Titiraki Mairouia Taani Wareware
Tera te “iango” ae e na kaaki Iehova i nanoia natannaomata n te tai ae imwaira?
E kangai Te Kaotioti 17:16, 17 ni kaineti ma moanakin te rawawata ae korakora: “A na ribaa te kabekaau, kooro ake tengaun ake ko nori ma te man ae tiritiri, ao a na kuribwaia ma ni buuta karabaana, ao a na kana irikona ao a na kabuekia ni kabanea n te ai. Bwa e kaaki i nanoia te Atua te kani kakoroa bukin ana iango, eng, a na kakoroa naba bukin aia iango ae tii teuana aei n aroia n angan te man are tiritiri aia tautaeka n uea.” N taai ake rimoa, ao e tataekinaki n ara boki bwa te “iango” are e na kaaki Iehova i nanoia natannaomata, boni kamaunaaia Aaro aika kewe.
Ma e a kainnanoaki kaetan aei. Te “iango” ae e na kaaki Iehova i nanoia natannaomata bon “[anganakin] te man are tiritiri aia tautaeka n uea.” Ngkana ti na ota bwa e na kangaa ni kakororaoaki nanon aei, ti na iangoi titiraki aikai.
Antai raoi taekaia ae n te taetae ni burabeti aei? E aranaki naba “te kabekaau” bwa “Baburon ae Kakannato,” ao e tei te kabekaau ibukin te botaki n Aro ae kewe ae katobibia te aonnaba. E tei “te man ae tiritiri ae uraroo” ibukin te botaki ae boutokaa te rau are e moana teina n 1919, ae ataaki bwa te League of Nations ao ni boong aikai ai manga te United Nations. (TeKao. 17:3-5) A tei “kooro ake tengaun” ibukia tautaeka nako aika boutokaa te man ae tiritiri.
Tera irekereken te kabekaau ma te man ae tiritiri ae uraroo? E “tekateka” te kabekaau i aon te man ae tiritiri, ae nanona bwa e boutokaa te man ae tiritiri ao e kairiria bwa e na karaoa nanona.
Tera ae e na riki nakon te kabekaau? A “na ribaa te kabekaau” te man ae tiritiri ao “kooro ake tengaun” aika boutokaia ngkai. E na oti aia riribai ngkana a kuribwaia kaubwaina ao ni kaota buakakana. Ao a na kakororaoa ana motikitaeka Iehova ibukin neiei, are e na kamaunaaki n aki toki. (TeKao. 17:1; 18:8) Anne tokia botaki n Aro aika kewe. Ma imwain rikin anne, ao e na kairiia natannaomata Iehova bwa a na karaoa te bwai ae tuai man riiriki mai mwaina nakoia tautaeka n aomata.
Tera ae e na kairiia natannaomata Iehova bwa a na karaoia? E na kaaki i nanoia kooro ake tengaun “ana iango” ae a na “angan te man are tiritiri [ae uraroo]” ae taekan te United Nations, mwaakaia ao mwaakaia n tautaeka. (TeKao. 17:13) Iangoia bwa tera ae nanonaki n anne. A na kona tautaeka n aomata n iangoia i bon irouia bwa a na angan te man are tiritiri mwaakaia, ao mwaakaia n tautaeka? A aki! E kaotaki n te taetae ni burabeti bwa e na boni kairiria te Atua bwa a aonga ni karaoa anne. (TaeRab. 21:1; kabotaua ma Itaia 44:28.) E na riki aei nakoia tautaeka teutana imwin teutana? Tiaki ngaia anne! E teretere bwa bon te bitaki ae e na karina ao ni baitii. Ao te man are tiritiri are e a tibwa anganaki mwaakana, e nang kakororaoa ngkanne ana motikitaeka Iehova i aoia botaki n Aro aika kewe, n arona ni kamaunaia n aki toki.
Tera ngkanne ae ti kantaningaia? Tiaki nanona bwa ti nang kakantaningai rongorongo aika kaota aroia tautaeka n aomata ni moanna ni boboutokaa te United Nations. Aio te bae ti kona ni kantaningaia: N te tai ae karina ao ni baitii, ao e nang kaaki Iehova i nanoia natannaomata bwa a na angan te man ae tiritiri mwaakaia. Ngkana e riki anne, ti na ataia iai bwa e a moanaki te rawawata ae korakora. Ma n te tai aei moa ti bia “taratara ao ni kawanawanaira” ngkai a a kaan rikini bitaki aika karina.—1Tet. 5:6.