REIREI 5
Tera ae Ko na Noria n Ara Bobotaki ni Kristian?
Argentina
Sierra Leone
Belgium
Malaysia
A bati aika a aikoa iririi botaki n taromauri n aia Aaro, ibukina bwa a aki kona ni kaekaaki aia titiraki aika kakawaki ibukin te maiu ke akea kabebetean nanoia iai. Ma tera bukina ngkai ko riai n irii botaki ni Kristian aika baireaki raoi irouia Ana Tia Kakoaua Iehova? Tera ae ko na noria iai?
Te kimwareirei i buakoia aomata aika tatangira ao ni mwamwannano. N te moan tienture, ao a baireaki raoi Kristian nakon ekaretia nako ao a karaoi botaki n taromauri ibukin te Atua, a reiakina te Baibara, ao a ikaungaunga i marenaia. (I-Ebera 10:24, 25) A namakinna bwa a mena i buakoia raao ni koaua ngkana a bobotaki ma tariia n te onimaki n te tabo ae a itangitangiri kaaina. (2 I-Tetaronike 1:3; 3 Ioane 14) Ti kakairi n aia katoto Kristian ake n te moan tienture ao n namakina naba te kimwareirei are irouia.
Te ibuobuoki n ataakin arora ni maiuakini booto n reirei n te Baibara. E riki naba anne n taai ake a karakinaki n te Baibara bwa a bane ni bobotaki mwaane, aine ao ataei. A kabongana te Baibara taan angareirei aika mwaatai n te Baibara ni buokira bwa ti na atai arora ni maiuakini booto n reirei ake iai ni katoabong. (Te Tua-Kaua 31:12; Neemia 8:8) A bane aomata ni kona ni maroro ma kaain te botaki ao n anene, ike ti a kona ni kaotiota iai ara kantaninga ni Kristian.—I-Ebera 10:23.
Te kakabwaia ibukini kakorakoraan onimakinan te Atua iroum. E tuangia kaain te ekaretia teuana te abotoro Bauro n ana tai ni kangai: “E ingainga nanou ni kan noringkami bwa . . . e na reke iai te ikaungaunga i marenara n ara onimaki, ae ami onimaki ao au onimaki.” (I-Rom 1:11, 12) A kakorakoraaki ara onimaki ao ara motinnano ni kaboraoani maiura ma booto n reirei n te Baibara, ngkana ti katoatai n reitaki ma raora n onimaki n ara bobotaki.
E aera ko aki butimwaea te kakao aei n ira ara botaki are imwina ao ni kakoauai baika taekinaki n te reirei aei? Ko na butimwaeaki ma te akoi. Akea te karemwangko n ara bobotaki nako.
Ti kakairi irouia antai n ara bobotaki n te ekaretia?
Ti na kangaa ni kakabwaiaaki n irirakini bobotaki ni Kristian?