Antai Aika Mwakoro Araia n “te Boki ni Kamaiu”?

Ana kaeka te Baibara

E aranaki naba “te boki ni kamaiu,” bwa “[te nira ni boki] ni kamaiu” ke te “boki ni kauring,” ae kakanoa n araia aomata ake a na karekea te bwaintituaraoi ae te maiu n aki toki. (Te Kaotioti 3:5; 20:12; Maraki 3:16) A reke aara akanne iroun te Atua ni kaineti ma ana kakaonimaki n ongeaba temanna ma temanna nakoina.​—Ioane 3:16; 1 Ioane 5:3.

A tiku n ana ururing te Atua taekaia ana toro n tatabemania nako, aika kakaonimaki ni koaua nakoina, n aron ae kaanga e korei araia n te boki mani “moan rikin te botannaomata.” (Te Kaotioti 17:8) E taraa n ae te mwaane ae kakaonimaki are Abera boni ngaia ae moani koreaki arana n te boki ni kamaiu. (Ebera 11:4) Ma tiaki araia aomata n aki akaka, bwa e kaotaki nakoira n te boki ni kamaiu bwa Iehova bon te Atua ae tatangira ae “e ataiia aika bon ana aomata.”​—2 Timoteo 2:19; 1 Ioane 4:8.

A kona ni kamaunaaki aara man “te boki ni kamaiu”?

Eng. E kangai te Atua ibukia tibun Iteraera rimoa ake a aki ongeaba: “N na boni kamauna aran te aomata are bure nakoiu man au boki.” (Te Otinako 32:33) Ma ngkana ti kaota te kakaonimaki, ti na teimatoa ni mena n “[te nira ni boki] ni kamaiu.”​—Te Kaotioti 20:12.