Ti Riki Mai Ia?

E AERA BWA E RANGI NI KAKAWAKI KAEKAANA? A mwaiti aomata aika a reiakinaki bwa te maiu aio bon te bwai ae manennanti n riki. A reiakinna naba bwa rinanon bwaai aika kakaokoro aika karina n riiriki ae te ewarutin, boni ngaia ae karikia te botannaomata ma aia namakin, rabakauia ao aia konabwai ni kan ota ni kaineti ma te kaantaninga ae irekereke ma te maiu.

Ma iangoia: Ngkana te koaua bwa ti bane n riki man te ewarutin ao akea te tia Karikiriki, ngkanne te botannaomata aei ai aron te teei ae akea ana karo. Ngkanne bon akea nibwan te wanawana ae raka ae e kona ni buokia aomata n aia kangaanga nako. Ti tii kona n onimakina wanawanaia aomata bwa a na totokoa te kabuanibwai nakon te otabwanin, te itabararaa i marenaia tautaeka, ao ni buokira n ara kangaanga nako.

E karekea raunnanom iangoan aeka ni koaua akanne? Ngkana e aki, ao iangoa ana iango te aomata ae raka riki wanawanana. E aki tii anai nano ma e bon teretere raoi naba.

Ana Taeka te Baibara

E reiakinaki n te Baibara bwa aomata bon ana karikibwai te Atua. Ti bon aki riki man te koaua ae bangaaomata ao n aki eti ae te ewarutin. Ma ni kaitaraan anne, boni ngaira natin te Tama ae tatangira ao e wanawana. Iangoi koaua aika mataata aikai aika kaotaki n te Baibara.

Karikani Bwaai 1:27. “Ao te Atua E karika te aomata ba katotongana, E karikia ni katotonga arona; E karikiia ba te mwane ao te aine.”

Taian Areru 139:14. “N na katituaraoiko; ba e kakamaku karaoau i Roum ao e kamimi naba: A kamimi am makuri; ao e bon ataia raoi tamneiu.”

Mataio 19:4-6. “Tiaki kam a tia ni wareka taekan Teuare karaoiia aomata ni moan karikan aonaba ba E karaoiia ba te mwane ao te aine, ao E kangai, ma ngaia ae e na kitana tamana ao tinana te aomata n nim ma buna; ao a na riki n ti te irikona naka uoman? Ma ngaia ae tiaki uoman rimwi nakai, ba ti te irikona. Ma ngaia aei, ba akana E kaboia te Atua ao ke a tai motikiia aomata.”

Mwakuri 17:24, 25. “Te Atua are karaoi aonaba ma bwaai ni kabane aika i aoia, are Ueani karawa ma aonaba, E aki maeka ni maneaba aika karaoaki ni baiia aomata; ao E aki akoaki ni baiia aomata bwa aongkoa E kai nanona n te bwai teuana, ba E angania ni kabaneia te maiu ma te ikeike ma bwaai ni kabane.”

Te Kaotioti 4:11. “Ko riai n anganaki te neboaki ma te karineaki ma te mwaka: ba Ko karaoi bwaai ni kabane, ao bon iai baikai i bukin nanom, ao a karaoaki iai.”

Aron Ana Kaeka te Baibara ni Karekea te Raunnano ni Koaua

Ataakin ae ‘a aranaki utu nako’ iroun te Atua e kona ni bitii ara iango ibukia aomata tabemwaang. (I-Ebeto 3:15) Karekean te atatai anne, e kona naba rotii arora n iangoira ma ara kangaanga. A kona n rotaki ara iango n aanga aikai.

Ngkana ti kaaitara ma motinnano aika kangaanga, ti aki riai ni kaatuua raraomaeakinan koaua aika kakaokoro mairouia aomata. N onean mwin anne, ti na mwiokoi ana reirei ni kauring te Baibara. Bukin tera? Ibukina bwa “e anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi: ba e aonga ni moan te raoiroi ana aomata te Atua, ao e na kabaneaki ni kataeaki nangina nakoni makuri aika raraoi ni bane.”—2 Timoteo 3:16, 17.

Ni koauana, maiuakinan ana reirei ni kauring te Baibara e kainnanoaki iai te kakorakora ao te taubaang. N taai tabetai ti kona n namakinna ae te bwai are e tangirira te Baibara bwa ti na karaoia, e a kauntaba ma te bwai ae ti kani karaoia. (Karikani Bwaai 8:21) Ma ngkana ti butimwaea te koaua ae ti bane ni karikaki iroun te Tama are i karawa ae moan te tatangira, ti riai ni kakoauaa ngkanne bwa e na boni bae n ataa ae raoiroi riki ibukira. (Itaia 55:9) Mangaia are e kaungaira ni kangai n Ana Taeka: “Onimakina Iehova n nanom ni kabanea, ao tai mwiokoa oin am ataibwai: Ko na ataia n nakonakom ni kabane, Ao E na kaeti kawaim.” (Taeka N Rabakau 3:5, 6) Ni maiuakinan te reirei ni kauring anne, e na toki iai te raraoma ae bati are ti namakinna ni kaitaraara ma kangaanga ao motinnano aika ti riai ni karaoi.

Ngkana ti kaaitara ma te inanonano, ti na aki kabwarai nanora n namakinan ae ti mangori ao n iaiangoan ae ti aki kakawaki riki nakoia ake a kaokoro aia reeti ke kateia ma ngaira. N onean mwin anne, ti riai ni karikirakea namakinan ae ti kakawaki n te aro ae riai. Bukin tera? Ibukina bwa Tamara, ae Iehova ae te Atua, “e bon aki nanonano n tarakin aroia aomata; ma e tangiraki i Rouna ane makua, ma ni karaoa te raoiroi, i buakoia botanaomata ni kabaneia.”—Mwakuri 10:34, 35.

N ataakin aei e na kararoaira man kariaiakan te inanonano bwa e na bita aroarora nakoia tabemwaang. Ti bon riai n ota bwa akea bukina ae ti na karietataira iai nakoia aomata ake man te reeti teuana riki, ngkai te Atua “e karaoiia botanaomata ni kabaneia n te raraa ae ti teuana, ba a na maeka i aonaba ni kabane.”—Mwakuri 17:26.

Ni koauana, ataakin ae ti bon karikaki ao e mumutiakinira ara tia Karikiriki, e na kona ni karekea aan te raunnano ni koaua. Ma e mwaiti riki ae kainnanoaki ngkana ti kani karekea te raunnano.

[Kabwarabwaraan n iteraniba 4]

Te koaua bwa e bon riki man te ewarutin te botannaomata?

[Taamnei n iteraniba 5]

E kona n reke iroura te raunnano ni koaua n ataakin ae e mumutiakinira ara tia Karikiriki