Manga Ukoukoran te Kani Kakannato Irouia Abotoro

Ngke a a touaanako kawaia n nakoaiaki Iesu ma taan rimwina i Berea ni kaineta Ierutarem, ao a a rinanon te Karaanga ae Ioretan i rarikin Ieriko. A boni mwananga ma tabemwaang nakon te Toa ae te Riao n 33 C.E.

E ririmoaia taan rimwina Iesu, bwa e kan roko n te kaawa n tain raoi te Toa ae te Riao. Ma a maaku taan rimwina bwa ni maten ngkoa Rataro ngke e nang kitana Berea Iesu n nako Iutaia, ao e a tuangia ake tabemwaang Toma ni kangai: “Ti na nako naba bwa ti na mate ma ngaia.” (Ioane 11:16, 47-​53) Ai ngaia are e a karuanikai te nako Ierutarem, ao e aki otara raoi bukini maakuia taan rimwina.

Ni katauraoaia ibukini baike imwaia, e a kaokoroa n tii ngaia Iesu ma abotoro ao e taku nakoia: “Ti a waerake ngkai nako Ierutarem, ao e na tauaki iai Natin te aomata nakoia mataniwi n ibonga ao taani koroboki ao a na kabuakakaa nakon te mate, ao a na angania aomata aika tiaki I-Iutaia bwa e na bwainingareaki, ma ni kataereaki, ao e na kamateaki i aon te kai ni kammaraki, ao e na kautaki n te katenua ni bong.”​—Mataio 20:18, 19.

Aio ana katentai Iesu n tuangia taan rimwina taekani matena ao mangautina. (Mataio 16:21; 17:22, 23) Ma n te tai aei, e a taekinna ae e nang kamateaki i aon te kai. A bon ongora irouna ma a aki ota raoi n nanon ana taeka. Tao a kantaningaa manga kaboouan aia tautaeka I-Iteraera i aon te aba, bwa a kani karekea te mimitong ao te karineaki ma Kristo n te tautaeka n uea n te aonnaba.

E mena i buakoia taani mwananga tinaia abotoro aika Iakobo ma Ioane are tao Taroma. E angania abotoro aika uoman aikai Iesu araia ae nanona “Natin te Baa,” bon ibukin aroaroia ae a kakaiun. (Mareko 3:17; Ruka 9:54) I nanon tabeua te tai, a a rangi ni kani kakannato naaka uoman aikai n ana Tautaeka n Uea Kristo. E bon ataa anne tinaia ao e a kawara ngkai Iesu ibukia, e bobaraaki i matana ao ni bubutii. E kaeka Iesu ni kangai: “Tera ae ko tangiria?” E taku neiei: “Aanga am taeka bwa a na tekateka i rarikim natiu mwaane aika uoman aikai, temanna i angaataim ao temanna i angamaingim, n am Tautaeka n Uea.”​—Mataio 20:20, 21.

Bon aio aia bubutii Iakobo ma Ioane. Ibukina bwa e a tibwa tia Iesu ni kabwarabwaraa te kamaamaeaki ao te kabwainrangaki are e na aitara ma ngaia, e a taku ngkanne nakoia: “Kam aki ataa te bwai ane kam bubutii. Kam kona ni moi n te mwangko ae N nangi moi iai?” A kaeka ni kangai: “Ti kona.” (Mataio 20:22) Ma a bae n aki ota raoi n te bwai ae nanonaki ibukia.

Ma e ngae n anne, e tuangia Iesu ni kangai: “Ane kam na boni moi n au mwangko, ma tiaki au bwai te katekateka i angaataiu ao i angamaingiu, ma a na tekateka iai te koraki ake a katauraoaki kaintekateka aikai ibukia iroun Tamau.”​—Mataio 20:23.

Ngke a ongo abotoro ake tengaun aia bubutii Iakobo ao Ioane ao a rangi n un. E koaua bwa a tokatokanako Iakobo ma Ioane n te kauntaeka rimoa i marenaia abotoro bwa antai ae te kabanea ni kakannato? (Ruka 9:46-​48) E oti n aia bubutii ngkai bwa a aki kamanena naaka Tengauni ma uoman aikai ana reirei Iesu are e anga ibukin iangoaia bwa a mangori riki. E teimatoa nanoia ni kani kakannato.

E iangoia Iesu bwa e na kaeta te kauntaeka ao te iango ae buakaka ae riki aei. E weteiia naake Tengauni ma uoman ao e reireinia ma te tangira ni kangai: “Kam ataia bwa a tautaekanaki natannaomata irouia naake a atongaki bwa aia tia tautaeka, ao a tauaki aroia irouia aia aomata aika kakannato. Tiaki aei aromi ae riai, ma ane e kani kakannato i buakomi, ao e riai n riki bwa ami tabonibai, ao ane e kan riki bwa te moanibaa i buakomi, e riai n riki bwa aia toro aomata ni kabane.”​—Mareko 10:42-​44.

E katea te banna Iesu ae ana katoto, ae a riai ni kakairi iai ngke e kabwarabwaraa ni kangai: ‘E aki roko Natin te Aomata bwa e na tautorona te aba, ma e roko bwa e na riki bwa te tabonibai, ao e na anga maiuna bwa te kaboomwi ibukia aomata aika bati.’ (Mataio 20:28) I nanon tenua tabun te ririki, e bon toro Iesu ibukia aomata. Ao e na karaoa anne ni karokoa matena ibukia aomata. E riai n reke irouia taan rimwin Iesu aroarona ae te kan riki bwa te toro ma tiaki te kan toronia aomata, te kani mangori riki ma tiaki te kani kakannato.