aika raraoi. Ao anne naba aroia raoraou ake tabemwaang.” Ko kona n iangoia bwa antai ae e kainnanoa kauringaana ae e rangi ni kakawaki i matan Iehova?

ARORA N TARAIRA N ARON TARAAKIRA IROUN IEHOVA

14. E kangaa 1 Tamuera 16:7 ni buokira n nora aron Iehova n iangoiia aomata? (Nora naba te bwaoki ae “Bukin Tera Ngkai A Kakawaki Iroun Iehova Ana Aomata?”)

¹⁴ Uringnga are e aki taraiko Iehova n aron taraakim irouia kaain te aonnaba aei. (Wareka 1 Tamuera 16:7.) E aki kabotoa kakawakim i aon taraakim, kinaakim, ke am reirei. (Ita. 55:​8, 9) Ngaia are tai kabotoa naba iangoani kakawakim i aon aia kaetieti kaain te aonnaba aei, ma kabotoa i aon ana kaetieti nako Iehova. Ko bae n tia ni wareki rongorongo man te Baibara ake e oti iai ae a kakawaki iroun Iehova aomata ake a raraoma bwa a kakawaki ke a aki, n aron Eria, Naomi, ao Anna. Ko na bae naba ni kani korei baike a riki nakoim ae ko kakoauaa iai ae e bon tangiriko Iehova ao ko kakawaki irouna. Irarikin anne, ko kona naba n rinanoi baika kakawaki i aan te atu n reirei ae bonganam, n ara boki aika katauraoaki.c

15. Bukin tera Iehova ngke e iangoa Taniera bwa ‘te aomata ae rangi ni kakawaki’? (Taniera 9:23)

¹⁵ Uringnga ae e boto kakawakim i matan Iehova n am kakaonimaki. N te taina ngke tao ai 90 tabun ana ririki te burabeti are Taniera, ao e namakinna ae e “a rangi ni kua” ao ni bwara nanona. (Tan. 9:​20, 21) E kangaa Iehova ni kaungaa? E kanakoa te anera are Kabiriera te Atua bwa e na kauringa Taniera ae ‘bon te aomata ngaia ae rangi ni kakawaki’ ao e ongoraei ana tataro. (Wareka Taniera 9:23.) Tera ae karika Taniera bwa e na rangi ni kakawaki iroun te Atua? Bon aroarona aika bati, n aron tangiran te raoiroi irouna ao kakaonimakina. (Etek. 14:14) E kawakina te rongorongo anne Iehova n ana Taeka ibukini kabebeteara. (IRom 15:4) E ongoraei naba Iehova am tataro ao ko kakawaki irouna ibukina bwa ko tangira te bae eti ao ko kakaonimaki n am beku irouna.​—Mika 6:​8, kbn; Ebera 6:10.

16. Tera ae kona ni buokiko bwa ko na taraa Iehova bwa te Tama ae tatangira?

¹⁶ Taraa Iehova bwa kaanga te Tama ae tangiriko. E kani buokiko ao e aki kan ukera kairuam. (TaiAre. 130:3; Mat. 7:11; Ruka 12:​6, 7) A bati aika kananoa aia iango i aon anne, ao a buokaki iai ma namakinan ae akea bongaia. N te katoto, iangoa te tari te aine mai Tibein ae Eliana are namakinna bwa e katinanikuaki ao ni kakeaaki bongana irouni buuna i nanon ririki aika bati. E taku neiei, “Ngkana I namakinna ae ai akea bongau, ao I a kataia naba ni kataamneia Iehova bwa e uouotai ni baina, ibukina bwa e tangirai ao e kani kamanoai.” (TaiAre. 28:9) E kauringnga i bon irouna ni kangai te tari te aine mai Aberika Maiaki ae Lauren, “Ngkana e a tia Iehova ni kaota akoau ni katikai nakoina ni bwaai ni kabaebae aika bwain te tangira, ni kaaniai ma ngaia i nanon ririki aikai, ao ni kabonganaai naba n reireinia aomata, nanona ngkanne bwa I boni kakawaki ao ni bongana irouna.”​—Otea 11:4.

17. Tera ae kona ni buokiko ni kakoauaa ae ko akoaki iroun Iehova? (Taian Areru 5:12) (Nora naba te taamnei.)

¹⁷ Kakoauaa ae ko akoaki iroun Iehova. (Wareka Taian Areru 5:12.) E kabotaua Tawita akoakira iroun Iehova ma “te otanga ae bubura” ae kamanoia aomata aika raoiroi. E kona ni kamanoko ataakin ae ko akoaki iroun Iehova ao e boutokaiko, bwa ko na aki taonakinako n iangoan ae akea bongam. Ko na kangaa n ataia ae ko akoaki iroun Iehova? N aron ae ti a tia n noria, e anga ana karaunano Iehova rinanon ana Taeka. Tiaki tii ngaia ma e kabonganaia naba unimwaane n te ekaretia, raoraom ni kaan, ao tabemwaang riki, ni kauringko ae ko rangi ni kakawaki i matana. Tera arom nakon te aeka ni kaunganano anne?

18. E aera bwa ko riai ni butimwaei taeka ni kamoamoa ibukim?

¹⁸ Tai kakeai bongan taeka ni kamoamoa mairouia akana kinako ao n tangiriko. Ururingnga are e kona Iehova ni kabonganaia bwa a na buokiko ni kakoauaa ae ko akoaki irouna. E taku Eliana are taekinaki mai mwaina: “Teutana imwin teutana ao I a kona riki ni butimwaei raoi taeka n akoi mairouia tabemwaang nakoiu. E boni kangaanga, ma I ataia ae aei te bae e tangiria Iehova bwa N na karaoia.” E a tia Eliana ni buokaki man aia kakorakora unimwaane n te ekaretia ae anaaki n te tangira. E a beku ngkai neiei bwa te bwaiania ao e ibuobuoki n te Betaera man te tabo ae tionako.

19. Bukin tera bwa ko kona ni kakoauaa ae ko rangi ni kakawaki i matan te Atua?

¹⁹ E kauringira Iesu ma te akoi ae ti rangi ni kakawaki iroun Tamara are i karawa. (Ruka 12:24) Ngaia are ti kona ni kakoauaa raoi ae e bon taraira Iehova bwa aomata aika rangi ni kakawaki. Ti bia aki mwamwaninga anne! Ao ti bia kabanea ara konaa ni buokiia tabemwaang n noria ae a rangi ni kakawaki naba i matan te Atua!