Nnen Titiraki

◼ Maanra te tai ae ti riai n reirei n te Baibara ma te aomata ae e noraki rikirakena iai?

E tamaroa riki reitinakoan te reirei n te Baibara ma te aomata ae noraki rikirakena iai, ni karokoa baneni booki aika uoua aika​—Tera Ana Reirei ni Koaua te Baibara? ao “Kawakiningkami n te Aro ae Kam na Teimatoa n Tangiraki Iai Iroun te Atua.” E koaua aei e ngae ngkana e a bwabetitoaki te aomata are reirei imwaini baneni booki akana uoua irouna. Imwini bwabetitoan te aomata anne, ti riai n teimatoa ni korea mwin te tai, manga okirana, ao te reirei ma ngaia. E riai naba n taua mwin ana tai te tia uarongorongo are e katoatoa ao e ibuobuoki n te reirei.​—Nora Ara Mwakuri ni Minita ae bwaini Maati 2009-E, iteraniba 2.

E kakawaki ibukia ake a boou bwa a na karekea aan te koaua ae tamaroa imwain ae e toki ara reirei ma ngaiia. A riai ni ‘kaneneaki wakaaia’ i nanoni Kristo ao ni “kateimatoaaki n te onimaki” bwa a aonga ni kaaitarai kataaki aika a kaaitara ma ngaai. (IKoro. 2:6, 7; 2 Tim. 3:12; 1 Bet. 5:8, 9) Irarikin anne, reiakinaia tabemwaang n te aro ae uaana, a riai ni karekea iai “te atatai ae eti ibukin te koaua.” (1 Tim. 2:4) Ni baneni booki akana uoua ma aomata ake ti reirei ma ngaiia, ti a buokiia iai bwa a na toua “te kawai ae tiki nakon te maiu.”​—Mat. 7:14.

Imwaini kariaiakan temanna bwa e na bwabetitoaki, a riai ni kakoauaa raoi unimwaane bwa e ota raoi n ana boto n reirei te Baibara ao e kaboraoa maiuna ma ngaia. A riai unimwaane n taraa raoi riki te aomata are e tuai ni bane ana moani boki are e reirei iai. Ngkana e tuai n tauraoi temanna ibukin te bwabetito, a riai ni kakoauaa raoi unimwaane bwa e karekea te ibuobuoki are e kainnanoia bwa e aonga n tau nakon te bwabetito n taai aika na roko.​—Nora te boki ae Organized to Do Jehovah’s Will, iteraniba 217-218.

[Kabwarabwaraan n iteraniba 2]

E kakawaki ibukia ake a boou bwa a na karekea aan te koaua ae tamaroa