Akea te Bwai ae na “Karaureira ma Ana Tangira te Atua”

1. Tera te bwarannano ae a rorotaki iai aomata aika bati, n ikotaki naba ma tabeman Kristian ni koaua?

E TANGIRIKO Iehova ae te Atua? A taku tabeman bwa e bon tangira te botannaomata te Atua n aron ae taekinaki n Ioane 3:​16. Ma e kangai aia kaantaninga iai: ‘E bon aki kona n tangirai te Atua.’ N taai tabetai a kona n nanououa naba n anne Kristian ni koaua. E taku temanna te mwaane ae bwara nanona ni kaineti ma aei: “E rangi ni kangaanga irou bwa N na kakoauaa ae e bon tabeakinai te Atua.” Ko rorotaki naba n te nanououa ae aekakin anne n taai tabetai ke ko aki?

2, 3. Antai ae tangirira bwa ti na kakoauaa bwa akea uaara i matan Iehova ke ti aki tangiraki irouna, ao ti na kanga ni buakana te iango anne?

² E kukurei Tatan ngkana ti kakoauaa bwa e bon aki tangirira Iehova ae te Atua ke e kakeaa uaara. E aki toki n anai nanoia aomata Tatan ni kabonganai aroia ni kainikatonga ao n nanorieta. (2 I-Korinto 11:3) E tangiria naba ni kabwaraa nanoia aomata aika mamaara bwa a na taku bwa ai bon akea bongaia. (Ioane 7:47-49; 8:13, 44) E kabatiaa karaoan anne Tatan ni “boong aika kaitira” aika karuanikai aikai. A bati ni boong aikai aika ikawairake n utu aika a “babakaine” kaaia. Tabemwaang a rotaki buaka irouia aomata aika tiritiri, a bangaaomata, ao a tautau aroia. (2 Timoteo 3:1-5) Ibukin karaoan ae iowawa nakoia i nanon te tai ae maan, ribakiia ibukin aia reeti ke ibukin te bwai teuana, a kona n taku aomata aikai bwa akea bongaia ao a aki kona n tangiraki.

³ Ngkana ko rotaki naba n aekaki n iango aikai ao tai kabwara nanom iai. A bati i buakora aika a kakabuakakaia i bon irouia n taai tabetai. Uringnga are e karaoaki ana Taeka te Atua bwa “kaetan” nanora ao e kona n “urui nono.” (2 Timoteo 3:16, BK; 2 I-Korinto 10:4, BK) E taku te Baibara: “Ti na kabebetei nanora i matana: ba ngkana a kabuakakaira nanora, ao E matairiki riki te Atua nakon nanora, ao e atai bwaai ni kabane.” (1 Ioane 3:19, 20) Ti na rinanon aanga aika aua are e “kabebetei nanora” iai te Baibara bwa ti aonga n ataa ana tangira Iehova.

Ko Kakawaki Iroun Iehova

4, 5. E kanga kabwarabwaran te tibaaro iroun Iesu ni kaota kakawakira i matan Iehova?

⁴ Te moanibwai, e reirei te Baibara bwa a kakawaki ana toro nako te Atua irouna. N aron ae e kangai Iesu: “Tiaki a kaboaki uoman te tibaaro n te aba-bene? Ao e bon aki bwaka i aontano temanna n aikai ngkana e aki ataki iroun Tamami; ma a bane naba ni warekaki iranatumi. Ma ngaia ae kam na tai maku; ba kam bongana riki nakoia tibaaro aika bati.” (Mataio 10:29-31) Iangoa nanon ana taeka Iesu aei nakoia taan ongora n te moan tienture.

⁵ Ti na bae n iangoia bwa bukin tera ngkai iai aika a na kani kabooa te tibaaro. N ana bong Iesu ao te tibaaro bon te mannikiba ae te kabanea ni boraoi are e kakabooaki bwa te amwarake. Ngkana e anga te aomata teuana te maibibi ni mwane ae moan te uarereke ao e na reke iai uoman te tibaaro. Ma e a manga kabwarabwaraa riki rimwi Iesu bwa ngkana e anga uoua te maibibi te aomata ao e na aki reke iai aman te tibaaro ma ai niman. Are nanona bwa ai aron ae akea bongan te kaniman n tibaaro bwa akea boona. Tao bon akea uaan aeka ni man aikai irouia aomata, ma tera ana kaantaninga te tia Karikiriki irouia maan aikai? E taku Iesu: “E aki manuokaki temanna n aikai i matan te Atua [n ikotaki ma are te raka].” (Ruka 12:6, 7) Ngkai tao ti a moanna n ataa te bwai ae e nanonna Iesu. Ngkana ngaia bwa e bongana naba iroun Iehova temanna te tibaaro, ao ai bati ra kakawakin riki ngkanne te aomata irouna! Ni kaineti ma are e kabwarabwaraa Iesu, e bane n atai bwaai ni kabane Iehova ibukira. Maroaka ae a bane ni warekaki naba iran atura!

6. Ti kanga n taku bwa e koaua Iesu ngke e taekina warekan iran atura?

⁶ A wawarekaki iran atura? A taku tabeman bwa tiaki te koaua ae e taekinna Iesu ikai. Ma, iangoa moa te kaantaninga ibukin te manga-uti. Ai kamimi ra aron Iehova n atai arora n te aro are e na manga kaoki anuara ngkana e kautiira! Ti rangi ni kakawaki irouna n te aro are e uringi aroarora ni kabane, n ikotaki ma aroni karaoara ao aroarora ngkoa ma baika ti ururingi ngke ti maiu ngkoa.a Ma e na bebete riki nakon anne warekan iran atun te aomata bwa angiia aomata, 100,000 mwaitin iran atuia.

Tera Kakawakira i Matan Iehova?

7, 8. (a) Baikara aroaro aika e kukukurei iai Iehova ngkana e nori i nanoia aomata? (b) Baikara mwakuri tabeua aika ti kaakaraoi aika kakawaki iroun Iehova?

⁷ Te kauoua ni bwai, e reireinira te Baibara aroni kakawakiia ana toro Iehova irouna. E kaotia bwa e kukurei n aroarora aika raraoi ao n ara kakorakora are ti kabanea i bukina. E taku te Uea ae Tawita nakon natina ae Toromon: “E ukeuke n naano ni kabane Iehova, ao E atai reken naano ni kabane.” (1 Rongorongo 28:9) Ngkana ngaia bwa e ukera nanoia aomata aika birion ma birion mwaitiia te Atua n te aonnaba ae onrake n te riribai ma te buakaka aei, ai boni kimwareirei ra ngaia ngkana e a tuoa te nano ae tangira te rau, te koaua, ao te raoiroi! Tera ae na riki ngkana e a kaitiboo naba te Atua ma te nano ae rangi ni korakora tangirana iai, ae ukoukora te kan reirei n taekana, ao e tibwatibwaa naba te atatai aei nakoia aomata? E tuangira Iehova bwa e taua mwiia te koraki ake a tutuangia aomata rongorongona. Iai naba ana “boki ni kauring” ibukia te koraki ake a “maka Iehova, ma akana iangoa arana.” (Maraki 3:16) A rangi ni kakawaki aroaro aikai i matana.

⁸ Baikara mwakuri tabeua aika raraoi ake a kakawaki iroun Iehova? Bon ara kakorakora ni katotonga Natina ae Iesu Kristo. (1 Betero 2:21) Teuana te mwakuri ae rangi ni kakawaki i matan te Atua boni kataabangakan te rongorongo ae raoiroi ae taekan ana Tautaeka n Uea. N I-Rom 10:15, ao ti wareka iai ae kangai: “Ai tamaroa ra waeia ake a uarongorongoi baika raraoi!” Tao ti iangoi waera bwa a “tamaroa” ke a raraoi. Ma a tei n te kibu aei ibukin aia kakorakora n tataekina te rongorongo ae raoiroi, ana toro Iehova. Mwakuri ni kakorakora ni kabane aikai a bane n raraoi ao ni kakawaki i matana.​—Mataio 24:14; 28:19, 20.

9, 10. (a) Bukin tera ngkai ti kakoauaa bwa e kakawaki iroun Iehova nanomwaakara i aan kangaanga tabeua? (b) Tera ae e aki kona n iangoia Iehova ngkana e taraia ana toro aika kakaonimaki?

⁹ E kakawaki naba iroun Iehova arora n nanomwaaka. (Mataio 24:13) Ururinga are e tangiriko Tatan bwa ko na tannako mairoun Iehova. Ngkana ko teimatoa ni kakaonimaki ni katoa bong iroun Iehova, ao ai aron ae ko anga am ibuobuoki n te bong teuana ma teuana ni kakewea ana bukibuki Tatan. (Taeka N Rabakau 27:11) N tabetai ao e a aki bebete te nanomwaaka. Ko kona ni kataaki n te aoraki, kangaanga ni kaineti ma te kataumwane, rawawatan nanom, ao ai kangaanga riki tabeua ake a kona ni kataiko n te bong teuana ma teuana. Bwaai aika a rangi ni maan ni kakaantaningaki ma a tuai n reke, e kona ni karekea te bwarannano naba. (Taeka N Rabakau 13:12) Ngkana ko teimatoa n nanomwaaka i nanon am tai ni boo ma aeka ni kangaanga aikai, ao ko na rikirake iai ni kakawaki riki iroun Iehova. Anne bukina are e butiia Iehova te Uea ae Tawita bwa e na kawakina rannimatana i nanon te “batoro” ma n reitia ni kangai: “Tiaki a mena i nanon am boki?” (Taian Areru 56:8) Eng, a rangi ni kakawaki iroun Iehova rannimatara ao karawawatakira aika ti nanomwaaka ribuakona, ao e ururingi naba ngkai ti teimatoa ni kakaonimaki nakoina. A teimatoa ni kakawaki i matana.

¹⁰ Ma ti kona ni kabuakakaki ni bon oin nanora, n totokoa kakoauan are ti kakawaki i matan te Atua. E kona ni kangai nanora: ‘Ma a bati aomata aika raoiroi riki nakoiu. E na bon rangi n un Iehova ngkana e kabotauai ma ngaiia!’ E bon aki kakabotaunaari Iehova; ao e aki nanomatoa ke ni motimatoa n ana iango. (I-Karatia 6:4) E rangi ni matairiki ngkai e kona n nora nanora, ao e moanibaa ni kakawaki irouna raoiroira ake e nori, e ngae ngke a uarereke.

E Kaokoroa te Raoiroi ma te Buakaka Iehova

11. Tera reireiara n aron Iehova ni kaineti ma rongorongon Abiia?

¹¹ Te katenua ngkanne bwa ngkana e tuoi nanora Iehova, e karaua ni kakaaei iai aroaro aika raraoi. N te katoto, ngke e a bairea aroia taani kabwaoua te koaua Iehova ake kanoan nako te Uea are Ieroboam bwa a na tiringaki, ao e tua bwa e na taunaki raoi natin te uea temanna ae Abiia. Bukin tera? “Kioina ngkae e reke te bwai teuana ae raoiroi i nanona nakon Iehova, ae Atuaia Iteraera.” (1 Uea 14:1, 10-13) E bae n tia n tuoa nanon te teinimwaane arei Iehova ao e kunea “te bwai teuana ae raoiroi” iai. E ngae ngke e uarereke ke e aki rangi n tau te raoiroi anne ma e kakawaki iroun Iehova bwa e na koreaki taekana n ana Taeka. E karekea kaniwangan te aomata ane nako man te utu ane a kabwaoua te koaua anne, ao e nanoangaia.

12, 13. (a) E kanga rongorongon te Uea ae Ieotiabata ni kaotia bwa e tataraa raoiroira Iehova e ngae ngkana ti bure? (b) E kanga Iehova n riki bwa te Karo ae tatangira ni kaineti ma raoiroin ara mwakuri ao aroarora?

¹² Te katoto ae rangi n rianako riki e kuneaki iroun te Uea ae raoiroi ae Ieotiabata. Ngke e a karaoa te kairua te uea aei ao e tuangnga ana burabeti Iehova ni kangai: “E nangi reke kaim mairoun Iehova i bukin te baei.” Ai kangaanga ra iangoan anne! Ma e tuai ni bane ana rongorongo Iehova. E reitaki nako ni kangai: “Ma a bon reke bwaai aika raraoi i roum.” (2 Rongorongo 19:1-3) Mangaia are unin Iehova ae eti ikai e aki kamatakiaki iai bwa e na aki nora raoiroin Ieotiabata. Ai boni kaokoro ra Ngaia ma aomata aika a aki kororaoi! Ngkana ti un irouia tabemwaang ao ti kona naba n aki nora raoiroia. Ao ngkana ti karaoa naba te bure, unra iai ma maamaara, ao namakinan ae boni ngaira ae ti karika karaoan te kairua, a kona naba ni kamatakira bwa ti na aki nora raoiroira. Ma, uringnga are ngkana ti nanomaraki n ara bure ao ti kakorakoraira bwa ti na aki manga okiria ni karaoia, ao e na boni kabwarai ara bure Iehova.

¹³ Ngkana e tuoa nanom Iehova, ao e kanakoi buure ake e boo ma ngaai, n aron naba te tia kakaaea te koora ae e kanakoi taiani kirikiri ake akea bongaia ngkana e keniken ibukin ukoukoran te koora. Ma tera ngkanne aron am mwakuri ma aroarom aika raraoi? Eng, baikanne bon ai aron koora ake e kakawakin! Ko a tia n nonora aroia kaaro aika a tatangira, ngkana a kawakin aia korobanna natiia ke aia bwai n reirei, i nanon tatabebwi te ririki e ngae ngke a a mwaninga taekan baikekei natiia? Bon akea ae orea nako ana tatangira te Karo ae Iehova. N ara tai n teimatoa ni kakaonimaki nakoina, ao e na bon aki kona ni mwaninga ara mwakuri aika raraoi ma aroarora. Ni koauana, E na iangoia bwa e aki-raoiroi ngkana arona bwa e na mwanuokin baikai, bwa e aki kona ni karaoa ae aki-raoiroi Iehova. (Ebera 6:10) E tuoira naba Iehova n te anga teuana.

14, 15. (a) Bukin tera ngkai e aki kamatakiaki Iehova n aki-kororaoira, n te aro are e a aki kona n nora raoiroira? Kabwarabwaraa. (b) Tera ae e na karaoia Iehova ma aroarora aika raraoi ake e nori iroura, ao tera arona n taraiia ana aomata aika kakaonimaki irouna?

¹⁴ E ataia Iehova bwa ti aki kororaoi ma e bon nora ara konabwai. E kangai kamatataana: Aomata aika a taatangiri korobanna aika a rangi ni kakawaki, a na rangi ni kakorakoraia ni manga katamaroai taamnei aikai ngkana a uruaki. N te katoto, ngke e katiiaki ana korobanna Leonardo da Vinci ae boona $30 te mirion ae mena n te National Gallery i Ranran, i Engiran, ao akea ae taekinna bwa e na teweaki nako te taamnei arei ngkai e a uruaki. Bon akea ae kani katuka taekan te taamnei ae ai 500 te ririki maanna aei ma e a bon anaaki naba ngkekei ni manga katiaaki raoi. Bukin tera? Ibukina bwa e rangi ni kakawaki anne irouia aika tatangiri korobanna ao a na rawa ni kataonabaa. Ko kakawaki riki nakon te korobanna ae karaoaki man te tiaoka ma te mannang ke ko aki? Ko bon rangi ni kakawaki i matan te Atua, e ngae ngke ko kabuakakaki n ituakim n te aki-kororaoi. (Taian Areru 72:12-14) Te tia Karika te utu n aomata ae mwaatai ae Iehova ae te Atua, e na boni karaoa ae raoiroi ni kaineti ma kaokaia aomata ake a butimwaea ana tangira ae mwamwannano, nakon aroia ni kororaoi.​—Mwakuri 3:21; I-Rom 8:20-22.

¹⁵ Eng, e bon nora raoiroira Iehova e ngae ngke ti aki noria ngaira. Ao ngkai ti toro irouna, e na karirikirakea raoiroira aei ni karokoa ae ti a kororaoi. A rangi n tatangiraki ao ni kakawaki iroun Iehova ana toro aika kakaonimaki, e ngae ngke a iowawa kaain ana aonnaba Tatan nakoia.​—Akai 2:7.

E Kaotiota Ana Tangira Iehova n Ana Mwakuri

16. Tera te bwai ni kakoaua ibukin tangirara iroun Iehova ae moanibaan te kakawaki, ao ti kanga n ataia bwa e karaoaki te bwaintangira aei ibukira n tatabemanira nako?

¹⁶ Te kaaua ngkanne bon aron Iehova ni karaoa ana mwakuri ae bati ibukin kakoauan tangirara irouna. Ana karea ni kaboomwi Kristo boni kaekaan raoi ana kewe Tatan are e taku bwa akea uaara ao ti aki tangiraki. Ti aki riai ni mwaninga are marakin Iesu ni matena are e karawawataki iai i aon te kai, ao korakain nanon Iehova ae rangi ni korakora riki n norakin Natina ae rangi n tangiraki irouna bwa e a mate, boni kakoauan tangirara irouia. E kananokawaki bwa a bati aomata ae e kangaanga irouia kakoauan ae te bwaintangira aei e boni karaoaki ibukiia. A taku n aia kaantaninga bwa bon akea uaaia. Uringnga ngkoa are te abotoro Bauro bon te tia bwainikirinia taan rimwin Kristo. Ma e ngae n anne, e korea ae kangai: “Natin te Atua, are tangirai, are anga Ngaia i bukiu.”​—I-Karatia 1:13; 2:20.

17. E a kanga ni katikira Iehova nakoina ma Natina?

¹⁷ E kakoauaa ana tangira Iehova ibukira n arona ni buokira bwa ti na karekea kakabwaiara man ana karea ni kaboomwi Kristo. E taku Iesu: “Akea ae e kona n nakoiu ngkana e aki katikia te Tama are e kanakoai.” (Ioane 6:44, BK) Eng, e a bon tia ni katikira Iehova nakon Natina ao nakon kaantaningan te maiu are aki toki. Ni kanga? E reke man te mwakuri n uarongorongo are e kona n roko iroura ni kabaneira. Ao e reke naba man taamneina ae raoiroi, are e kabongana Iehova bwa ti na kona ni karekea te koaua iai ni bwaai n taamnei ao n taua ma ni kabonganai ni maiura, e ngae ngke iai tian ara atatai ao ti aki kororaoi. N te aro anne ao e kona ngkanne Iehova n tuangira te bwai are e taekinna naba nakoia I-Iteraera ae kangai: “I tangiriko n te tangira ae akea tokina, ma ngaia ae e teimatoa akoam irou.”​—Ieremia 31:3, BK.

18, 19. (a) Tera te aro ae ti bon namakina raoi iai tangirara iroun Iehova, ao tera ae oti iai bwa e bon tabeakinira? (b) E kanga ni kakoauaa nakoira ana Taeka te Atua, bwa e bon atataiaomata Iehova ni kakauongo iroura?

¹⁸ Tao rinanon te tataro ae ti kona raoi iai n namakina ana tangira Iehova nakoira ae rangi ni korakora. E kaungaira te Baibara n tatabemanira nako bwa ti na “tataro n aki toki” nakon te Atua. (1 I-Tetaronike 5:17) E bon ongo ao anne bukina ae e aranaki iai bwa te tia “ongo tataro.” (Taian Areru 65:2) E aki anga te nakoa aei nakon temanna, ao e aki naba mwiokoa ae bon oin Natina iai. Iangoia: E kaumakira te tia Karika te iuniweeti bwa ti na kawaria rinanon te tataro, ma te inaaomata n taetae-ni-kawai nakoina. Ao tera arona ni kakauongo? E bangaaomata, e aki kaotiota te tatangira ke e aki mutiakinira? Bon tiaki akanne arona.

¹⁹ E atataiaomata Iehova. Tera te atataiaomata? E taekina ae kangai temanna te Kristian ae e a kara ae rangi ni kakaonimaki: “Te atataiaomata bon namakinan marakin nanom, i nanou.” Te koaua bwa e bon rotaki Iehova ni marakira? Ti wareka ae kangai ni kaineti ma rawawataia ana aomata aika I-Iteraera: “E karawawataki n rawawataia ni kabane.” (Itaia 63:9, NW) E aki tii nora buakakaia Iehova ma e nanoangaiia naba ana aomata. Korakoran ana namakin Iehova ni kaineti ma aei, e boni kabwarabwaraki raoi n ana taeka nakoia ana toro ae kangai: “Ane ringingkami ao e ringa naba ataeini matana.”b (Tekaria 2:8) Ai boni kammaraki ra anne! Eng, e bon rotaki Iehova ibukira. Ngkana ti maraki ao e maraki naba.

20. Baikara iango aika aki raraoi aika ti riai ni kararoai ngkana ti na ira nanon te reirei are e mena n I-Rom 12:3?

²⁰ Akea te Kristian ae iangoraoi ae e kona ni kabongana kaotan tangirana ao kakawakina iroun te Atua aei, bwa e na kainikatonga iai ke ni kamoamoa. E korea ae kangai te abotoro Bauro: “I taku, n te akoaki ae I anganaki, nako imi n tatabemaningkami nako, ba e na tai iango temanna i nanona ni kamoamoa i bon i rouna ni kamaitia riki nakon are e riai ba e na iangoia; ma e na iango i nanona n te aro ae e na wanawana iai, n ai aron tibangan te onimaki are E tibaia te Atua nakoia aomata nako.” (I-Rom 12:3) E taku te rairai ae teuana: “I taku nakoimi bwa e na aki kabatiaa iangoana temanna iroumi bwa aongkoa e rangi ni kakannato riki nakon are kaantaningaki ibukina, ma e na tarataraa raoi aroarona.” (A Translation in the Language of the People, iroun Charles B. Williams) E ngae ngkai ti kakabwaiaki ngkai ti tatangiraki iroun Tamara are i karawa, ma ti bia wanawana ma n uringnga are tangirara irouna, bon tiaki te bwai ae riai n reke iroura ibukina bwa a raraoi ara mwakuri ao aroarora.​—Ruka 17:10.

21. Baikara ana kewe Tatan ake ti riai n teimatoa n rarawa nako iai, ao tera te koaua man te Baibara ae riai n teimatoa ni kabebetei nanora?

²¹ Ti bia bane ni kakorakoraira n rarawa nakon ana kewe nako Tatan, n ikotaki ma te kewe are aongkoa akea uaara ke akea bukin tangirakira. Ko a bon tia ni mwane n te kewe ngkana ko taku bwa e rangi ni kangaanga anuani maium ao ko aki kona n tangiraki iroun te Atua. Ke ngkana ko taku bwa a rangi n uarereke am mwakuri aika raraoi n te aro are a aikoa mutiakinaki iroun te Atua. Ke ko taku bwa a rangi n abwabwaki am bure ao a aki kona naba n rabunaki ni maten Natina ae tangiraki. Kamatoaa nanom n rarawa nakon keewe aikai! Ti na kateimatoa nanora n te koaua are e kabwarabwaraa Bauro n ana taeka ae kairaki koreana iroun te taamnei ae kangai: “I taku ba e boni koaua, ba e aki kona te mate, ke te maiu, ke anera, ke uea, ke bwaai nabangkai, ke baika na roko, ke taan tau-taeka, ke te rietata, ke te rinano, ao e aki kona naba te bwai teuana ae karikaki, ni karaureira ma tangirara iroun te Atua, are i nanoni Kristo Iesu are ara Uea.”​—I-Rom 8:38, 39.