Tararuaani Marurungira—Te Bwai ae E na Karaoia Ana Tautaeka n Uea te Atua

“E ngae ngkai e aikoa iangoaki te COVID-19 bwa te aoraki ae e na rangi ni karuanikai nakoni maiuia aomata ni boong aikai, ma tiaki nanona bwa ai anne tokin te bwai ae e na karuanikaia marurungia aomata.. . . Ngkana e a kaoti te butinnaoraki riki teuana—ao ti riai ngkanne n tauraoi nako iai.”—Dr. Tedros Adhanom Ghebreyesus, te tarekita ni kabuta n te botaki ae te World Health Organization, Mei 22, 2023.

A mwaiti aomata aika a teimatoa n rotakibuaka rabwataia ao aia iango imwini butinakon te aoraki ae te COVID-19. A na tauraoi tautaeka ma botaki ni kuakua nakon te butinnaoraki are imwina ao ni kona ni buoka tokin aorakin rabwatara aika ti rotaki iai ngkai?

E taekina te tautaeka teuana te Baibara are e na katauraoi baike ti kainnanoi ibukini marurungira. E taku bwa “e na katea te tautaeka n uea teuana Atuani karawa” ke te waaki ni kairiri teuana i aon te aba. (Taniera 2:44) Ngkana e a kairiri te tautaeka anne ao e na “akea te tia maeka iai ae e na kangai: ‘I aoraki.’” (Itaia 33:24) A nangi bane aomata ni marurung ao ni manga okiri aroni korakoraia ngkoa ngke a kairake.—Iobi 33:25.