Ko na Kangaa ni Kaota Am Kakaitau Ibukin te Kaboomwi?

1-2. Tera ae ti riai ni kairoroaki bwa ti na karaoia ibukin ana karea ni kaboomwi Iesu, ao bukin tera? (2 I-Korinto 5:14, 15) (Nora naba te taamnei.)

NGKANA ko a tia ni kamaiuaki mai aan mmwammwan atibun te kateitei ae ingunako, tiaki ae ko na namakinna ae ko taarau iroun te aomata are kamaiuko? E ngae ngke iai naba tabeman aika kamaiuaki, ma ko na boni kani kaota ngkoe am kakaitau, ni kaotia ae ko aki kakeaa bongani kamaiuam.

² E kabwarabwaraaki n te kaongora are mai mwaina ae ti aki kona ni kamaiuira i bon iroura mani mwin nako rikiara ae te bure. Ma e kona ana karea ni kaboomwi Iesu ni kamaiuira rinanoni katauraoani (1) kabwaraan ara bure ake ti karaoi (2) te kantaninga ae kamarurungara raoi man rikiara ae te bure, ao (3) raoiakinara ma te Atua. Ibukin aei, ti a karekea kantaningaan te maiu are aki toki n ana aonnaba ae boou Iehova. Ni koauana, e oti ana tangira Iesu ibukia aomata n te kaboomwi, ae te tangira ae e a kamani kaotia imwaini bungiakina bwa te aomata ae kororaoi. (TaeRab. 8:30, 31) E koreia te abotoro Bauro ae “e kairoroira ana tangira te Kristo.” (Wareka 2 I-Korinto 5:14, 15.) Nanon aei bwa e riai ni kairira ana tangira Iesu bwa ti na kaotia n aanga tabeua ae ti aki kakeaa bongan ana karea ni kaboomwi.

3. Bukin tera ngkai e kona ni kakaokoro aron temanna ma temanna ni kaota ana kakaitau ibukin te kaboomwi?

³ Ko na kangaa ni kaota am kakaitau ibukin te kaboomwi? E bae ni kaokoro am kaeka ma te aomata riki temanna. Ngkana ti na kabwarabwaraa bukina, iangoiia aomata aika teniman aika titeboo te tabo ae a na nako iai, ma e kakaokoro te kaawa ae a na mwananga mai iai. E na kakaokoro kawaia aika a na toua. N aron anne, te kawai ae ko na toua nakon te tabo ae ko nako iai ke tiam ae ko na kaota iai am kakaitau ibukin te kaboomwi, e boboto i aon aron am iraorao ngkai ma Iehova. N iaiangoan anne, e na maroroakinaki n te kaongora aei kurubu n aomata aika tenua: (1) Naake a reirei n te Baibara, (2) Kristian aika tia ni bwabetitoaki, ao (3) tiibu aika a tiotionako man te nanai.

NAAKE A REIREI N TE BAIBARA

4. Tera ana namakin Iehova ibukia naake a reirei n te Baibara?

⁴ Ngkana ko reirei n te Baibara, iangoa aei: Butimwaean te rongorongo ae raoiroi iroum e oti iai bwa boni ngkoe temanna i buakoia naake e katikiia Iehova bwa a na karekea aia iraorao ma ngaia. (Ioa. 6:44; Mwa. 13:48) “Bon te tia tuoi naano Iehova.” Nanon aei bwa e nora am kakorakora n reiakina taekana, ao e kimwareirei n nora rikirakem ngkai ko karaoi bitaki ni maium ni kaboraoia ma ana kaetieti. (TaeRab. 17:3; 27:11) E karekea te anga ibukim te kaboomwi bwa ko na karekea am iraorao ae kaan ma Iehova. (IRom. 5:10, 11) Tai kakeaa bongan anne.

5. A na kangaa naake a reirei n te Baibara ni maiuakina te kairiri are n I-Biribi 3:16?

⁵ Ko na kangaa ni kaota am kakaitau ibukin te kaboomwi ngkai ko reirei n te Baibara? Te anga teuana ngkana ko ongeaba n ana reirei ni kairiri te abotoro Bauro nakoia I-Biribi ae kangai: “Ti na nakonako n te aro ae riai n aron ae ti a tia n rikirake iai, ma n teimatoa n te waaki aei.” (IBir. 3:16) E kangai te kibu aei n te rairai n te Baibara teuana: “Ti riai n teimatoa ni waakinako n te kawai ae ti tabe n toua ngkai.” Ni kaineti ma te reirei ni kairiri anne, tai kariaia te bwai teuana bwa e na tuka nakonakom n te kawai nakon te maiu.—Mat. 7:14; Ruka 9:62.

6. Tera ae a kona ni karaoia naake a reirei n te Baibara ngkana e kangaanga irouia karaoani bitaki? (Te Tua-Kaua 30:11-14) (Nora naba te taamnei.)

⁶ Tera arom ngkana e kangaanga iroum butimwaean te reirei n te Baibara teuana ae ko a tibwa reiakinna? Karaoa am kakaae i aon te reirei anne, ao tataro nakon Iehova bwa ko aonga n ota raoi iai. (TaiAre. 86:11) Ngkana e boni kangaanga naba otam n te reirei anne, katikua moa ma tai katoka am reirei n te Baibara. Tera arom ngkana e kangaanga iroum katokani karaoan te bwai teuana ae kabuakakaaki n te Baibara? Uringnga ae e aki kona Iehova n tuangia aomata aika aki kororaoi bwa a na karaoa ae a aki kona ni karaoia. Ko kona ni maiuakin ana kaetieti. (Wareka Te Tua-Kaua 30:11-14.) Ao e berita Iehova bwa e na buokiko. (Ita. 41:10, 13; 1Kor. 10:13) Ngaia are tai kabwaraa nanom. N oneani mwin ae ko na iaiangoa te kangaanga ae ko boo ma ngaia, kaatuua am iango i aon am kakaitau ibukini bwaai ni kabane ake e a tia ni katauraoi Iehova, n ikotaki naba ma te babaire ibukin te kaboomwi. Ngkana e a rikirake tangiran Iehova iroum, ane ko nang noria ae “a aki rawawata ana tua.”—1Ioa. 5:3.a

7. Tera ae a kona n iaiangoia rooro n rikirake aika kaikawaaki n te koaua?

⁷ Tera aromi ngkami rooro n rikirake aika kam kaikawaaki n te koaua? Kam reirei naba n te Baibara. Ni koauana, ngkami aia reirei n te Baibara ami karo, aika kam rangi ni kakawaki. E kangai te Baibara: “Kaania te Atua, ao ane e na kaaningkami.” (Iak. 4:8; 1Rong. 28:9) Ngkana ko biririmoa ni kaania Iehova, e na manga kaaniko. E aki iangoiko Iehova bwa bon tii kaain te kurubu teuana ngkoe. E katika temanna ma temanna nakoina, n ikotaki naba ma naake a kaikawaaki n te koaua. Tera ae reke iai am iraorao ma Iehova? Bon te kaboomwi, ae te bwai ae ko aki riai ni kakeaa bongana. (IRom 5:1, 2) Ngaia are imwaini kaean te Kauring n te ririki aei, e aera ko aki iaiangoa te bae kona n reke iroum ni maten Iesu? Ko bia kairoroaki n iaiangoan anne bwa ko na kakorakorako ni karokoko n tiam n te onimaki are imwina, ni kaota iai am kakaitau n te kaboomwi are e katauraoia Iehova rinanon Natina.b

KRISTIAN AIKA TIA NI BWABETITOAKI

8. A kangaa Kristian aika a tia ni bwabetitoaki ni kaotiota onimakinan te kaboomwi?

⁸ Ngkana te Kristian ngkoe ae ko a tia ni bwabetitoaki, ko a tia ni kaotiota onimakinan te kaboomwi n aanga aika bati. N te katoto, ko karaoi mwaneka bwa ko aonga ni kaania Iehova ao ni kaboraoa maium ma ana kaetieti. Ko ongeaba n ana tua Iesu ae karekeaia taan rimwini Kristo n arom n tibwaa am onimaki nakoia tabemwaang. Ko katabua maium nakon Iehova ao ni bwabetitoaki. Ko a tia ni boo ma te kakaaitara ibukina bwa ko tei ibukin te taromauri ae itiaki? (2Tim. 3:12) E oti n nanomwaakam ma te kakaonimaki bwa ko tangira Iehova ao ko kakaitau ibukin te kaboomwi are e katauraoia rinanon Natina.—Ebera 12:2, 3.

9. Tera te kabuanibwai ae a riai n taratara raoi iai Kristian aika a tia ni bwabetitoaki?

⁹ Ngkai Kristian ngaira aika ti a tia ni bwabetitoaki, ti riai n taratara raoi man te kabuanibwai teuana. Ni waakinakon te tai, ti kona ni kakeaa bongan te kaboomwi. E na kangaa n riki anne? Iangoa aroia Kristian n te moan tienture ake i Ebeto. E kamoamoaia Iesu imwini kautakina ibukin nanomwaakaia. Ma e taku nakoia: “Iai te bwai ae N na waeiko iai, bwa ko a tia ni kabuaa te tangira are reke iroum n te moantai.” (TeKao. 2:3, 4) N aron ae oti n ana taeka Iesu, e kona ana taromauri te Kristian n riki bwa kaanga te bwai ae kakaraoia ma akea nanona iai. E kona te aomata anne n tatataro, n nanako n taromauri, ao n uataboa te mwakuri ni minita, ma e karaoia bwa e a taneiai iai. E a aki kairaki n te tangira. Tera ae ko kona ni karaoia ngkana ko namakinna bwa ai tiaki aroni korakoran tangiran Iehova iroum n aron are mai mwaina?

10. Ko na kangaa n ‘iaiangoa’ am beku ni Kristian ao ni “kabanea nanom iai”? (1 Timoteo 4:13, 15)

¹⁰ E tuangaki Timoteo iroun te abotoro Bauro bwa e na ‘iaiangoa’ ana beku ni Kristian ao e na ‘kabanea nanona iai.’ (Wareka 1 Timoteo 4:13, 15.) Ni kaineti ma te reirei ni kairiri anne, kataia n iangoi aanga aika ko kona ni kateimatoa ingaingam n am taromauri bwa ko aonga ni kona n “ingainga rinanon taamnein te Atua.” (IRom 12:11; nora te study note i aon “Be aglow with the spirit.”) N te katoto, tao ko kona ni kanakoraoa riki arom n ongongora n tain te taromauri n arom ni katauraoi raoi imwaina. Ke ko kona ni karekea riki kakabwaiaam man am ukeuke n reirei i bon iroum n arom ni karekei taai aika ko na tiku iai n tii ngkoe bwa ko aonga ni kananoa am iango i aoni baika ko ukeuke iai. N aron ae ko kakarea kanaan te ai bwa e aonga n teimatoa n ura, ko riai n teimatoa ni karaoi baikai bwa ko aonga ni manga kaota am kakaitau ni bwaai ni kabane ake e a tia Iehova ni katauraoi n ikotaki ma te kaboomwi. E aera naba ko aki kabonganai wiki ake imwain te Kauring ni kananoa am iango i aoni kakabwaia aika okoro aika ti karekei, ngkai Ana Tia Kakoaua Iehova ngaira? Ko na buokaki iai ni karikirakea am kakaitau ibukin te kaboomwi are ngaia ae reke iai am iraorao ma Iehova.

11-12. Ngkana e bua ingaingam i nanon te tai ae maan teutana nanona ngkanne bwa ai akea taamnein te Atua iroum? Kabwarabwaraa. (Nora naba te taamnei.)

¹¹ Ngkana ko aki namakina te ingainga n aron are mai mwaina ibukin te taromauri ae koaua i nanon te tai ae maan teutana, tai kabwaraa nanom ke n iangoia bwa ai akea taamnein te Atua iroum. Uringa te baere e koreia te abotoro Bauro nakoia I-Korinto ibukin ana mwakuri ni minita: “Ngkana I ekaanako nanou ni karaoia, ao bon tii te arona naba, bwa iai te mwioko are I anganaki.” (1Kor. 9:17) Tera ae e nanonna?

¹² E namakinna n tabetai Bauro bwa ai akea nanona ni kan uarongorongo. Ma e ngae n anne, e motinnanoia bwa e na botumwaaka n ana mwakuri ni minita n aki ongea ana namakin n te tai anne. Ko kona naba ni motinnanoa anne. Motinnanoia bwa ko na karaoa te bwai ae eti e ngae ngkana akea nanom ni kani karaoia. Ngaia are tataro bwa ko aonga ni karekea ‘nanom ma ni mwakuri.’ (IBir. 2:13) Kamarurungko n irira am babaire ibukin am onimaki. Onimakinna ae i nanon taina ao e na rotaki am namakin n am mwakuri ao ane e na manga rikirake te tangira are i nanom.

13. Ti na kangaa n teimatoa n tuoira bwa ti “mena n te onimaki” ke ti aki?

¹³ E raoiroi ngkana ti tutuoira i bon iroura n te tai teuana ma teuana n aron are ti tuangaki n 2 I-Korinto 13:5: “Teimatoa n tuoingkami bwa kam mena n te onimaki ke kam aki ao teimatoa n tuoingkami bwa tera aromi.” Ti kona n titirakinira titiraki n aron aikai: ‘I moanibwaia te Tautaeka n Uea ni maiuu?’ (Mat. 6:33) ‘E oti n rinean au kaakibotu bwa I ribaa te bwai ae buakaka?’ (TaiAre. 97:10) ‘I boutokaa te rau ao te katiteuanaaki i buakoia raou n te onimaki?’ (IEbe. 4:2, 3) N tain te Kauring ae te botaki ae ti iaiangoa riki iai te bae e katauraoia Iehova ae te kaboomwi, e a reke iai ara tai n tuoira i bon iroura ao n taraia raoi bwa ti maiu ibukin Iesu ao tiaki i bon ibukira.c

TIIBU AIKA TIOTIONAKO

14. Tera ae kona ni kairiia Kristian tabeman bwa a na tiotionako man te nanai?

¹⁴ Iai tabeman Kristian aika katoka ikoikotakia ma kaain te ekaretia i nanon iraua te namwakaina ke imwin aia beku ma te kakaonimaki i nanon ririki aika bati. Bukin tera? Iai tabeman aika taonakinako n “raraomaeakinani bwain te maiu aei.” (Ruka 21:34) Ake tabeman a mamaara n ana taeka ke n te bae e karaoia raoia n te onimaki temanna. (Iak. 3:2) Ma iai naba tabeman aika kakaraoa te bure ae kakaiaki ma a tuai kani kakaaea buokaia. N aki ongeia bwa tera bukina, tera ae ko kona ni karaoia ngkana ko a tiotionako man te nanai? Tera ae kona ni kairoroko bwa ko na karaoia ibukin te babaire ae tatangira ae te kaboomwi?

15. E kangaa Iehova ni kaotia bwa e tabeakinia tiibu aika tiotionako? (Etekiera 34:11, 12, 16)

¹⁵ Iaiangoa aron ana namakin Iehova ibukia naake a tiotionako. E aki kaaki taekaia. Ma e kakaaeia tiibu aika bua. E kaamwarakeia ao e buokiia bwa a na okiria. (Wareka Etekiera 34:11, 12, 16.) E kona Iehova ni karaoa naba anne ibukim? Eng! Warekan te kaongora aei e kaotia ae nanom te kani karaoa ae raoiroi. Ngkai e nora nanom Iehova ao e katikiko nakon te koaua, tiaki e kona ni manga katikiko bwa ko na okiria?

16. Tera ae kona ni buokiia tiibu aika bua bwa a na okira Iehova? (Nora naba te taamnei.)

¹⁶ Iai n te boroutia ae Okira Iehova taeka aika kaunganano aikai: “Kakoauaa raoi ae e na boni butimwaeiko Iehova ngkana ko okiria. E na buokiko n tokanikai i aon te raraoma, te marakinnano ao karekean te rau n ara iango ao nanora, are nako man itiakin te mataniwinnano. Imwin anne, ko a kona ni manga tangira te kani beku ma tarim n te onimaki ibukin Iehova.” Uringnga naba ae a ingainga unimwaane ni kani buokiko. A kona n riki bwa “kaanga ai aron te tabo ni katantan man te ang, ao te tabo ni kamanomano man te karau ae korakora.” (Ita. 32:2) Ibukini kaotan am kakaitau ibukin te kaboomwi, titirakiniko aei, ‘Baikara mwaneka aika I riai ni karaoi ngkai ni “kaetii bwaai” ma Iehova?’ (Ita. 1:18; 1Bet. 2:25) N te katoto, ko kona ni kaea te taromauri n te Tabo n Taromauri? Ko kona ni kawara temanna i buakoia unimwaane ao ni butiia buokan am onimaki ae kona naba n nanonaki iai te reirei n te Baibara ae katoatai i nanon te tai ae maan teutana? Ko kona ni kakoauaa ae e na kakabwaiaa Iehova am kakorakora n tataro ni kaota am kakaitau ibukin ana kaboomwi Natina.

TERA AE KO NA KARAOIA?

17-18. Ti na kangaa ni kabongana raoi ara tai imwain te Kauring n te ririki aei?

¹⁷ E taekinna Iesu bwa e katauraoaki te kaboomwi “bwa e aonga n aki kamaunaaki ane e onimakinna, ma e na reke irouna te maiu are aki toki.” (Ioa. 3:16) E kamaiuira Iehova mani mwin te bure ao te mate rinanon te kaboomwi. Ti aki riai ni kakeaa bongan te kaboomwi. (IRom 3:23, 24; 2Kor. 6:1) E reke ara tai ni boong ake imwain te Kauring n iaiangoa iai ana tangira Iehova ao Iesu are a kaotiotia, ao ti riai ni kairoroaki n te tangira aei bwa ti na kaota ara kakaitau.

¹⁸ E na kangaa ni kairiko te kaboomwi bwa ko na kaota am kakaitau? E bae ni kaokoro am kaeka ma te aomata riki temanna. Ma ko kona ni kakoauaa ae e na kakabwaiaa am kakorakora Iehova ngkai ko raonia taan taromauria aika mirion ma mirion aika a ‘aki manga maiu i bon ibukia, ma a maiu ibukin teuare mate ibukia.’—2Kor. 5:15.