N Ningai ae E Nang Toki Iai te Itabarara n te Buaka?​—Tera ae E Taekinna te Baibara?

“Aio ngkai ara tai ni kakerikaaka rikin ao karuanikain te kangaanga aei. Aio ngkai ara tai ni kakorakoraa bwainakin te taotaonakinnano,” e taekina anne te tia Koroboki ni Kabuta n te United Nations ae António Guterres, ni kaineti ma buakanakin Iteraera iroun Iran n te Kaonobong, Eberi 13, 2024.

Te itabarara n te buaka n te Middle East bon tii te katoto teuana mai buakon nako baika a riki ni katobibia te aonnaba.

“E a roko ni korakorana ngkai mwaitini waaki n itabarara aika tiritiri, ni kabotauaki ma te tai are e moanaki iai te Kauoua ni Buaka ae Kabutaa te Aonnaba, ao 2 te birion mwaitiia aomata​—kaamwakoroni mwaitin te botannaomata​—[ae] a rotakibuaka iai.”​—United Nations Security Council, Tianuare 26, 2023.

Aono ake a irekereke ma waaki n itabarara aika tiritiri aikai bon Iteraera, Gaza, Turia, Azerbaijan, Ukraine, Sudan, Itiobia, Niger, Myanmar, ao Haiti.a

N ningai ae e nang toki iai te itabarara n te buaka? A kona ni karekea te rau taan tautaeka nako n te aonnaba? Tera ae e taekinna te Baibara?

A a buaka i marenaia kaain te aonnaba

Waaki ni itabarara n te aonnaba aika ti a nori ngkai, a a kaotia bwa a nang waekoa ni katokaki buaka nako. Buaka aikai, a kakoroi bukin ana taetae ni burabeti te Baibara ni kaineti ma ara bong aikai. E taekin ara bong aikai te Baibara bwa “tain tokin te waaki ae ngkai i aon te aba.” ​—Mataio 24:3.

• “Kam na ongo karongoaani buaka ao rongorongoni buaka . . . . E na teirake te natannaomata teuana ni buakana te natannaomata teuana, ao te tautaeka n uea teuana ni buakana te tautaeka n uea teuana.”​—Mataio 24:​6, 7.

Wareka te kaongora ae “What Is the Sign of ‘the Last Days,’ or ‘End Times’?” n nori aroni buaka ni boong aikai ni kakoroi bukin ana taetae ni burabeti te Baibara.

Te buaka ae e na katoki buaka ni kabane

E a kaman taekinaki n te Baibara tokin aia itabarara aomata nako. E na kangaa n riki anne? Tiaki ni korakoraia aomata, ma bon rinanon Aremaketon, ae “te buaka n te bong ae kakannato ae ana bong te Atua ae Moan te Mwaaka.” (Te Kaotioti 16:​14, 16) Te buaka aei, e nang kauka kawain ana kakabwaia te Atua, ike e nang kakoroa iai bukin ana berita ni kaineti ma reken te rau ae akea tokina irouia aomata nako.​—Taian Areru 37:​10, 11, 29.

Ngkana ko kan reiakina riki taekan ana buaka te Atua ni katoki buaka ni kabane, wareka te kaongora ae “Tera te Buaka ae Aremaketon?”