Ko na Kangaa n Riki Bwa Raoraon te Atua?

1, 2. Antai tabeman raoraon Iehova rimoa?

ANTAI ae ko tangiria bwa e na riki bwa raoraom? Te aomata ae ko tatangiria ae ko rena ma ngaia, ao ae e rena naba ma ngkoe. E akoi ao iai irouna aroaro aika ko tangiri.

² E rineiia aomata tabeman Iehova ae te Atua bwa raoraona. N te katoto, Aberaam bon temanna mai buakoia raoraon Iehova. (Itaia 41:8; Iakobo 2:23) E taatangira naba Tawita Iehova. E taekina Tawita bwa ‘te mwaane ae kakukureia nanona.’ (Mwakuri 13:22) Ao e “rangi ni kakawaki” naba irouna te burabeti are Taniera.—Taniera 9:23.

3. E aera ngke a riki Aberam, Tawita, ao Taniera, bwa raoraon Iehova?

³ A kangaa Aberaam, Tawita, ao Taniera, n riki bwa raoraon Iehova? E kangai Iehova nakon Aberaam: “Ko ongo ni bwanaau.” (Karikani Bwaai 22:18) E riki Iehova bwa raoraoia te koraki ake a nanorinano n ongeaba irouna. E kona naba te natannaomata n riki bwa raoraona. E kabwarabwaraa ni kangai Iehova nakon te natannaomata ae Iteraera: “Ongo ni bwanaau, ao N na riki bwa Atuami, ao ngkami kam na riki bwa au aomata.” (Ieremia 7:23) Ngaia are ko riai naba n ongeaba iroun Iehova ngkana ko boni kan riki bwa raoraona.

E KAMANOIA RAORAONA IEHOVA

4, 5. E kangaa Iehova ni kamanoia raoraona?

⁴ E taekinaki n te Baibara bwa e ukoukori aanga Iehova bwa “e na kaota korakorana ibukia te koraki ake a tabwanin raoi nanoia nakoina.” (2 Rongorongo 16:9) N Taian Areru 32:8 ao e berita ni kangai Iehova nakoia raoraona: “N na anganiko te ataibwai ao N na reireiniko te kawai ae ko riai n nako iai. N na anganiko taeka n reirei ao e na memena naba matau i aom.”

⁵ E kan totokoira te tia kairiribai ae korakora, bwa ti na aki riki bwa raoraon te Atua. Ma e kani kamanoira Iehova. (Wareka Taian Areru 55:22.) Ngkai raoraon Iehova ngaira, ti a beku irouna ma nanora ni kabane. Ti kakaonimaki ni koaua nakoina e ngae naba ngkana ti rotaki ni kangaanga. Ao ti onimakinna naba n aron te tia areru are e korea ae kangai ibukin Iehova: “N na bon aki kona ni kaingingaki kioina ngkai e mena i angaataiu.” (Taian Areru 16:8; 63:8) E kangaa Tatan ni kataia n totokoira bwa ti na aki riki bwa raoraon te Atua?

ANA BUKIBUKI TATAN

6. Tera are e taekinna Tatan ibukia aomata?

⁶ Ti reiakinna ni Mwakoro 11 bwa Tatan e kabuakakaa Iehova ma ni bukinna bwa e bobokewe ao e inanonano, ngke e aki kariaia Atam ao Ewa bwa a na bairea ae raoiroi ao ae buakaka i bon irouia. Ti reiakinna ni bokin te Baibara ae Iobi bwa Tatan e bukinia naba aomata ake a kan riki bwa raoraon te Atua, n taku bwa a beku iroun te Atua ibukini baika a kani karekei mairouna, ma tiaki ibukin tangirana. E taekinna naba Tatan bwa e boni kona ni katannakoia aomata nako mairoun te Atua. Ti na nora ngkai reireiara mairoun Iobi ao aron Iehova ni kamanoa.

7, 8. (a) Tera kaokoron Iobi ma kaain te aonnaba? (b) Tera are e taekinna Tatan ibukin Iobi?

⁷ Antai Iobi? Bon te mwaane ae raoiroi are e maiu tao 3,600 te ririki n nako. E taku Iehova bwa n taai akanne ao bon akea te aomata ae ai aron teuaei n te aonnaba. E rangi ni karinea te Atua Iobi ao e ribaa te bwai ae buakaka. (Iobi 1:8) Eng, Iobi bon raoraon Iehova ni koaua.

⁸ E taekinna Tatan bwa e beku Iobi iroun te Atua ibukini kakabwaiaana. E taku Tatan nakon Iehova: “Tiaki ko a tia ni katea te oo ni kamanomano n otabwaninia ma ana auti ao ana bwai ni kabane? Ko kakabwaiaa ana mwakuri baina, ao a a bati ana nanai ni man n te aba. Ma n oneani mwin anne, arora baim ao n orei ana bwai nako, ao ane e na bon taetae nakoim ni kabuakakako.”—Iobi 1:10, 11.

9. Tera are e kariaia Iehova bwa e na karaoia Tatan?

⁹ E kabuakakaa Iobi Tatan n taku bwa e beku Iobi iroun Iehova tii ibukini baika e kani karekei mairouna. E taekinna naba Tatan bwa e kona ni katoka ana beku Iobi iroun Iehova. E aki kakoauaa anne Iehova ma E boni kariaia Tatan bwa e na kataa Iobi, n noria bwa e raoraona te Atua ibukin tangirana ke tiaki.

E A EKAKINAKO IOBI IROUN TATAN

10. E kangaa Tatan n ekaanako Iobi, ao tera aron Iobi iai?

¹⁰ Te moan, e anai Tatan ke e tiringi ana man ni kabane Iobi. Imwina e a manga tiringia angia ana toro Iobi. A a bane ni bua ana bwai Iobi. N tokina e a kamateia natin Iobi ake tengaun n te angibuaka. Ma e teimatoa ni kakaonimaki ni koaua Iobi nakon Iehova. “E aki bure Iobi ao e aki bukina te Atua bwa e karaoa ae kairua, e ngae ngke e kaaitara ma baikai ni kabane.”—Iobi 1:12-19, 22.

11. (a) Tera riki are e karaoia Tatan nakon Iobi? (b) Ma tera aron Iobi iai?

¹¹ E aki bwara nanon Tatan. E a manga kataa te Atua ni kangai: “Ringa riina ma irikona, ao ane e na bon taetae nakoim ni kabuakakako.” Ngaia are e a orea Iobi n te aoraki ae rangi ni kammaraki Tatan. (Iobi 2:5, 7) Ma e bon teimatoa naba ni kakaonimaki ni koaua Iobi nakon Iehova. E taku Iobi: “N na bon aki kakeaa [ke, ni katoka] etin arou ni karokoa ae I mate.”—Iobi 27:5.

12. E kangaa Iobi ni kaotia ae bon te tia kewe Tatan?

¹² E aki atai bwaai ni kabane Iobi ibukin ana bukibuki Tatan, ke bukini karawawataana aika bati. E iangoia bwa bon Iehova ae karikii ana kangaanga. (Iobi 6:4; 16:11-14) Ma e ngae n anne, e teimatoa Iobi ni kakaonimaki ni koaua nakon Iehova. Akea te nanououa bwa e bon toro Iobi iroun te Atua tiaki ibukini kakabwaiaana. E raoraona Iehova ibukina bwa e tangiria. A boni kewe ana bukibuki nako Tatan!

13. Tera mwin ana kakaonimaki ni koaua Iobi?

¹³ E ngae ngke e aki ataa te bwai ae riki i karawa Iobi, ma e kakaonimaki ni koaua nakon te Atua, ao e kaotia ae e boni buakaka Tatan. E kakabwaiaaki Iobi iroun Iehova ibukin rikina bwa raoraona ni koaua.—Iobi 42:12-17.

ARON TATAN NI BUKINIKO

14, 15. Tera ae e bukinia iai aomata ni kabane Tatan?

¹⁴ Ko kona ni karekei reireiam aika kakawaki man te baere riki nakon Iobi. Ni boong aikai, e bukinira Tatan bwa ti beku iroun Iehova ibukini baika ti karerekei mairouna. E taekina ae kangai Tatan n Iobi 2:4: “E na anga ana bwai nako te aomata ibukini kawakinani maiuna.” Ngaia are e bukinia aomata ni kabane Tatan bwa a tabe ma kakabwaiaaia ao tiaki tii Iobi. Bubua ma bubua te ririki imwini maten Iobi, ao e bon teimatoa naba Tatan ni kauna Iehova ao ni kabuakakaia ana toro. N te katoto, ti wareka ae kangai n Taeka N Rabakau 27:11: “Bwaina te wanawana natiu, ao kakimwareireia nanou, bwa I aonga ni kaekaa teuare kakanikoai [ke, e kaunai].”

¹⁵ Ko kona ni motinnanoia bwa ko na ongeaba iroun Iehova ao n riki bwa raoraona ni koaua, ao ni kaotaraea Tatan ae te tia kewe. E ngae ngkana ko riai ni karaoi bitaki aika bubura ni maium bwa ko aonga n riki bwa raoraon te Atua, ma bon anne te motinnano ae te kabanea n raoiroi ae ko kona ni karaoia! E rangi ni kakawaki te motinnano aei. E taekinna Tatan bwa ko bon aki kona ni kakaonimaki ni koaua nakon te Atua ngkana ko boo ma kangaanga. E kataia ni mwamwanaira bwa ti na aki kakaonimaki ni koaua nakon te Atua. N te aro raa?

16. (a) Baikara aanga ake e kabonganai Tatan ni kataia ni katoka iai aia beku aomata iroun Iehova? (b) E na kangaa te Riaboro ni kataia ni katoka am beku iroun Iehova?

¹⁶ E kamanenai anga aika bati aika kakaokoro Tatan ni kataia ni katoka ara iraorao ma te Atua. E buaka n aron ‘te raian ae bekorara, n ukoukora ae e na ongnga.’ (1 Betero 5:8) Tai mimi ngkana iai raoraom, am utu, ke tabemwaang, ake a kataia ni katoka am reirei n te Baibara ao karaoan ae e eti. Ko kona n namakinna bwa kaanga ko a buakanaki.a (Ioane 15:19, 20) E oninikia naba Tatan “bwa te anera ae kaotiota te oota.” Ngaia are e kona naba ni kataia ni mwamwanaira bwa ti na aki ongeaba iroun Iehova. (2 I-Korinto 11:14) Te anga riki teuana ae kabongana Tatan ni kataia ni katoka iai ara beku iroun Iehova, boni kairara bwa ti na iangoia ae ti aki tau ni beku iroun te Atua.—Taeka N Rabakau 24:10.

ONGEABA N ANA TUA IEHOVA

17. E aera ngkai ti ongeaba iroun Iehova?

¹⁷ Ngkana ti ongeaba iroun Iehova, ti a kaotia iai ae bon te tia kewe Tatan. Tera ae e na buokira bwa ti na ongeaba? E kangai te Baibara: “Kam riai n tangira Iehova ae Atuami ma nanomi ni kabane, maiumi ni kabane ao korakorami ni kabane.” (Te Tua-Kaua 6:5) Ti ongeaba iroun Iehova ibukina bwa ti tangiria. Ngkana e a rikirake tangiran Iehova iroura, ti na kani karaoi bwaai nako ake e tuangira bwa ti na karaoi. E korea ae kangai te abotoro Ioane: “Bon aei tangiran te Atua, ae ti na kakairi n ana tua, ao a aki rawawata ana tua.”—1 Ioane 5:3.

18, 19. (a) Baikara bwaai tabeua ake e taekin Iehova bwa a kairua? (b) Ti kangaa n ataia bwa e aki tuangira Iehova bwa ti na karaoa te bwai ae ti aki kona ni karaoia?

¹⁸ Ma baikara bwaai tabeua ake e tuangira Iehova bwa a kairua? Iai katoto tabeua n te bwaoki ae “Ribai Baike E Ribai Iehova.” Tao ko iangoia n te moantai bwa tabeua mai buakoni baikai a aki rangi ni buakaka. Ma ngkana ko wareki kiibu man te Baibara ao n iaiangoi raoi, ao ane ko na ota n te wanawana ae reke man te ongeaba n ana tua Iehova. Ane ko na namakinna naba ae ko a riai ni karaoi bitaki tabeua ni maium. E ngae ngke e kona ni kangaanga n tabetai karaoani bitaki aikai, ma ngkana ko karaoi ao ane ko na namakina te rau ao te kukurei ae reke mani karekean te iraorao ni koaua ma te Atua. (Itaia 48:17, 18) Ti kangaa n ataia bwa a kona ni karaoaki bitaki aikai?

¹⁹ E bon aki kona n tuangira Iehova bwa ti na karaoa te bwai ae ti aki kona ni karaoia. (Te Tua-Kaua 30:11-14) Ngkai bon te Rao ni koaua ngaia, e ataira riki nakon ataakira i bon iroura. E atai korakorara ao mamaarara. (Taian Areru 103:14) E kaungaira te abotoro Bauro ni kangai: “E kakaonimaki te Atua ao e na aki kariaia bwa kam na kaririaki n ae riaon ami konaa, ma e na karekea naba te anga ae kam na buutakinako iai bwa kam aonga n nanomwaaka ngkana kam kaririaki.” (1 I-Korinto 10:13) Ti kona n onimakina raoi Iehova bwa e na kakakorakoraira bwa ti na karaoa ae eti. E na bon anganiko “te korakora ae riaoni korakoraia aomata” bwa e na buokiko ni kekeiaki ribuakon taiani kangaanga. (2 I-Korinto 4:7) E taekina ae kangai Bauro imwini buokana iroun Iehova i nanon aekaki n tai akanne: “I konai bwaai ni kabane ni karaoi iroun teuare anganai te korakora.”—I-Biribi 4:13.

REIREINIKO TANGIRANI BAIKE E TANGIRI TE ATUA

20. Baikara aroaro aika ko riai ni kakairi iai, ao bukin tera?

²⁰ Ngkana ti kan riki bwa raoraon Iehova, ti riai ni katoki karaoani mwakuri ake e taekin bwa a kairua, ma ti riai ni karaoa ae bati riki. (I-Rom 12:9) A tangiri baike e tangiri te Atua raoraona. A kabwarabwaraaki taekaia n Taian Areru 15:1-5. (Warekia.) A kakairi raoraon Iehova n aroarona, ao a kaotiota “te tangira, te kimwareirei, te rau, te taotaonakinnano, te akoi, te raoiroi, te onimaki, te nimamannei, ao te taubaang.”—I-Karatia 5:22, 23.

21. Ko na kangaa n reireiniko kaotiotan aroaro ake e tangiri te Atua?

²¹ Ko na kangaa n reireiniko kaotiotan aroaro akana raraoi akanne? Ko riai n reiakini baike e tangiri Iehova n arom ni katoatai ni wareka te Baibara ao n reiakinna. (Itaia 30:20, 21) Ni karaoan aei e na rikirake iai tangiran Iehova iroum, ao ngkana e a rikirake tangirana iroum ane ko na kan ongeaba riki irouna.

22. Tera uaan te ongeaba nakon Iehova?

²² A kona ni kabotauaki taiani bitaki aika ko riai ni karaoi ni maium ma buutani kunnikai aika mane ao manga karinan aika boou. E taekinaki n te Baibara bwa ko riai ni “buuta te aroaro nikawai” ao ni karina i aom “te aroaro ae boou.” (I-Korote 3:9, 10) E ngae ngke e na aki bebete karaoana, ma ngkana ti karaoi bitaki ao n ongeaba iroun Iehova, e boni berita bwa e na anganira “te kaniwanga ae bubura.” (Taian Areru 19:11) Eng, motinnanoia bwa ko na ongeaba iroun Iehova ao kaotia ae bon te tia kewe Tatan. Beeku iroun Iehova, tiaki tii bukini kakabwaia nakon taai aika a na roko ma ibukina bwa ko tangiria ni koaua. Ao ane ko na riki iai bwa bon raoraon te Atua ni koaua!